Matesu 16 - O Mikanda Ikola

A bhinga kijimbuete

¹ Jifalizeu ni jisaduseu anga eza ku mu londa, a mu bhinga ku a edikiza kijimbuete ku diulu.

² Muène-phe u a vutuila, uiixi. Enu, mu ngoloxi, muixi: Kuma kuanda kúkia kiambote, kuma diulu dia kusuka.

³ Mu kimemene, muexi: Lelu mvula! Kuma ku diulu kua kusuka, kualômbo. Akua mangonha! Muejiia kutungula o pholo ia diulu, maji mu lémbua kutungula o ijimbuete ia jithembu!

⁴ Muiji uaiibha, ua akua jiphànda, u sota kijimbuete! Kijimbuete-phe ka a bhana-kiu, kikale ngó o kijimbuete kia Jona, kuabhu! Anga u a-xa bhobho, uia kuengi.

O kithûthume kia Jifalizeu ni Jisaduseu

⁵ Jixibulu anga a zaúka ku sámbua, anga a jimba kuambata jimbolo.

⁶ Jezú anga ua ambela, uixi: Alukenu, mu dimukine o kithûthume kia jifalizeu ni jisaduzeu.

⁷ Ene anga a fueta mudiâ, exi: Muène ua ki zuelela o jimboluʼ ojo, ji tua kambe kuambata.

⁸ Jezú kia ki mono, uixi: Enu tata, mua tolo o kuxikana, muala ku difuetela-hi mudienu, mukonda dia kukamba kuambata o jimbolo?

⁹ Kífua kiluua mu mona, ki mu lembalala o mbolo jitanu ku midi jitanu ja mala ni jingalu ji mua nonene-ku?

¹⁰ Ni sambuadi dia jimbolo ku midi jiuana, ni inda ioso i mua nonene-ku?

¹¹ Ki mu kʼivu kiebhi kuila o jimbolo ki jene ji nga tange? Dimukinenu-phe o kithûthume kia jifalizeu ni jisaduzeu.

¹² Ene iá a kʼivu kiua kuma o kithûthume ki nanukisa o jimbolo ki kiene kia tange o ku ki dimukina, maji o ulongelu ua jifalizeu ni jisaduzeu.

O kufisala kua Phetele

¹³ Kiki kieza Jezú mu jimbandu ja Sezaleia ia Felipe, uibhula jixibulu jê, uixi: Eme, Monʼa Muthu, athu ala ku ngʼila kuma eme nanhi?

¹⁴ Kuala ene: Amoxi exi: Nzuá dia Batizu; amoxi, exi: Elija; amukuá exi: Jelemiia, mba muthu ku jipolofeta.

¹⁵ Muène anga ua ambela, uixi: Enu-phe, muixi eme nanhi.

¹⁶ Kuala Ximá Phetele: Eie u Kristu, Monʼa Nzambi ia muenhu.

¹⁷ Jezú u kumbulula, uixi: Eie ua zediua, Ximá dia Jona! Mukonda o kidi kienhiki eie kua kʼijidila ku xitu ni manhinga, maji a ku bhana-kiu kuala Tata iami uene mu diulu.

¹⁸ Kala kiki, ngi ku ambela dingi, kuma eie Phetele, o bhu ndànji iíi, bhene bhu ngi tunga o Ngeleja iami, o mielu ia Kalunga ki ia kà tena ku i lundumuna.

¹⁹ Eme ngi ku bhana o jisabhi ja Utuminu ua Diulu; kioso ki u kuta eie mu ngongo, ni mu diulu ki kala kiókute; kioso ki u jituna eie mu ngongo, ni mu diulu ki jituka.

²⁰ Behnhobho Jezú anga u tendelela jixibulu kuila ki ji tangele muthu kuamba Jezú muene Kristu.

Jezú u tanga dingi o kûfua ni kufukunuka kuê

²¹ Tunde bhu thembu ioio Jezú u kuata kuidikiza jixibulu jê kuma muène u bhinga kuia mu Jeluzaleme, kumona jiphaxi javulu ku adiakimi, ni ku jinganga ja makota ni asoneki, ni ku mu jibha, ni kufunuka mu kizuua kia katatu.

²² Phetele anga u kuata ku mu funhisa, uixi: Lu ku suke, Ngana! Kienhiki ki ki ku bhite.

²³ Bhenhobho Jezú-phe u sakuka, u ambela Phetele, uixi: Bhita ku dima diami Satana! Eie ua di bhange u ditadi dia kidibhukanu, ua-lu sota ku ngi bhalesa mu njila iami! Kuma o ima ia Nzambi ki iene i ua bhake muẋima, ni ku i xinganeka, maji o ima ia athu!

²⁴ Kienhókio Jezú u ambela jixibulu jê, uixi: Se muthu ua mesena ku ngi kaiela eme, a di fule o kudibanza muène-muene, a zangule dikulusu diê, a ngi kaiele.

²⁵ Mukonda uoso ua mesena kubhulula muenhu uê, ua-nda ku u texi; o uoso u texi muenhu uê mukonda diami, ua-nda ku u bonga.

²⁶ Muthu u bhanduluka-hi, se ua nganhala ngongo ioso, nʼa te-mu o muenhu uê? Inga muthu u bhanahi mu ta uenji ua muenhu uê?

²⁷ Mbata Monʼa Muthu ua kèza mu kijingu kia Tata iê, kumoxi ni ji-anju jê; Thembuʼoio, kala muthu, ua kà mu vutuila kioso kia tokala mu ikalakalu iê.

²⁸ Ngi mi ambela kidi, emana bhabha, sai-bhu ni iá ka kà lola kalunga, katé kia kà mona o Monʼa Muthu uala kuiza mu ungana uê.