Matesu 14 - O Mikanda Ikola

Nzuá dia Batizu a mu jibha

¹ Bhu thembuʼobho, Helode dia tetalaku, muenexi a Ngalileia, anga uívua o fuma ia Jezú.

² Hé u ambela jiselevende jê, uixi: nuka mu ʼalunga; kiene kia mu kaiesa, ni jinguzuʼiji ja kubhanga isuma iosuʼ iii.

³ Kuma Helode ua kuatele Nzuá, iu ua mu kutu, ua mu tesa mu ʼaleia, mukonda dia Helodiia, mukaji a phangʼié Felipe.

⁴ Mukonda o Nzuá dia Batizu ua mu ambelele, uixi: Eie ku tokala kusakana ni muhatuʼa phangʼiê!

⁵ O kiejile ku mu jibha, ua kexile ni uôma ua mundu, mukonda o Jijundé a mu xikana kuma polofeta.

⁶ Kutula-phe bhu kizuua kia Helode, kia kutenesa mivu, monʼa Helodiia ua muhatu u kala mu kina mu ʼaxaxi-kâ, Helode anga ki mu uabhela.

⁷ Bhenhobho anga u mu ambela ni kulôka, kuma ioso ia mu bhinga u mu bhana-iu.

⁸ O muène kuma a mu longesa kiá kuala manhâ, uixi: Ngi bhane kindala bhenhabha, bhu dilonga, o mútue ua Nzuá dia Batizu!

⁹ Muenexi anga u kenanana. Maji mukonda-phe dia kulôka kuê, mukonda ue dia iá a xikama-nê ku meza, u tuma ku mu bhana-u.

¹⁰ Anga u katula muthu kuia ku batula mútue ua Nzuá dia Btizu mu ʼaleia.

¹¹ Mútue uê anga a u bheka bhu dilonga, hé a u bhana monʼa kilumba, muène anga u u bheka kua mamʼâ.

¹² Jixibulu jê anga jiza, ji zangula o kimbi, ji mu funda; anga aia ku ki tangela Jezú.

Jezú u disa o midi jitanu ja muthu

¹³ Kienhókio Jezú kia kʼivu, u katuka mu ixi ioio, u endela mu bote, anga uia ku matutu, ku kididi kia ubheka. Kifuẋi-phe kia kʼivu, a mu kaiela bhoxi, a tundu mu jimbonge joso.

¹⁴ Jezú anga u tomboloka, u sanga kifuẋi kia dikota, anga u a kuatela henda, hé u saka o jihaxi jâ.

¹⁵ Kutula mu ngoloxi, jixibulu jiza kua muène, exi: Kunu mu iangu mu tuala, o dikumbi diaii. Sulula o ifuẋi ni aie ku jisanzala, mbé a sumbe mákudia.

¹⁶ Kuala Jezú: Ene ka bhingi ngó kuia; enuenu a bhanienu kúdia.

¹⁷ Exi: O bhabha tuala-bhu ngó ni mbolo jitanu ni mbiji jiiadi.

¹⁸ Kuala muéne: Ngi bhekelienu naju!

¹⁹ Muène anga u tuma mundu kuxikama bhu iangu. Hé u katula o mbolo jitanu, ni mbiji jiiadi, u tala ku diulu, u sakidila Nzambi, anga u kuata kubhasujula o jimbolo ni ku ji bhana jixibulu, ene hé a kala mu ji uanena o mundu.

²⁰ Ene oso anga a dia, ekuta. Ku ibhasu ia subhujuka, maxibulu anga a nona-ku kuinhi dia ngalu ni jiiadi jezala.

²¹ Enhá adi, a tena midi jitanu ja mala; o ahatu ni anandenge engi.

Jezú uendela kù thanduʼ a menha

²² Kithangana kienhókio Jezú anga u bhinjika jixibulu jê ku di longa mu bote, ni ku mu tuamenena ku sámbua, kioso muène kia xala mu sulula ifuẋi.

²³ Kia zubha ku sulula o ifuẋi, uia ku mulundu, ku ubheka, mu kusamba. Mu ngoloxi, kuma kua fulamana kiá, anga u kala kuenhoko ubheka uê.

²⁴ Kiosuʼiki-phe o bote ieza kiá mu ʼaxaxi ka kizanga, a tate ni mafuta, mukonda ala mu bhânga ni kitembu.

²⁵ Mu kilangidilu kia kauana kia usuku, kuila kizuua kia di te kiá bhoxi, muène anga u a sanga, uala mu kuendele ku thanduʼ a menha.

²⁶ Jixibulu kia mu mono, uala mú kuendele ku thanduʼa menha, miẋima ia a titila, exi: Kiki kilulu; anga a di kola ni uôma!

²⁷ Kienhokio-phe Jezú u a zuelesa, uixi: Tululukenu, eme! Ki mu kale ni uôma!

²⁸ Phetele anga a mu kumbulula, uixi: Ngana, ki ki kala eie-muène, ngi tume ngi ku sange koko, ku thanduʼa menha.

²⁹ Kuala muène: Izá! Phetele anga u tuluka mu bote, u kala mu kuenda ku thanduʼa menha, uala kuia kua Jezú.

³⁰ Maji kia mono o kitembu kia nguzu-phe, uôma ua mu kuata. O ki andeka kuboba, u di kola uixi: Ngana, ngi kudile!

³¹ Kindala kienhókio Jezú u sunununa lúkuaku luê, u mu kuata, anga u mu ambela, uixi: Eie ua tolo o kuxikana, phata ia ku kuatela-hi?

³² Kia zubha kiiadi kiâ ku di longa mu bote, kitembu ki di xibha.

³³ Maxibulu oso ala mu bote anga a mu bheza, exi: Kidi kiene, eie u Monʼa Nzambi.

Jezú u saka mu Jenezalé

³⁴ Kutula ku sámbua kunhá, a kuaka bhu oxi ia Jenezalé.

³⁵ Akua-xi koko, kia zubha ku mu ijiia, a bhana jingolokela kʼoxi ioso, anga a mu bhekela jihaxi joso.

³⁶ Ánga a mu dionda phala a mu kuate ngó ku muxiku ua thanga iê. Oso-phe a mu kuata, anga eluka.