Matesu 12 - O Mikanda Ikola

Jezú muene Ngana ia Sabhalu

¹ Bhu thembuʼ obho, kizuua kia sábhalu, Jezú u kala mù bhita mu mábhia ma masa. Jixibulu jê, kuma nzala ia a kuata, a kuata kubukula masa ni ku a dia.

² Jifalizeu-phe kia ki mono, a mu ambela, exi: Talesa, jixibulu jé jí bhanga kimbamba kikôla mu Kitumu ku ki bhanga kia sábhalu!

³ Kuala muène: Enu kiluua mu tanga kia bhangele Davidi, muène ni akuá a kexile-nê, kia a kuatele nzala?

⁴ U bokona ni akuá mʼ onzo ia Nzambi, anga u dia jimbolo ja sata, jene ki ji mu tokala ku ji dia, mba akuá, mbata jangene ja jinganga?

⁵ Inga mu Kitumu kia Mozé kiluua mu tanga-mu kuila jinganga mu tembulu ji fula o kunhoha mu kizuua kia sábhalu, maji ki ji kala ni kituxi?

⁶ Ngi mi ambela-phe, kuila bhenhabha sai-bhu ua tundu o Tembulu.

⁷ Enu se mua kʼijidile kioso ki kia jimbulula mu Mikanda Ikôla, kuila: Nginda o kukuatela mukuenu henda, ki ngindi sata, hinu ki mua tena kulongolola athu a kambe kikuma.

⁸ Mbata Monʼ a Muthu ngana ue ia kizuua kia sábhalu.

Jezú u saka muthu ua kukuta o lúkuaku. O kulenduka kua Jezú

⁹ Bhenhobho anga u tunda-bhu, uiza mu dilombe diâ. Talesa, muenhomo mu kala diiala dia kukuta o lúkuaku.

¹⁰ Anga a mu ibhula, exi: O kusaka muthu mu kizuua kia sábhalu ki kôla mu Kitumu kietu, inga kana? Ienhiʼ ii ndunge iâ ia ku mu tatela.

¹¹ Kuala muène: Muthu uebhi mudienu, u kala ni mbudi, anga i di bhala mu dikungu kia sábhalu, muène nʼ a kambe ku i zaúla?

¹² Ni muthu-phe ni mbudi, kífua muthu kala kotʼ èlele? Uila kiki, o kubhanga mbote mu kizuua kia sábhalu, kʼeie kuma ua tondala Kitumu, kana!

¹³ Anga u ambela o diiala, uixi: Sunununa o lúkuaku lué. Muène anga u lu sunununa, hé lu di sanza kala o lúkuaku luê luamukuâ.

¹⁴ Jifalizeu anga ji katuka, aia ku mu tela kionge kia kioso kianda ku mu jibha.

O selevende a mu solo Nzambi

¹⁵ Jezú-phe, kuma ua kʼijiia, u tunda bhenhobho. O mundu uavulu anga u mu kaiela, muène anga u a saka ene oso.

¹⁶ U kala-phe mu ku a tendelela kuila ka mu fumanese;

¹⁷ phala ni ki tenene kia tangele polofeta Izaia, uixi:

¹⁸ Talesa selevende iami nga mu solo; mukua henda iami ua ngi uabhela muẋima; ngi ta Nzumbi iami ku thandu diê, a kà bheke kufundisa kua kidi ku matumbu.

¹⁹ Ka kale mukua jimvunda, mba mukua kudikola, dizui diê kà dʼivua mu nzunga.

²⁰ Dithethele dióxine muène ka di tolola, muanga u xongota kà u jima, katé kià tubhula kufundisa kua kidi, nʼa lende kíkoue.

²¹ Matumbu a kà dielela mu dijina diê.

O dikongo dia Jifalizeu

²² Kienhiki a mu bhekela muthu uala ni dimonho, uala kifofo, uala dibubu, Muène anga u mu saka, o ua kexile kifofo, dibubu, u kala mu zuela, u kala mu mona.

²³ Athu oso anga a diuana, exi: Kífua, ki muenhú Monʼa Davidi?

²⁴ Jifalizeu-phe kia kʼivu, exi: Ialʼó kukaia o madimonho, mukonda ua tokala ni Belezububu, dikota dia madimonho.

²⁵ Jezú-phe kuma uejiia ioso iala kubanza, uixi: Kilômbo kioso kia sobha se kia di balukila ene mudiâ, kindala ki muangana; mba sanzala ioso, mba dibhata, se a di balukila ene mudiâ, dibhata diodio ki di tungu.

²⁶ Satana se uala ku di kaia muene Satana, iú ua di balukila muène, kilômbo kiê ki tunga kiebhi?

²⁷ O ki kala eme ngi kaia madimonho mu nguzu ia Belezebubu, anʼenu ene ku ma kaia mu nguzu ia nanhi? Benhobho ene a mi tetuluile.

²⁸ O ki kala-phe ngi kaia madimonho mu nguzu ia Nzumbi ia Nzambi, ijiienu-kiu-phe kuma Utuminu ua Nzambi ua mi tukulukila.

²⁹ Inga muthu u bokona kiebhi mʼonzo ia dizonda, mu ku mu bhûnda imbamba iê, se ka dianga kukuta hanji o dizonda, nʼa bhûnde kiua o dibhata diê?

³⁰ Uoso ka ngi bande, ua ngi zembe; o uoso ka bhongolola ni eme, u muanga.

³¹ Uila kiki, ngi mi tangela: Kituxi kioso mba kuxinga kua xinga Nzambi, athu a kà a loloka. Maji o kuẋonguena Nzumbi Ikôla-phe athu ka kà a loloka-kiu.

³² Uoso u xinga Monʼa Muthu, a kà mu loloka-kiu. Maji uoso-phe u xinga o Nzumbi Ikôla, ka kà mu loloka-kiu, né ku muenhu iú, né ku muenhu ua hádia.

O muẋi ni ibundu iê

³³ Kikale o muẋi mu u mona kuuabha, ni ibundu iê iauabha; mba mu mona o muẋi kuiibha, ni ibundu iê iaiibha; mbata muẋi a u ijidila ku ibundu iê.

³⁴ Enu mu muiji ua madiuta! Mu tena kiebhi, ki mua iibhʼiki, o kuzuela ima iambote? Mbata kioso kiezala mu muẋima, kiene ki zuela o dikanu.

³⁵ Muthu uambote, ku dilundilu diê diambote, u tubhula ima iambote. Muthu uaiibha, ku dilundilu diê diaiibha, u tubhula ima iaiibha.

³⁶ Ngi mi ambela-phe kuma, maka moso ma ulalu ma tanga athu, a kà ma bhela konda mu kizuua kia kufundisa.

³⁷ Mbata mu maka mé hádia muene mu ua kà lungila, mba mu maka mé muene mu uʼêlele.

O kisumua kia Jona

³⁸ Amoxi-moxi ku asoneki ene mu longa o Kitumu, ni ku jifalizeu, anga a mu kumbulula, exi: Mesene tua mesena tu mona kisumua ki u bhanga.

³⁹ Muène-phe u a vutuila, uixi: Muiji ua akua-phulu, ua akua jiphànda, ua bhindamena kisumua! O kisumua-phe ka a bhana-kiu, kikale ngó o kisumua kia polofeta Jona, kuabhu!

⁴⁰ Mbata mukuâ ni kia kexile Jona makumbi ma tatu ni mausuku ma tatu mu mala a kimbiji, ni Monʼa Muthu ue ua kà bhanga makumbi ma tatu ni mausuku ma tatu koxi a mavu.

⁴¹ Mu kizuua kia kufundisa, akua Ninive a kà funda ni muiji uenhú, nʼa u belesa; mbata kiene kievile ngó o maka ma Jona, ituxi iâ a i diela. Bhenhabha-phe sai-bhu ni Iú ua tundu Jona!

⁴² Sobha ia Sulu ia muhatu mu kizuua kia kufundisa ua kà balumuka mu ku funda ni muiji uenhú, nʼa u belesa; mbata muène ua tundile kua suku oxi, hé uiza mù kuivua o unjimu ua Solomá. Bhenhabha-phe sai-bhu ni iú ua tundu Solomá!

O nzumbi ia bôlo ki i vutukila muthu

⁴³ O nzumbi iabôlo-phe ki i tunda moxi dia muthu, i bhita mu ididi iakukuta ni kusota dinhohenu, maji ka di mono.

⁴⁴ Uixi-phe: Ngi vutuka, ngiia mʼonzo iami mu nga tundile. O kia zubha kuvutuka, u sanga ki muala muthu, maji muòkombe, muòiudike.

⁴⁵ Bhenhobho uia, u sota dingi sambuadi dia nzumbi, a mu tundu muène mu kuiibha, anga a bokona, a tunga momo. O kikexilu kia sukidila kia muthu ió kia beta dingi o kuiibha, kikexilu kiadianga ndenge! Kienhiki kiene hinu ki bhita ni muiji uenhú.

O jiphange ja kidi ja Jezú

⁴⁶ Kiosuʼiki kia kexile kuzuela hanji ni mundu, talesa mamʼâ ni jiphange jê a tula bhu kanga, a mesena kuzuela-nê.

⁴⁷ Anga bhu kala muthu u mu ambela, uixi: Tala, mamʼenu ni jiphange jé iá bhu kanga, a mesena ku ku zuelesa.

⁴⁸ Muène-phe u vutuila uoso ua mu ambela, uixi: Mamʼetu nanhi, phange jami akua-hi?

⁴⁹ Anga u sunununa lúkuaku luê kuala o jixibulu jê, uixi: Talenu mamʼetu ni jiphange jami.

⁵⁰ Mbata uoso u bhanga o vondadi ia Tata iami uene mu diulu, muène phange iami ia diiala, muène phange iami ia muhatu, muène mamʼetu.