Matesu 11 - O Mikanda Ikola

Nzuá u tuma Jixibulu jê kua Jezú

¹ Anga ki bhita, kia zubha Jezú kutuma kuinhi dia xibulu jê ni kiiadi, u katuka bhua kexile, hé uia mu kulonga ni kuta maka ku mabhata-mâ.

² Kiki kievu Nzuá mu ʼaleia ikalakalu ia Kristu, u tuma jixibulu jê ku mu ibhula, uixi:

³ Eie-muène ió tuene ku mu kinga, inga tu tala dingi uengi?

⁴ Jezú anga u a vutuila, uixi: Ndenu mua kà tangele Nzuá o ima i muívua, i mu mona:

⁵ O ifofo ií tona mesu, inema ií ienda, jihaxi ja dibhute jí jiluka, mixilu ií ívua, madifundu iá a fukunuka, o jingadiama a ji tangela o maka ma Njimbu Iambote.

⁶ Uazediua ió uoso ka di bhukana mukonda dia kima kia mono ko-kuami!

⁷ O maxibulu ma Nzuá kia zubha ku muangana, Jezú u kuata mu kuambela kifuẋi mukonda dia Nzuá, uixi: Ku ditutu muele kulonda-ku ihi? Dithethele di diieba ni kitembu?

⁸ Ihi-phe i muele kulonda? Diiala dia zuata izuatu ia matunda? Talesa, a zuata izuatu ia matunda a kala mu jimbanza ja jisobha.

⁹ Ihi-phe ia mi bhekele-ku? Ku talesa polofeta? Eué! Eme ngi mi ambela hanji, kuila polofeta ndengiʼ èlele.

¹⁰ Muenhú a mu soneka, exi: Talesa, ngi tuma mukunji uami ku pholo ié, u ku tuamenena mu ku kuiudikila o njila.

¹¹ Ngi mi ambela kidi, kuma mu athu oso a a vuala ku ahatu, kiluua ku zangalala muthu ua tundu Nzuá dia Batizu. Uoso-phe uala-mu ndenge mu Utuminu ua Diulu, muenhó uala kota diê.

¹² Tunde mu izuua ia Nzuá dia Batizu, o Utuminu ua Diulu a u balukila, akua nguzu a u bokona ni kusuina.

¹³ Mbata o jipolofeta joso ni Kitumu kia Mozé a longele Utuminu ua Nzambi katé bhua Nzuá.

¹⁴ Se mu ki xikana, Nzuá muene Elija a mu kingile kuiza.

¹⁵ Uoso uala ni mátui ma kuivila, évue.

¹⁶ O muiji iú-phe lelu ngʼ ila ua difangana kiebhi? Ua difangana ni anʼ andenge a nanga bhu itanda, âmba akuá, exi:

¹⁷ Tua mi xikila mimbu ia ubhanga, enu nguenu kukina! Tua mʼ imbila mimbu ia thambi, nguenu ku dila!

¹⁸ Kuma Nzuá uejile sé kúdia ni kúnua, athu anga amba, exi: Uala ni dimonho.

¹⁹ Monʼa Muthu-phe ueza ni kúdia ni kúnua anga amba, exi: Talenu kidiakhaji, hôlua, kamba dia akua kutambula lubhaku ni akua ituxi. Maji o Unjimu-phe a u tongolola kuala anʼ a Nzambi.

O Madiembu ma tatu ma xibhaka

²⁰ Jezú muene anga u kuata kulongolola jimbonge mua bhangele o ikalakalu iê iavulu ia nguzu, mukonda dia ene kufula kudiela, uixi:

²¹ Eie Kolazine, lamba dié! Eie Betesaida, lamba dié! Mukonda o isuma ia di bhange momué, se a i bhangele mu Tilu ni mu Sidónia, hinu a dielediâ ukulu, anga eha o ituxi iâ. O mu ku londekeza kuila a diela, eji kuzuata jisaku ni ku di kuua uthôkua mu mítue!

²² Ngi mi ambela-phe kuma, inda Tilu ni Sidónia, Nzambi ua kà a lendukila mu kizuua kia kufundisa, enu kana!

²³ Eie u Kafanau kífua ua zangalala katé ku diulu? A kà ku tulula katé muʼ alunga! Mukonda o isuma ia di bhange mo-mué, se a i bhangele mu Sodoma, hinu ia nange katé ni lelu.

²⁴ Ngi mi ambela-phe, inda o mbanza ia Sodoma, Nzambi ua kà beta ku i lendukila mu kizuua kia kufundisa, eie kana!

O jungu ia Jezú

²⁵ Kumbi dienhódio Jezú anga u kumbulula, uixi: Nga ku ximana Tata, Ngana ia diulu ni oxi, mukonda imʼ iii ua i sueka, jinjimu ni adimuka ka i mono, maji ua idikiza anandenge.

²⁶ Kiene bá Tata, kuma kiene kia ku uabhela kubhanga!

²⁷ Ima ioso a ngi bhana-iu kuala Tata iami. O Mona kana muthu ua mu ijiia, inda Tata ngó ua mu ijiia; Tata ue kana muthu ua mu ijiia, inda o Mona ngó ua mu ijiia, ni ió uoso Mona u sola ku mu idikiza-nê.

²⁸ Zenu kokuami enu oso mua bhuila, enu mua tate ni imbamba ia mi nemena, eme nda ngi mi nhohese.

²⁹ Di tuikienu jungu iami, mu di longe ko kuami; mbata eme nga belesela, nga batama muẋima, nda mu mone kutululuka kua jinzumbi jenu.

³⁰ Mbata o ima iami ioso i ngi mʼ inda na-iu, ki i bhonzo; o kimbamba kiami ki ngi mi tuika, kia bhebhuluka.