Matesu 10 - O Mikanda Ikola

Jezú u katula o kuinhi ni kiiadi, ni ku a tuma ku ukunji uâ

¹ Muène anga u ixana kuinhi dia xibulu ni kiiadi, anga u a bhana nguzu ia kutumina jinzumbi jaiibha, ku ji kaia, ni kusaka mahaxi moso ni makukata moso.

² O majina mâ kuinhi dia poxolo ni kiiadi menhama: Ua dianga Ximá, a mu ixana Phetele, ni phangʼ iê Mandele; Tiiaku, monʼ a Zebedeu, ni phangʼ iê Nzuá;

³ Felipe ni Matulu; Tomé, ni Matesu dia mukua kutambula lubhaku; Tiiaku, monʼ a Lufeu, ni Tadeu.

⁴ Ximá, mukua Kanana, ni Juda, mukua Kadiota, uanda ku mu tunda ufe.

O ukunji ua kuinhi dia Poxolo ni kiiadi

⁵ Kuinhi dienhidi ni kiiadi, Jezú ua katula ni ku a tendelela, uixi: Kana kuia mu njila ia akua jixi jengi, kana kubokona mu mbonge ia akua Samádia.

⁶ Kikale-phe muia ku jimbudi ja jimbidila ja dibhata dia Izalaiele.

⁷ O ki muia, muenda ni kuta Maka, kuila: Utuminu ua Diulu ua zukama.

⁸ Sakenu jihaxi, fukununenu madifundu, disanzesienu akua dibhute, kaienu madimonho. Mua tambula ngoho, bhanenu ngoho.

⁹ Kana kuambata ulu, mba phalata, mba ngòndo mu jiphonda jenu.

¹⁰ Kana kuambata ue muxila, phala mu njila, mbinza ki ji kale jiiadi, jisabhatu kana, mbangala kana; mbata mukalakadi kene ku mu imina o kúdia kuê.

¹¹ Mbonge ioso mba sanzala i mu tula, mu sota uoso mukua ujitu ua tungu-mu; muène mu kala-nê katé ki mu katuka.

¹² Ki mu bokona dibhata, mu di menekena, muexi: O paze i tunge mu bhatʼumu.

¹³ O dibhata se di kala dia athu a ujitu, o paze ienu iiza ku thandu diê; se di kala dia athu a kambe ujitu, paze ienu i mi vutukila.

¹⁴ Uoso ka mi tambulula, mba u kamba kuívua maka menu, ki mu tunda mu inzuʼ oio mba mu mbongeʼ omo, mu a kukumuina fufuta ia inama ienu.

¹⁵ Kidi kiene ngi mi ambela, inda oxi ia Sodoma ni ia Ngomola a kà i lendukila mu kizuua kia kufundisa, mbongeʼ oio, kana!

Jezú ú tendelela o Jixibulu jê. O izukutisu ni jihadi

¹⁶ Talenu, nga mi tundisa kala mu jimbudi mua di lungu ni jimbinji. Muila-phe ni kudimuka kala mu jinhoka, ni kutobha kala mu mêmbe.

¹⁷ Athu-phe mu enda-nâ ni muanu. Mbata ene a kà mi thelekala bhu kionge, a kà mi beta mu malombe-mâ.

¹⁸ Katé muene ni bhu pholo ia jinguvulu ni enexi a kà mi bheka-bhu mukonda diami, mu ku a bhana o umbangi ua Njimbu Iambote, ni ene ni akua jixi jengi.

¹⁹ Enu-phe, kuila a mi kutu, ki mu kale ni hele kioso ki mu zuela, mba hundu ioso i mu kuata, mukonda bhu kumbi dienhódio, Nzambi kiene kia kà mi bhana kioso ki mu zuela.

²⁰ Mbata ki enu dingi mu zuela, maji o Nzumbi ia Tatʼ enu, muène u zuelela moxi dienu.

²¹ Muthu ua kà bhana phangʼ iê mu ku mu jibha, o tata ua kà bhana mona, o ana a kà kitukila tatʼ â ni mamʼâ, nʼa a jibhisa.

²² Enu a kà mi zemba kuala athu oso mukonda dia dijina diami. Uoso-phe u kolokota katè bhu dizubhilu, muène uà bhuluka.

²³ Ki a mi kaiesa mubhakabhaka mu mbonge imoxi-phe, enu lengelenu ku mbonge ia mukuá. Ngi mi tangela kidi, kuila: Jimbonge ja Izalaiele ki mua kà zubha luua ku ji enda, bhuà kejiia Monʼ a Muthu.

²⁴ Xibulu ki i kala kota dia mesene iê, o mubhika ki u kala kota dia ngana iê.

²⁵ Kienhiki, o xibulu kabasa i sokela ni mesene iê, o mubhika kabasa u sokela ni ngana iê. Kia lembela muène mukua dibhata diê, a mu ixana, exi: Belezebubu, akua mbèle iê, a kà exana kiebhi?

Uoso ua tokala ku mu kuatela o uôma

²⁶ Uila kiki, athu ki mu a kuatele-phe uôma. Mbata kana-ku kima kiófute hinu ki kamba kutukuluka, kana-ku kiósueke hinu ki kamba ku kijiia.

²⁷ Ioso i nga mi tangela muʼ avundu, enu tangenu-iu mu muanha uatu; ioso i muʼ evidila ni ku mi fetela mu dítui, dikolienu-iu ku thanduʼ a jinzu.

²⁸ Ki mu kale ni uôma ua iá a jibha ngó o mukutu, maji o muenhu ka u tena ku u tambula. Inda Nzambi mu kuatedienu uôma, kuma ió uasoko-bho kubuikisa ni muenhu ni mukutu mu ifernu.

²⁹ Manhi, tudièdie tuiadi, kala ku tu sumbisa mu mulambongo? Ni kamoxi-ku-phe ngó ki ka laúka bhoxi sé Tatʼ enu ku ki andala.

³⁰ Kuambe dingi enu-phe katé ni jindemba ku mítue ienu a jiʼ aleka.

³¹ Uila kiki, ki mu kale ni uôma. Tudièdie né tua ndumba, enu mua beta ukota.

Kufisala Kristu, ni ku mu dituna

³² Kienhiki uoso u ngi fisala eme bhu pholo ia athu, eme uami ngi mu fisala muène bhu pholo ia Tata iami uene mu diulu.

³³ Uoso-phe u ngi dituna bhu pholo ia athu, eme uami ngi mu dituna bhu pholo ia Tata iami uene mu diulu.

Ki ngeza kubheka paze, maji xibhata

³⁴ Ki mu fikienu kuma ngeza mu bheka paze mu ngongo. Eme ki ngeza mu bheka paze, kana; ngeza mu bheka xibhata.

³⁵ Mbata eme ngeza mu ku bhangesa kuila diiala di di kuata ni tatâ, o mona muhatu u di kuata ni mamʼâ, mukaji-a-mona u di kuata ni ukouʼ ê.

³⁶ Kienhiki muthu, akua dibhala diê, ene a mu kala jinguma jê.

³⁷ Uoso u zola tatʼâ mba mamʼâ, eme ni ngi mu kale ndenge, ió ka ngi tokala eme. Uoso u zola monʼ ê ua diiala mba ua muhatu, eme ni ngi mu kale ndenge, ka ngi tokala eme.

³⁸ Uoso ue u kamba kuzangula dikulusu diê, ni ku ngi kaiela mu ngala ku ila, ió ka ngi tokala eme.

³⁹ Uoso, o muenhu uê ua u bhake, ua-nda ku u jimbidisa; uoso o muenhu uê ua u texi mukonda diami, ua-nda ku u bonga.

O kisakidilu

⁴⁰ Uoso u mi tambululʼ enu, ua ngi tambulula eme; uoso-phe u ngi tambululʼ eme, ua tambulula ió ua ngi tumu.

⁴¹ Uoso u tambulula polofeta mu dijina dia polofeta, ua kà mona kisakidilu kia polofeta; ni ió u tambulula muthu uaiuka mu dijina dia muthu uaiuka, ua kà mona kisakidilu kia muthu uaiuka.

⁴² Uoso ue u bhana-ku muthu ku jindengʼ iji, kopho ngó ia menha ma talala ma kunua, mukonda dia kukala xibulu iami, ngi mi tangela kidi, o kisakidilu kiê ki kià kamba.