Matesu 1 - O Mikanda Ikola

Muiji ua Jezú Kristu

¹ Divulu dia Uvadiue ua Jezú Kristu, monʼa Davidi, monʼa Mbalahamu.

² Mbalahamu u vuala Izake, Izake u vuala Jakobo, Jakobo u vuala Juda ni jiphange-jê.

³ Juda u vuala Peleji ni Zala kua Tamale; Peleji u vuala Hezelone, Hezelone u vuala Alá;

⁴ Alá u vuala Aminadabe, Aminadabe u vuala Nasono, Nasono u vuala Salumono;

⁵ Salumono u vuala Bouaji kua Lahaba; Bouaji u vuala Obede kua Lute; Obede u vuala Jese;

⁶ Jese u vuala sobha Davidi. Davidi u vuala Solomá kua ió ua diangele kukala mukaji a Udiia;

⁷ Solomá u vuala Lebouamu, Lebouamu u vuala Abiia, Abiia u vuala Aza.

⁸ Aza u vuala Jozafate, Jozafate u vuala Jolamu, Jolamu u vuala Uziia.

⁹ Uziia u vuala Jotamu; Jotamu u vuala Akaji; Akaji u vuala Hezekiia.

¹⁰ Hezekiia u vuala Manasa; Manasa u vuala Amone; Amone u vuala Joziia,

¹¹ Joziia u vuala Jekoniia ni jiphange jê bhu thembu ia kumuangana ku Babilonha.

¹² Kutunda bhu kumuangana ku Babilonha, Jekoniia u vuala Salatiiele; Salatiiele u vuala Zolobabele.

¹³ Zolobabele u vuala Abihude; Abihude u vuala Eliiakimi; Eliiakimi u vuala Azola.

¹⁴ Azola u vuala Zadoko; Zadoko u vuala Akimi; Akimi u vuala Elihude.

¹⁵ Elihude u vuala Eliiezale; Eliiezale u vuala Matana; Matana u vuala Jakobo.

¹⁶ Jakobo u vuala Zuze munumeʼa Madiia u vuala Jezú, a mu ixana Kristu.

¹⁷ Kienhiki o muiji, tunde kua Mba lahamu, katé kua Davidi, iala kuinhi dia muiji ni kiuana; o kutunda kua Davidi, katé bhu kumuangana kua uhutile ua Babilonha, kuinhi dia muiji ni kiuana; o kutunda bhu kumuangana kua uhutile ua Babilonha, katé kua Kristu, kuinhi dia muiji ni kiuana.

Uvadiue ua Jezú Kristu

¹⁸ O Uvadiue ua Jezú Kristu-phe, kienhiki: Mama Madiia kia kexile ua xikana kiá kukala mukaji a Zuze, kiluua-phe a di takanesa, a mu sange ni divumu dia Nzumbi Ikôla.

¹⁹ O munumiʼê Zuze, kuma muthu uaiuka, ka mesenene ku mu ta muôndo bhu pholo ia athu, maji ua fikile kuila u mu bhana mukanda ua kusenga, ni ku mu suekesa.

²⁰ Kia kexile hanji mu kubanza imʼiíi-phe, mukunji ua Ngana ua mu tukulukila ku nzoji, uixi: Zuze, monʼa Davidi, kukale ni uôma ua kutambula mukajiʼê Madiia. Mbata o mona a mu imita moxi diê, mona ua Nzumbi Ikôla.

²¹ Muène uanda kuvuala mona ua diiala, eie u mu luka dijina dia Jezú, mbata muène ua kà bhulula athuʼê ku ituxi iâ.

²² Kiene kiosuʼiki kiabhiti, o maka ma Ngana ni matenene, ma tangele kua polofeta, uixi:

²³ Talesenu! Ku kala muhatu ua mon-ndenge uimita hé u vuala mona; O dijina diê, a kà mu luka Imanuuele. Dienhidi, ku di jimbulula, edi: Nzambi tuala-nê.

²⁴ Zuze, kia fundumuka ku kilu, u bhanga ki a mu tumu o mukunji ua Ngana, anga u tambula mukajiʼê.

²⁵ Muène-phe ka mu ijididiê luua, katé kia zubhile kuvuala mona. Anga u mu luka o dijina dia Jezú.