Matendelelu 9 - O Mikanda Ikola

Mozé ulembalesa akua Izalaiele o kulongolola ni kuxibhaka kuâ

¹ Ivua, eie Izalaiele, kuma leluʼidi Njolodá mua-nda ku mu zaúka enu mua-nda kúvua ifuẋi ia miji ia mi tundu; o kusuina kuâ kota, o kuenu ndenge; ni jimbonge jamakota, jala mu imbaka iatuta katé ku maúlu.

² Mua-nda kúvua mundu ua nzungule, athu onéne a lebha kitala, anʼa Anake, enuʼenu-phe mua ejiia, kuma muene ku a evua kiá; mbutu ia mazonda iala kiókio, mukua-hi u ki sesa o kuzangalala bhuemana ene?

³ Tumenu-phe ku kʼijiia, kuma lelu muene, Jihova Nzambi ienu, ua kà mi tuamenena ku pholo; muene-phe ua di bhanga túbhia tua muzukuta tu buikisa, ua-nda ku a tolola, enu anga mu a tundisa lusolo ni ku a jima o mbutu kala kia zuela Jihova.

⁴ Kioso-phe kia-nda ku a muanga kuala Jihova Nzambi ienu, enu anga a mi bhua ku mesu, ki muile ni miẋima ienu, muixi: Jihova ua tu mono tu athu ambote, kiene kia tu tudila mʼoxi iii phala i kale ietu, ki kiene; maji o ituxi ia ifuẋi iii, iene-ku ia bhangesa Jihova ku a kaiesa-mu.

⁵ Ka ki bhangela mukonda dia kuuabha kuenu, mba mukonda ua mi mono ni muxima ualùngu kua muene; kana. Maji o ituxi ia ifuẋi iii, iene-ku iabhangesa Jihova Nzambi ienu ku mi kaiela-u; mbé o kuxikika o kikutu kia lokela Jihova Nzambi ienu ku jitata jenu, a Mbalahamu, ni Izake ni Jakobo.

O kuxibhaka kua anʼa Izalaiele

⁶ Tuma-phe ku kʼijiia kuma ixi ia iuka kiki, o ku mi bhana-iu, Jihova Nzambi ienu ka ki bhangela ku mi mona kuuabha, kuma enuʼenu mua huku, mua ngangamana jixingu.

⁷ Xinganekenu, ki ki mi jimbe ki muakexi mu kulokalala njinda ia Jihova Nzambi ienu mu kikangalakta; tunde mu kizuua ki mua tundu mu Ijito, katé bhu kididi bhu muezʼabha, mua di bhanga jinga mu axibhaki a hatu, bhu pholo ia Jihova.

⁸ Kuma njinda ia Jihova ia uamene kiá ki mua mu lokalala bhu Holebe, anga ku kamba ngó bhuôfele ku mi jima o mbutu.

⁹ O ki nga bandele ku mulundu mu kutambula mabaia ma matadi mabaia ma kikutu kia mi bhana Jihova, anga ngi bhanga-ku makuinhi auana a makumbi, ni makuinhi auana a usuku, anga ngi kalaʼmi muene kienhókio ki bhua kudia mbolo, ki bhua kúnua menha.

¹⁰ Jihova anga u ngi bhana mabaia maiadi ma matadi, mʼòsoneke ni mulembu ua Nzambi; ima ia soneka-ku ene o maka ma mi tela Jihova ku mulundu, kia kexi mu kuzuela muʼaxaxi ka túbhia, bhu kizuua kia kuila mundu uoso ua tenena.

¹¹ Kuila makuinhi auana a makumbi ni makuinhi auana a usuku abhu, Jihova kiene kia ngi bhana o mabaia maiadi ma matadi, mabaia ma kikutu.

¹² Bhenhobho Jihova, anga u ngʼambela, uixi: Balumuka, kulumuka muene lusolo, mbata o mundu ué u ua katula ku Ijito, a dianguka kiá; o njila i nga a xindile ka nange-mu, a i xi kiá kindala kienhiki; a di iudikila kiteka kia kuzunza.

¹³ Jihova anga u ngʼambela dingi, uixi: Talesa, o kifuẋi kiki, nga a mono kuila kifuẋi kia bhukumuka, a thathamana jixingu.

¹⁴ Ngʼambule ngʼa buikise, phala o dijina diâ ngi di jimune, bhoxʼa diulu dibhue-bhu; Eie-phe ngi ku bhange u muiji uabeta kusuína ni kuvula, o iú ndenge.

¹⁵ Kienhokio-phe eme nga biluka, anga ngi kulumuka o mulundu; o mulundu-phe iu ufuáfua túbhia; o mabaia maiadi ma kikutu eme-nâ bhu maku mami maiadi.

¹⁶ O ki ngi talesa, nga mono kuila, kidi, muazange! Jihova Nzambi ienu mua mu te kituxi; kuma mua di iudikila kangombe ka utadi ua kuzunza! njila ia mi xindilile Jihova ki mua nange-mu, mua i xi.

¹⁷ Eme bhenhobho mabaia maiadi nga ma takula bhoxi, nga ma budile muene bhu mesuʼenu a kutala.

¹⁸ Anga ngi diʼumba bhu pholo ia Jihova, kala ki nga tuamene kiá kubhanga, ngi mukua makuinhi auana a makumbi ni makuinhi auana a usuku, ki bhua kúdia mbolo, ki bhua kúnua menha; dilamba diosoʼidi-phe kia di bheka o mulonga ua kituxi kienu ki mua lokalala na-kiu Jihova, ni ku mu thathamesa.

¹⁹ Mukonda uoma ua ngi kuatele muene, ki nga mono kioso kia thathamana Jihova, ni kuila uixi: Ngʼa jima o mbutu. Maji tata-phe, kienhokio Jihova ua ngʼivu hanji dingi luamukuá.

²⁰ Anga Jihova u lungulukila ue Alá phala ku mu buikisa, kuma ua mu thathamesa ue, maji Alá ue nga mu bhela musambu bhenhobho.

²¹ Nga zangula o kikalakalu kia kituxi kienu, o kangombe ku mua iudikile, nga ka jikatesa mu túbhia, nga ka tuzala katé ki ka kituka fufuta; o fufuta iê eme nga i texe mu kahonga ka tundu ku mulundu.

²² O bhu Tabela, ni bhu Masá ni bhu Kiboloto-Hatava, ni ku jimbandu joso ku mua bhiti, Jihova mua mu lokalala jinga ue kiaiibha.

²³ O kioso Jihova kia mi tumine ue bhu Kadexi-baneia uixi: Bandenu kiá mu lundule oxi i nga mi bhana, enu Jihova Nzambi ienu mua mu bhukumukina, o ku mu xikana nguenu, o dízui diê mua di xibhaka!

²⁴ Xi! Kífua tunde kiá bhu kizuua ki nga mʼijiia, katé ni lelu, enu Jihova Nzambi mua mu bhukumukina muene kienhiki.

Mozé u diondela o mundu

²⁵ Anga ngi fukama bhu pholo ia Jihova mu makuinhi auana a makumbi ni makuinhi auana a usuku, mukonda Jihova uambele kiá ku mi buikisa.

²⁶ Eme-phe hé ngi sambela Jihova, ngixi: Ngana Nzambi, Nzambi tata, ku ki bhange kubuikisa o povo ia tokala undundu ué, povo i ua kula ni unéne uoso, Eie ua i jituna ku Ijito, ni lukuaku lua undanda.

²⁷ Xinganeka u lembalale Mbalahamu, ni Izake ni Jakobo o jiselevende jé; o povo i kola muxima kiki ku i landukile, o phekalu iâ kana ku i ta muxima, kana kusuua o mulonga ua kituxi kia ku te.

²⁸ Mukonda kia-nda kubhangesa-phe, akua-jixi, ku ua tu takanʼoko, enda ni kuzuela, exi: Jihova ua lémbua ku a bhiẋidisa mʼoxi ia a tangelele, mbe muene ue ua di-kumu-nâ, iú ua a takana kunu phala ku a jibhila mu kikangalakata.

²⁹ Suke kiene, ene-phe hanji ene o povo ié, ene undundu ué u ua katula ni undanda ua lukuaku lué lua suína.