Matendelelu 8 - O Mikanda Ikola

Anʼa Izalaiele a a tendelela kulembalala ji mbote ja Jihova

¹ Ijila ioso i ngala ku mi tuma kizuua kia lelu, mu i kuata muene phala mu i kumbidile, mbé mu laie nda mu sokoloke, phala mu bokone mu kúvua ixi ia plometela Jihova ku jitata jenu ni mulôko.

² Xinganeka phala u kale mu lembalala njila ioso ia mi bhitisa Jihova Nzambi ienu, mu makuinhi auana a mivu osoʼâ mu kikangalakata, phala a mi bateke, nda a mi lole, mbé o kuijiia kioso kia mi kala ku miẋima moxi, mba mu xikina kutumaka ijiia iê, mba kana.

³ Muene ua mi bateka, ua mi ehela kukala ni nzala, iu ua mi disa ni maná, enu nuka mua ijidile, né jitata jenu ue ka ijidile; phala ku mʼijidisa kuila muthu ka laiela ngó ku mbolo, maji ku ima ioso i tunda ku dikanu dia Jihova kuene kulaiela o muthu.

⁴ Izuatu ienu ki ia kuka ku mukutu, inama ienu ki ia jimbi ni kuenda, mu makuinhi auana a mivu osoʼá.

⁵ Mu ki xinganeka ni miẋima ienu kuma, mukuâ ni tata kia beta monʼê, kiene ue Jihova Nzambi ienu kia mi beta enu.

⁶ Kala kiki, mu kuata ijiia ia Jihova Nzambi ienu, muenda jinga njila iê, mu kala ni uoma uê.

⁷ Mukonda Jihova Nzambi ienu uala ku mi bheka ixi iambote, ixi ia jingiji ja menha, ni jithu ji bhana menha ma kunguluka mu jihonga, ja tundu mu kaẋi ka milundu ni makôlo.

⁸ Ixi iima tiliku ni sevada, ia mivide ni mifiku ni miẋi ia jilomá; ixi ia midiva ni nzungule ia maji ni uiki;

⁹ ixi ia bhingi u dila-mu o mbolo hé i ku kuma, momo ku kalé ni ukambu ua kima; ixi ia bhingi matadi mê ma felu, o ku milundu iê kuene ku mu kanda o ngôndo.

¹⁰ Kioso ki mua kà dia hé mua kèkuta, mua kà ximana Jihova Nzambi ienu, mukonda dia ixi iambote ia mi bhana.

Kudimuna oso a jimba Jihova

¹¹ Alukenu-phe, ki mu landuke Jihova Nzambi ienu, anga mu takuila o ijiia iê bhoxi, ni mabatuilu mê, ni jingonge jê ji ngala ku mi tendelela leluʼidi.

¹² Phala o ki mu zubha ki di dikila kiambote hé mu ikuta, ni ki mu zubha kutunga jinzo jambote, ja matunda, anga mu ji bokona muene anga mu kala momo;

¹³ o ki mu mona kuila jingombe ni jimbudi ja di sokolola, o phalata ni ulu ia di bandekeza, anga mbote jé joso ji di lunjika,

¹⁴ kana-phe ku di zangeleka miẋima ienu, ni mu jimbe Jihova Nzambi ienu, ua mi katula kʼoxi ia Ijito, ku dibhata dia ubhika.

¹⁵ Kuma Muene ua mi endesa mu kikangalakata kiosuʼokio, kikangalakata kia dikota ki kuatesa uoma, kiezala jinhoka ja uama túbhia ku maju, ni jinvuanga, ixi ia kikaku, ia bhingi menha ka moneka, anga a ku katuila menha ku ndanji mu ditadi phala eie kúnua.

¹⁶ Muene ua ku dikila ni maná mu kikangalakata, maná ia kambele adiʼenu ku iʼjiia, phala ku mi tululula ni ku mi lola ni jingongo ja vulu mbé ku dizubhilu a mi bhange o mbote.

¹⁷ Sumba muà kela mu miẋima ienu muixi: Mu nguzu ietu ni kusuina kua maku metu, muene mu ejiia o umvuama uoso uenhú.

¹⁸ Kana-phe! Inda mu lembalala jinga, kuma Jihova Nzambi ienu muene ua mi bhana o nguzu ia kumona o kuzediua kuosʼuku; ua ki bhangela-phe phala kuxikika o kikutu kia lokele ku jitata jenu kala ki kia di monekena leluʼidi.

¹⁹ Maji-phe kia kà kala kiki kuila, se kua kuiza mudiangu anga ulanduka Jihova Nzambi ié, se u bhana mátui ku nzambi jengi anga uhombokela mahamba, ni ku kuata o ku ma tolokela ni ku ma bheza, leluʼidi nga tange kidi kuila mua-nda kujikinina muene.

²⁰ Mua-nda kujima mbutu, kala Jihova Nzambi ienu kia buikisa o ifuẋi ia akua mundu bhu mesuʼenu; kiene ue muene kia-nda ku mi buikisa, se mu xibhaka o dízui dia Jihova Nzambi ienu.