Matendelelu 7 - O Mikanda Ikola

Sendesa ia akua Kanana ku a jima o mbutu ni ene ni mahamba mâ

¹ Kia kà zubha Jihova Nzambi ié ku ku bokuesa mʼoxi i ua-nda kúvua, anga u ku toluela miji iavulu ia matumbu hé u a kaiesa bhu pholo ié, o sambuadi dia ifuẋi diosoʼidi, akua Mahiti, akua Jijidingaze, akua Mamodi, akua Kanana, akua Mapelezi, akua Mahivi, ni Majebusi, athu a ku tundu mu nguzu ia a ku tundu mu kuvula.

² Anga Jihova Nzambi ié u ku bhakuila-u phala ku a jibha, eie-phe buikisa-u muene, ene oso; kana kuta-nâ kikutu kia ukamba, kana ue ku a kuatela henda;

³ ku di tange-nâ undandu; anʼé a ahatu ku a bhane mu kusakana ni anʼâ a mala; eie ue kana kusola anʼâ a ahatu phala anʼé, a mala;

⁴ kuma enhó asoko-bhu ku hunganesa anʼé a mala nʼa lémbua ku di tuma nʼeme anga a kuata ku bheza jinzambi jengi; kiókio-phe o njinda ia Jihova i mi uamena anga mu jima o mbutu kindala.

⁵ Inda mu a bhanga kiki: Kalatódio jâ mu ji bula-bula, jiphonena jâ mu ji bukujula, o mixitu iâ ikôla mu i koka, o iteka iâ ia kusonga mu i oha mu túbhia.

⁶ Mbata eie ki ualʼokio u povo iangene ia Jihova Nzambi ié; O Jihova. Nzambi ié ua ku tungula muʼaxaxi ka ifuẋi ioso ia tungu kʼulu dia mundʼuku, phala u kale kiá u povo ia mu fuama muene ngó.

⁷ Ki kuila-phe Jihova kifua ua mi sola mukonda mua uabha mba mukonda ifuẋi ioso mua i tunda mu kuvula, lémbue; kuma eiʼmuène u kasule ka ifuẋi ioso mu kutola.

⁸ Jihova muene-ku ua mi te muxima kuma ua mi zola, mu ku kumbidila o muloko uê ua lokela jitata jenu; Jihova iu ua mi katula ni lukuaku luê lua suina, iu ua mi kula ku dibhata dia ubhika ku mua kexile, bhu lukuaku lua Falaó, sobha ia Ijito.

⁹ Tuma-phe ku kʼijiia, kuila o Jihova Nzambi ié muene Nzambi, Nzambi ia Fiiele; muene o mukua ku kumbidila o kikutu kiê kumoxi ni kukuata jihenda ji bhiẋila katé ku midi ia miji ia ió oso a mu zola, ene kualuka ijiia iê.

¹⁰ Muene ue mukua kubhana futu pholo ni pholo kua ió oso a mu zemba, anga u a bhangesa kujimuka muene nzaká! Ió uoso uzemba Nzambi, muene ue ulenguluka ku mu bhana futu iê; ka muehela, kana.

¹¹ Aluka-phe, ijilʼiii ni jingonge ni mabatuilu moso u ngala ku ku lekelela lelu, ngixi, kumbidila-nâ.

O kuzediua ni kubhanduluka kuijiia mu kutumaka

¹² Kià kala-phe kuila, enu o ki mu ivua o mabatuiluʼama, se mu ma bhaka kididi, anga mu ma kumbidila, ni Jihova Nzambi iénu ua-nda kusuina dingi kiengi mu ku kumbidila o kikutu ni kuenda ni ku mi bindumuna kiambote kala kia lokela jitata jenu.

¹³ Muene ua-nda ku ku zola, ua-nda ku ku zediuisa, anga u ku sokolola, katé ni mbutu i tunda mu divumu dié u i bhana ue kuzediua, katé ni mbutu mʼóbhia dié u i ta ue dibesá; ni masa mé ni muvide ni máji mé ni ibhaku ié ia jingombe, ni ilunga ié ia hombo ni mbudi i u kala na-iu mʼoxi ia lokela Jihova kubhana ku jitata jenu.

¹⁴ Ifuẋi ioso bhoxi eie u i tunda mu kuzediua; momuʼé ki mua kà kala diiala dia kisúla ukamba kuvuala, ki mua kà kala muhatu ua mbaku, o ibhaku ié ki i kala ni xidile.

¹⁵ O Jihova u ku saka anga uilukila-ku kiá muene, kuma u kuebhesa ku ma-uhaxi moso; ka ku ehela ku kata uhaxi u difangana ni ma-uhaxi ma akua Ijito, u uejiiʼó; inda ma-uhaxiʼomo ua-nda ku ma tuika oso a ku zembe.

¹⁶ Ifuẋi ioso i mi seiela Jihova Nzambi ienu, enu mu i jikinisa muene; ki mua kuatela henda, kana; o mahámba mâ ki mua a bheze, kuma kienhókio ki di bhanga mubhetu phalʼenu.

¹⁷ Eie-phe, Izalaiele, o ki uila ma muxima ué uixi: O ifuẋi iii ia ngi tunda kiki mu kuvula, nga-nda ku i kaia kiebhi?

¹⁸ Kana, kua a kuatela ngó uoma, Lembalala kioso kia bhange Jihova Nzambi ié kua Falaó ni ku Ijito ioso.

¹⁹ Ni jipolova ja makota jiná ji ua di muena éʼmuène ni mesu mé ni isunji ni madiuanu, ni lukuaku lua suina lua Jihova Nzambi ié lua ku katula na-iu mu Ijito; kiene ue kia-nda kubhanga Jihova Nzambi ié, ku ifuẋi iene iosuʼoio, ia mi kuata uomaʼleluʼidi.

²⁰ O luamukuá-phe dingi, Jihova Nzambi ié ua-nda ku a tumikisa i-madimbuende, katé kia jima o mbutu oso a xialele-ku, anga a ku-bhua ku mesu.

²¹ Ku kale-phe ni u ô ma, anga u teketa mukonda dia ene, mbata o Jihova Nzambi ié uala muʼaxaxi ké, muene Nzambi ia dikota, u kuata uoma!

²² Jihova Nzambi ié, ifuẋi iii ua-nda ku i kaia bhuòfele-bhuòfele, ni kúbhue ku mesu. Ki ualʼokio ku tena ku a bhuikisa mu ola imoxi, o kiókio hé kia bhiti, mʼoxi-phe muavula ku di vuala iama ikuama i sota kubhingana-mu, eie anga u tala na-iu hadi.

²³ Maji o ifuẋi ioso iii Jihova ua-nda ku ku bhakuila-iu, anga u i sengulula katé ia jimi o mbutu.

²⁴ Ua-nda ku ku bhakuila ue o jisobha jâ bhu maku mé phala eie u a jime o majina mâ kulu dia mundu. Ki bhua-nda kukala muthu u di ẋokuesa nʼenu katé Ki u abuidisa.

²⁵ Iteka iâ ia kusonga, ia jinzambi jâ mu i ta mu túbhia; ni phalata ni ulu uoso ua zunzila ku iteka ioio ki i mi kuate luimbi, ki mu i katule ni i mi bhekele kidibukanu ki mi jikinisa; mukonda ima ienhoio kua Jihova Nzambi ienu ufusa!

²⁶ Kana kubokuesa kima kia ufusa ni kisunji mu jinzo jenu; mu di zemba na-kiu muene, phala ki mu di bhekele lufuku ku thadu dienu, anga mu sokela ni ima ienhoio; inda i mi ibhile muene, sondoluele-nu-iu dikanga, mukonda lufuku muene.