Matendelelu 6 - O Mikanda Ikola

O kitumu a ki bhela athu kutumaka

¹ Ienhiʼii-phe iene o ijiia, ni jingonge, ni mabatuilu, a ngi tumu Jihova Nzambi ienu, ku mi longa-u. Imʼiii phala muende ni ku i kumbidila kioso ki mua kà tula mʼoxi i mua-nda kúvua.

² Mbé u kuate kuxila Jihova Nzambi ié, ni kualuka o jingonge ni ijiia iê ioso, i ngala ku ku tendelela, eie, ni monʼé ni mululu ni mulaulʼé, izuua ié ioso i ukala ni muenhu; o mu ku ki bhanga-phe ua kà laia izuua iavulu.

³ Ivua-phe kiambote, eie Izalaiele, tata! ta-ku muene muxima u i kumbidile, nda ubhanduluke kiasoko, u sokoloke muene kala kia ku ambela Jihova, Nzambi ia jitata jé, kioso ki ua kà bhiẋila mʼoxi izunzumuka o lete ni uiki.

⁴ Ivua, Izalaiele, tata! O Jihova, Ngana dia Nzambi ietu, muene Ngana imoxèlele ngó, ka moneka mukuá.

⁵ Zola-phe Jihova Nzambi ié ni muxima ué uoso, ni muenhu ué uoso, ni nguzu ié ioso.

⁶ Maka u ngala ku ku tendelela leluʼidi u ma lunda ku muxima ué.

⁷ Anʼé u a longa muene o ku a bhaka ni ku a kumbidila; o ki u xikama mʼonzo ié, banza maka enhá; o ki u kala mu kuenda njila, enda ni maka enhá; o ki u zeka, zeka ni maka enhá; o ki u balumuka ku kilu, kuata maka enhá.

⁸ A kala ue kidimbu ki ua kutila mu lukuaku lué; u a nhenga muene bhu kaẋi ka mesu mé maiadi, phala a kale kijimbuete ki ua kutila bhu dibhomo dié.

⁹ Soneka-u muene ku thanduʼa mielu ia dibhata dié ni ku mabhitu mé.

O kudimuna axihhaki

¹⁰ Kioso o Jihova Nzambi ie kia ka ku tula mʼoxi ia lokela jitata jenu a Mbalahamu ni Izake ni Jakobo, o ku ku bhana eie, ua kà sanga-mu i-mabhata kʼeie ua itungu iauabha o kuuabha, ia ku tungilʼê kiá!

¹¹ Ni jinzo jezala ni jimbote joso; kʼeie-phe ua jʼizalesa mba ku ji funa, ni ixima iòkande kʼeie-phe ua i kande, ni milenga ia mivide ia bhingi eie ua i sange a i phaphe kiá anga eie udia ngó uikuta;

¹² kienhokio-phe dimuka u di lange, Jihova kà ku-bhue ku muxima hé u mu jimba, Muthu ua ku katula mʼoxi ia Ijito, mu dibhata dia ubhika.

¹³ Enda ni kuxila jinga Jihova Nzambi ié, muene ngó u mu sedivila; o ki ki ku bhinga kuloka, kale ulokela ngó mu dijina dia Jihova.

¹⁴ Kana kukaiela jinzambi jengi, ki mu di tambulule ni jinzambi ja ifuẋi ia mi kondoloka.

¹⁵ Mbata o Jihova Nzambi ienu, Ió ua tungu mu kaẋi kenu, uene Nzambi ia difuba, muendamê ni muanu, phala o njinda ié ki i mi uamene ku thandu, anga i mi jikinisa, mʼoxiʼomo hé mubhua-mu.

¹⁶ O Jihova Nzambi ienu kana ku mu lokalala, kala ki mua mu lokalela bhu Masá.

¹⁷ Kala kiki, kalenu ni muanu ua kualuka o ijiia ia Jihova Nzambi ienu; alukenu ue o ma-umbangi mê, ni jingonge jê jene ku mi lekela.

¹⁸ Ioso iafuama, iauabha ku mesu ma Jihova, Nzambi ienu, iene i u bhanga jinga; nda ukadiê kiambote, ubhanduluke kiavulu, u kutuke mu kúvua oxi ia uabha ioio, ia bhingile mu ku i bhana jitata jé, Jihova ualoka.

¹⁹ Bhene bhua mu tundu o ku kaiesa jinguma, nda ji ku-bhue ku mesu, kala kia ku ambela-kiu Jihova.

²⁰ O monʼé-phe hádia kia kuibhula ku pholo ku ua kʼáia, uixi: O kiki-phe o ma-umbangi mosoʼama ni jingonge ni mabatuilu ma mi lekelela Jihova Nzambi ietu, kima kiahi kienhiki?

²¹ Eie-phe bhenhobho o monʼê u mu ambela, uixi: Tua kexi tu abhika a Falaó mu Ijito. Nguzu kiá ia lukuaku lua Jihova ia bhiti-bhu phala ku tu katula mu Ijito.

²² O Jihova ua bhange isunji ni madiuanu a makota mu Ijitu, kua Falaó ni diembu diê dioso, tua di muena-kiu ni mesuʼetu.

²³ Bhenhobho Iú ua tu tundisa-ku, mbé o ku tu ambata ni ku tu bhana oxi ia lokela o jitata jetu.

²⁴ O Jihova-phe iú ua tu tendelela kuila tua tokala tu kumbidila jinga o jingonge jiji, ni tu kuata kuxila Jihova Nzambi ietu, phala o kubhanduluka kuetu ku nangenene, nda a tu bhane muenhu, kala ki tuala leluʼiki.

²⁵ Kifua-phe o ki tu kuata muanu ua kubhanga itumu ioso ia tu xindi o ijiia iene ioso iii, kala kia tu tendelela Jihova Nzambi ietu, kuene ku tu muena o kulúnga.