Matendelelu 5 - O Mikanda Ikola

O kuinhi dia ijiia

¹ Mozé anga uixana Izalaiele ioso uʼambela, uixi: Îvua eie u Izalaiele, o jingonge ni mabatuilu u ngala ku mi tendelela lelu mu mátui menu, muile ni ku di longa-u ni ku ma lunda, mbé o ku ma bhanga.

² Jihova Nzambi ietu, uate kikutu nʼetu bhu Holebe.

³ O kikutuʼiki ka ki te ni jitata jetu, maji Jihova ua ki te nʼetu-ene oso muene tuala lelu bhenhabha ku muenhu.

⁴ Tua di muena-kiu etu oso kia tu zuelesa Jihova pholo ni pholo mu kaẋi ka túbhia.

⁵ Thembu ienhoio eme ngemanene bhuʼaxaxi kenu o kuku Jihova, o koko enu, mbé o kuenda ni ku mi tudila izuelu ia Jihova; mukonda túbhia tua mi kuatele uoma, enu mua lembuele kubanda ku mulundu; o muene-phe, uexi:

⁶ Eme Jihova Nzambi ié, nga ku katula mʼoxi ia Ijito, mu dibhata dia ubhika:

⁷ Kana kukala ni nzambi jengi bhu pholo iami.

⁸ Kana ku di iudikila kiteka kia kusonga, né kidifua kioso-kioso kia kima ki kala mu diulu ku thandu, mba mu ngongo bhoxi, mba mu menha kʼoxi a mavu.

⁹ Kana ku i fukamena, kana ku i bheza; kuma eme Jihova, Nzambi ié, ngene ngi Nzambi ia difuba, ana ngʼa bhesa kaxtiku mu ituxi ia jitata jâ, katé ku mululu ni ku mulaúla ua iá a ngi zemba,

¹⁰ maji ngi kuatela henda katé ku jimidi ja muiji ua iá a ngi zola, aiuka o ijiia iami.

¹¹ Kana kutumbula dijina dia Jihova, Nzambi ié, mu usemenhi; kuma kua Jihova kà kamba kuêla uoso u tumbula o dijina diê mu usemenhi.

¹² Aiuka kizuua kia sabhalu, ki ku kale kizuua kikôla, kala kia ku lekelela Jihova Nzambi ié.

¹³ Izuua isamanu i u kalakala, u zubhe kikalakalu kié kioso.

¹⁴ Maji o kizuua kia kasambuadi kiangene kia Jihova, Nzambi ié; mu kizuua kiki kana kukalakala-mu, né eʼmuène, né monʼé ua diiala mba ua muhatu, né selevende ié ia diiala mba ia muhatu, mba ngombe ié, mba kabulu ké, mba kibhaku kioso-kioso kia ku tokala, mba musonhi ua ku tula ku lumbu lué; mbé o selevende ié ia diiala ni ia muhatu anhohe-ku ue kala ki ua nhoha eie.

¹⁵ Kuma-phe eie-muène ue ki ki ku jimbi dingi kuila ua kexe u mubhika mʼoxi ia Ijito, eué Jihova Nzambi ié ua sunununa o lukuaku luê lua undanda, iú ua ku katula-mu ni ʼkuaku luê lua suina. Mukonda dia kiki-phe, Jihova Nzambi ié iu ua ku tendelela uixi, u aiuka jinga o kizuua kia sabhalu kia dinhohenu.

¹⁶ Bhana ujitu kua tatʼenu ni mamʼenu, kala kia ku tendelela Jihova Nzambi ié, nda u vule izuua ia kukola muenhu mu ngongo, u tunge usome mʼoxi ia ku bhana Jihova Nzambi ié.

¹⁷ Kana kujibha mukuenu.

¹⁸ Kana kuta phànda.

¹⁹ Kana kunhana.

²⁰ Kana kukala u mbangi ia kutatela mukuenu kima ka ki bhange.

²¹ Kana kukala ni luimbi lua muhatu a mukuenu; kana kukala ni luimbi lua inzo ia mukuenu, mba mukáu uê, mba selevende iê ia diiala mba ia muhatu, mba ngombe iê mba kabulu kê, mba kima kioso-kioso kia mukuenu.

Mundu abhinga Mozé phala muene a tambule kitumu kua Jihova

²² Makʼama mene Jihova ma jimbuila mundu uenu uoso ki mua bhongolekele bhu mbanduʼa mulundu, anga muene uzuelela mu kaẋi ka túbhia, mu matuta maxiti mavundu, ni kuene buí, o dízui diia ni kubhana mutendu ua suina, kuabhu-phe, ka te-ku dingi kima; kienhókio iú ua ma sonekene ku mabáia maiadi ma matadi; anga u ngi bhana-nâ eme.

²³ Bhenhobho-phe o ki muevu dízui diala kuijiia mu kitombe, o ki mua te-ku o ku kengelela o mulundu ua bambuka túbhia, mua ngʼendela, ni makota moso ma ibuka ienu ni adiakimi, o ikuinda.

²⁴ Muexi-phe: Tua mono kuma Jihova Nzambi ietu ua tu idikiza kijingo kiê, ni ukota uê, dízui diê tua dʼivu muene muʼaxaxe ka milengu; lelu etu tua mono kiua kuma Nzambi uzuelʼê ni muthu, maji muthu hé u kolʼê muene o muenhu.

²⁵ Maji o kiki-phe tua-nda kufuila-hi dingi ngoho? Mukonda o kitúbhia kiki, ngana, kia soko-bho ku tu jidisa; o ki tuila tuixi tuívue dingi o dízui dia Jihova Nzambi ietu, tua-nda kúfua muene.

²⁶ Kuma tunde xahúlu, nanhi kiá ku xitu ioso ua tenene o kuívua dízui dia Nzambi ia muenhu, uenda ni kuzuelela mu kaẋi ka milengo ia túbhia kala ki tua mu ivuʼiki, anga ukola muenhu?

²⁷ Inda bhiẋila kiá eie, uívue ima ioso i zuela Jihova Nzambi ietu; eie phala u tu tudile etu ioso kiá i zuela Jihova Nzambi ietu, etu ue o bhobho tu ku ívua muene, anga o kioso kia tange tu ki bhange.

²⁸ Jihova phe kioso kievu o dízui dia izuelu ienu, kioso ki mua kexi ku ngʼambelʼemeʼ okio, Jihova u ngʼambela, uixi; O kia zuela o mundu iú nga kʼivu; azuela muene kiambote.

²⁹ Uaué, taté! tamanu akala ni muxima uenhó, ua ku ngi xila, nu kuate kualuka o ijiia iami ioso, ku makumbi moso! phala a tunge a some, a mone mbote ni ene ni anʼâ, ku mivu ni mivu ki iene kúbhua!

³⁰ Ndé, kà a tangele kuila: Vutukenu, muie mu jibalaka jenu.

³¹ Maji eie-phe uxiala nʼeme bhenhabha, phala ngi ku ambele o ijiia iami ioso, ni jingonge ni mabatuilu, iene i uenda ni ku a longa ene o ku i aiuka, kioso kia kà bokona mʼoxi i nga-nda ku a bhana o ku i vua.

³² Endenu-phe ni kubhanga kala kioso kia mi tumu Jihova Nzambi ienu; talenu, kana kuabhukila ku kadilu mba ku kiasu.

³³ Muendela mu njila ioso ia mi tumu Jihova Nzambi ienu, nda mu kole muenhu, mu bhanduluke kiasoko, o izuua ienu i vule mʼoxi i mua-nda kúvua.