Matendelelu 4 - O Mikanda Ikola

Mozé u tendelela o mundu kutumaka. O kitumu

¹ Kiki-phe Izalaiele, tata, ívua o jingonge ni maubatuilu u ngala ku mi longesa lelu. Phala mu ma kumbidile, nda mu kole muenhu, mu kutuke, muʼvue oxi ia-nda ku mi bhana kuala Jihova, Nzambi ia jitate jenu.

² O ku makʼama u nga mi tendelela, ki mu tudike-ku kima, ki mu tunune-ku kima, inda mu kumbidila ni kulûnda o ijiia ia Jihova Nzambi ienu, i ngala ku mi lekelela.

³ Mesu menu ma di muena kioso kia bhange Nzambi kua Bale-piiole; ni kioso Jihova Nzambi ienu kia jimi o mbutu kua ió oso a kexile muʼaxaxe kenu, mu kaiela Bale-piiole.

⁴ Maji-phe, enu mua di bandeka ni kitongola kua Jihova Nzambi ienu, enuʼenuoso katé kiki enuʼenú hanji ni muenhu.

⁵ Mua mono-ze kuila nga mi longesa o jingonge ni mabatuilu, kala kioso kia ngi lekelela Jihova Nzambi iami; kiene-phe kiá ki mu enda jinga ni kubhanga mu ixi i mua-nda kubhingana.

⁶ O jingongʼiji mu ila ni ku ji langa ni ku ji kumbidila, kuma uene o unjimu uenu ni kutetuluka kuenu bhu mesu a ifuẋi; oso a-nda kuívua o jingonge josoʼiji, a-nda kuila: O mundu iú uónene, ni mu unjimu ni mu kutetuluka kamoneka soko diâ.

⁷ Kiene-phe muene, kuma muiji uónene, kala iú, u kala ni jinzambi bhua zukama kale ki tuala ni Jihova Nzambi ietuʼiki, u bhinga o ki tu mu ixana uitaia, mua u muene kiá?

⁸ Muiji uadikota uala-ku uebhi, uala ni jingonge ni mabatuilu ma iuka kiki, kala o kitumu ki ngala ku mi bhana leluʼiki?

⁹ Hé kima, di lange-phe ngó kiambote eie-muène, enda ni kuinga ue kiambote o muenhu ué, o ima i ua mono ni mesu mé ki i ku jimbe, ki i ku bhue ku muxima, enda ni ku i banza katé bhua kà suka o muenhu ué, uende ni ku i longesa ku anʼê katé ku mululu ni ku muláula.

¹⁰ Ku jimbe o kizuua ki uemanene bhu pholo ia Jihova Nzambi ié bhu Holebe, kioso kia ngi tangelele Jihova, uxi: Ngi bhonguelele o mundu iú, nga-nda ku a evisa maka mami, na mʼejiie, mbe o ku ngi xila jinga mu izuua ioso ia muenhu uâ, o bhuoso bhua kà tunga a ka ma longe uê anʼâ.

¹¹ Kienhókio enu anga mu bhongoloka, muiza hé mu imana mu betekete ia mulundu; o mulundu-phe iu ufuáfua túbhia tua-lu di leka katé mu kaẋi ka maúlu; ni kuma kuexi bui, ni kitombe ni matuta kua di bhange usuku-ua-nzumba.

¹² Kienhókio Jihova anga u mi zuelesela mu milengo ia túbhia; o dízui-phe dia uzuelelu uê mua dʼivua; maji dízui ngó mu dízui, kuma ki mua muene-bhu dingi kidifua kia kima kioso-kioso.

¹³ Bhuene bhua mi bhela o kikutu kie-muene, kia mi xindila o kuinhi dia Ijila iu ua mi ambela, uixi: Kumbidilenu-iu, anga muene u i soneka ku mabáia maiadi ma matadi.

¹⁴ Bhenhobho, Ngana ua ngi tumine ue o ku mi longa jingonge ni mabatuilu, phala enu mua kà a bhange jinge ki mua kà zubha kubokona mʼoxi i mua-nda kutambula mu ubhingano.

O iteka

¹⁵ Endenu-phe ni ku di langa kiambote o mienhu ienu, kuma enu kioso ki mua di kundile ni Jihova Nzambi ienu, bhu Holebe, ki mua muene-bhu kídifiua kia kima kioso-kioso muene kia mi zuelesele mu kaẋi ka túbhiaʼotho;

¹⁶ kana-phe kutambula lufuku lua ku di iúdikila kima kioso-kioso kia kusonga, kiteka ki kala ni lubhe lua muthu, u kala ni ukexilu ua diiala mba ua muhatu,

¹⁷ mba kídifua kia kiama ki kala ku mavu bhoxi, mba kidifua kia njila ia mabhabha i tuka mu ku bhita bhulu ni lusolo;

¹⁸ mba kidifua kia kibámba ki zanzala ku mavu ni mala bhoxi; mba kídifua kia mbiji iene mu menha kʼoxiʼa mavu.

¹⁹ Di lange ue, phala o ki u bhetula mesu bhulu, anga umona o dikumbi ni mbeje, ni jithéhtembua, ni ima ioso kiá iene ku maúlu, muxima hé u ku tuma, eie anga usota kubheza o ima ia bhange Jihova Nzambi ié, phala ku kuatekesa naiu o ifuẋi ioso iala bhoxi dia diuluʼabha.

²⁰ Mukonda enu Jihova ua, mi solo iu ua mi tombola mu folno ia felu mu Ijito phala mu kale mu mundu uê ua mi lundula mu ubhinganu, kala ki kia di monekena leluʼiki.

²¹ Eme ue Jihova ua ngi thathamena, mukonda dia uzuelelu uenu, anga uloka uixi: Eie ue Njolodá kutena ku mu záuka, oxi iauabha ia-nda ku ku bhana Jihova Nzambi ienu mu ubhinganu, eme ki nga-nda kubokona-mu.

²² Mbata eme nga-nda fuila kiá mʼoxi iii, o Njolodá ki nga-nda ku mu záuka dingi; enu-phe mua-nda ku mu záuka, o ixi ia uabhʼoio mua-nda ku ivua muene.

²³ Alukenu-phe, kana kujimba o kikutu kia te Jihova Nzambi ienu nʼenu; kana ku di songela kiteka kioso-kioso, mba ilúmbua ia ima ia mi kidika kuala Jihova Nzambi ienu.

²⁴ Mbata Jihova Nzambi ié-ze ua di bhanga túbhia tua muzukuta, uene Nzambi ia difuba.

O kuiuka kua Nzambi

²⁵ O kioso-phe ki mu vuala ana ni aláula, anga muiza ku uadiakimi, ni jimvi mu mútue, mʼoxi muenhomo, hé ku mʼiza lufuku lua ku di songela kiá iteka mba ima ikala ni kidifua kioso-kioso, o Jihova kia kʼila sûi, anga ki mu ibhila kuma mua mu lokalala.

²⁶ Eme-phe lelu ni oxi ni diulu, akale jimbangi jami; mukonda, nga tange kidi kuma, mua-nda kutukumuka mua jimi o mbutu, mʼoxiʼomo anga mu bhua-mu, anga mu ila Njolodá mua mu záuka kiua, maji oxi ki mua xialela na-iu, kuma ki mua-nda kunakina-mu; mua-nda kujikinina muene kindala.

²⁷ Anga Jihova u mi muangena muʼaxaxe ka ifuẋi iengi, o kuenhoko ue mua kà kala ngó kakibuka kófele, muʼaxaxe ka akua jixi, muoso mua-nda ku mi xinjikila Jihova.

²⁸ Kuene kiua ku mua-nda kua kà xingila mahamba mókalakale ku maku ma athu, o jinzambi ja miẋi ni matadi; ki ji tena kumona, ki ji tena kuívua, ki ji tena kúdia, mba kuívua dizumba.

²⁹ Kienhokio-phe, kuenhoko ua kà sota Jihova Nzambi ié, anga u mu sanga, se u mu sota ni muxima uê uoso ua muvimba, ni muenhu uê uoso ua muvimba.

³⁰ O mu kaẋi ka dilamba dié, mu kuila uíndua ua kutula kiá, ima ioso iii ia kuiza, ku ua kà sukʼoko ua kà lungulukila kiá kua Jihova Nzambi ié, anga ua kà mu tumaka dingi o dízui diê.

³¹ Mukonda Jihova Nzambi ié, Nzambi uejidila kukuatela henda; ka kuehelela mba u ku buikisa; né ngó ue kuẋikina kujimba o kikutu kia lokela ku jitata jé.

³² O kiki-phe se kia ku jinganena, ibhula hanji ku jithembu ja makulu ni makombe a ku diangela, tunde kiá Nzambi kia bhanga o muthu kʼulu dia mundu, tunde kua tundu o ngongo ʼté ku ia suku, kienhiki se a ki muene kiá, mba a kʼivile kiá ni mátui exi, kuabhitile kima kia kidiuanu kala kiki?

³³ Mba kua kexi kiá muiji ua athu ua tenene kuívua dízui dia Nzambi u zuelela mu milengu iuama, kala ki ua dʼivu eiʼki anga u kola muenhu?

³⁴ Inga kua kexi kiá Nzambi ua xikina o kutambula kifuẋi phala muene nuʼaxaxe ka athu engi, ni jipolova ni isuma, ni madiuanu, ni kúlua mvunda, ni lukuaku lua suina, lua sununuka, ni ima iavulu i kuatesa uoma kala ia bhange Jihova Nzambi ienu, ku mesuʼenu, mu Ijito?

³⁵ Eʼmuene ngó a ku londekeza-kiu, phala uijiie kuma o Jihova muene Nzambi, ka moneka mukuâ iadi uedi kala muene.

³⁶ Muene-phe ku diulu kuene, kuene kuandekela ku ku ivisa o dízui diê, mbé o ku ku longa; o mu ngongo ua ku londekeza o túbhia tuê tua unéne, eie uevu o maka mê kioso muene kia zuelela mu kaẋi ka túbhia.

³⁷ Mukonda muene ua zola adié, iu ua sola o mbutu iâ, iú ua i tungula kioso ene kia zubha kúfua, muene ua ku katula eie mʼoxi ia Ijito ni undanda ua nguzu iê.

³⁸ Iú ua kaiesa ifuẋi ia miji ia ku tundu eie mu ku kula ni mu ku suina, oxi ià iu ua i bhakela o ku ku bokuesa-mu eie, ni ku ku lunduisa-iu eie mu ubhinganu kala ki ua-lu ki mona leluʼiki.

³⁹ Ijiia-na-kiu-phe lelu, ni kubanza mu muxima ué, kuma Jihova muene ngó o Nzambi mu diulu, ni mu ngongo bhoxʼabha; ki kuene mukuá.

⁴⁰ Aluka-phe o jingonge jê, ni itumu iê, i ngala ku ku tendelela lelu, phala utunge usome, ni ku mululu ni ku muláula, o izuua ié nda i vule mʼoxi ia ku bhana Jiohova Nzambi ié, katé ku hádia ni hádia.

Mozé utungula sanzala jitatu phala dilengelu dia anʼa Izalaiele

⁴¹ Kienhókio, Mozé anga utungula jisanzala jitatu ku sámbua kunu dia Njolodá, ku mbandu ia mutundilaʼkumbi;

⁴² phala dilengelu dia oso abhita ni kiluezu kia kujibha muthu, sé ku di kuata-nê mba kudianga ku mu kala ni unguma uoso-uoso; u lengela-phe mu sanzala jitatuʼiji, phala a bhulule o muenhu uê.

⁴³ Mu kikangalakata ku kiphenza, phala akua Lubene; sanzala iamukuá Lamote, mu Ngiliiade, phala akua Ngadi; sanzala ia katatu Ngolane, mu Basane, phala akua Manasa.

Mozé uzuela lua kaiadi ni kutendelela o mundu

⁴⁴ Kiki kiene o kitumu kia bhana Mozé ku anʼa Izalaiele.

⁴⁵ Ene-phe o maumbangiʼama, ni jingonge, ni mabatuilu, ma tange Mozé ku anʼa Izalaiele, kia tundu ku Ijito;

⁴⁶ kia tula kiá ku sámbua kunu dia Njolodá, mu dikôlo dia lulama ni Mbete-piiole mʼoxi ia Sihone, sobha ia akua Mamodi, ua tungile mu Hezebone, a mu bomuene kuala Mozé ni anʼa Izalaiele mu ku tunda ku Ijito,

⁴⁷ anga oxi iê a mu tambula-iu, hé a iʼvua mu ubhinganu; kiene ue kimoxi ni oxi ia Hoke, sobha ia Basane, ku jisobha jiiadi ja akua Mamodi, atungile ku sámbua kunu dia Njolodá, ku mbandu ia mutunda ilakumbi.

⁴⁸ Tunde kiá ku Alouele, bhu nzènde ia kahonga ka Anone, katé ku mulundu ua Siione; Siione-phe muene Helemone.

⁴⁹ Kumoxi ni manhana moso ma kexile ku sámbua kunu dia Njolodá, ku mbandu ia thunda katé ku musanza uabhela ku mikáu, ku luiji lua Ajidode-pisga.