Matendelelu 34 - O Mikanda Ikola

Mozé ubanda ku mulundu ua Nebo, ukengelela oxi ia Polomesa anga ufué kiá

¹ Mozé anga u banda ku mulundu ua Nebo, mu dinhana dia Mouabhe o mikáu ia Mouabhe u i xa bhoxi, iú bhu thala ia Pisga, bhua lulama ni Jedikó. Jihova anga u mu londekeza oxi ioso, tunde ku Ngiliiade katé ku Dane;

² Nafitali ioso, ni oxi ia Ifalaime ni Manasa, ni oxi ioso ia Juda, katé ku musanza ua kalunga ua suku-ku, ku mbandu ia mubolokela-kumbi.

³ Ni ku Nengebe, ni mu ngànga ioso ia honga ia Njolodá, ni mukáu ua dikôlo dia Jedikó, ku sanzala ia Maie katé ku Zouale.

⁴ Jihova anga u mu ambela, uixi: Iii iene o ixi i nga lokela Mbalahamuʼii, ni Izake, ni Jakobo, kuila: Nga-nda ku i bhana o mbutu ié. Nga ku londekeza-iu-phe phala u i mone ngó ni mesu mé, maji kua-nda kubokona-mu.

⁵ Bheneʼobho kiá bhene bhua fuila Mozé, selevende ia Jihova, mʼoxi ia Mouabhe, kala kia ki tanga Jihova.

⁶ Anga u mu fûnda mu dikôlo diala mʼoxi ia Mouabhe, bhua lulama ni Mbete-piiole katé kiki, kana-ku muthu uejiia bhu mbila iê.

⁷ Mozé ua fuila mu kitala kia hama ia mivu ni makuinhi aiadi; mesu mê hanji akexe kumona muene kiambote, hanji akexe ni nguzu iê.

⁸ Anʼa Izalaiele anga a dila Mozé, mu makuinhi atatu a izuua, mu mikáu ia Mouabhe, katé kia tena izuua ia thambi ia Mozé.

⁹ Josuué, monʼa Nune-phe, anga uizala ni Nzumbi ia unjimu, kuma Mozé ua tudile maku mê ku thandu diê; kienhókio anʼa Izalaiele akuata ku mu ivua kia zuela, anga a bhanga kala kia xindi Jihova kua Mozé.

¹⁰ Kiluua kukala dingi polofeta mu Izalaiele kala Mozé, a mu ijidile kuala Jihova, katé kia diendela jinga mu kuzuela-nê pholo ni pholo.

¹¹ Ki kuala ue dingi mukuá a soka-nê mba kukala u di fuangana-nê mu ijimbuete ni madiuanu, a mu bhele Jihova phala ku ma bhangela mʼoxi ia Ijito, kua Falaó, ni ku jiselevende jê joso, ni mʼoxi iê ioso;

¹² ki kuala ue u soka-nê mu undanda uoso ua lukualu luê, ni mu madiuanu mʼònene ma kalakala Mozé ku mesu ma Izalaiele ioso.