Matendelelu 32 - O Mikanda Ikola

¹ Enu mu maúlu, bhetekenu mátui, kuma nga-nda kuta maka: oxi ue ibatekele o maka matundu mu kanu diami.

² Ulongelu uami-ème mvula inoka, mbundu isuma, mbambe ni masumi-sumi ma mvula ku thandu a mafe, kifua dimume di tula ku iẋoka.

³ Kuma nga-nda kufumanesa dijina dia Jihova; Nzambi ietu muenda ni ku mu jingisa!

⁴ Muene Tadi dia Muenhu! Kima kioso kia bhanga kitenena! O uendelu uê uoso uatetuluka; Nzambi muene o Kidi, o mua muene ki muene mangonha; izuua ioso muene ngó uaiuka, o kutetuluka ue muene ngó.

⁵ Athu akexe anʼê, leluʼidi a mu kitukila, a di selula, ene-phe a di bhange-kiu! Muiji ua lusebu, abhindamena ngó kuenda ibhengèle!

⁶ Mbé Jihova kiene ki mu mu vutuilʼokio? Muiji ua tobho ua kambe kilunjí? Mbé Jihova ki muene Tatʼenu ua mi kula, ua mi bhanga, iu ua mi bhana o kutunga ni kusoma?

⁷ Uenda ni kulembalala jinga o izuua ia xahulu, Uxinganeka jinga o mivu ia miji ni miji ia kexile-ku iná; se kua kʼijiia, ibhula tatʼenu, muene a ku kundile-mu; se kia ku jimbi ibhula adiakimi, ene a-nda ku ku jimbuila-kiu!

⁸ Kioso kia kexe Suke-ku mu kuuanena miji iʼathu o undundu uâ, anʼa Adá anga u kuata ku auanuna ku ibuka-ibuka ia di kexidila mudiâ, hé u ta jimbambe phala ifuẋi mu ngongo, o anʼa Izalaiele ua a zongela kala kiasoko o ndumba iâ.

⁹ Mbata dikânda dia Jihova o povo iê iii; Jakobo muene dijikita dia undundu uê.

¹⁰ Ua mu sange mʼoxi ia kikangalakata kiahatu, ixi ia kukuta ia ngene ni ngene, muala kubuza ngó iama! Ua mu ongeka, ua mu lange, hé u mu sasa mukuâ ni mona diesu.

¹¹ Kala holokoko kia langa o kikalanga kiê, anga uia ni kuzelela kulu dia anʼê. U futununa o mabhabha mê, anga u zangula o tuana tuê, hé u a ambatela ku mabhabha kuene,

¹² kiene ue kia mu endesa kuala Jihova, ubhekelèle uê. Ki bhua kexile nzambi iengi ia mu bande.

¹³ Muene ua mu endesa ku thanduʼa jixi, kala ku kabalu kuala; ua mu dikila ni jimbote jaʼxi, ua mu xibhisa uiki u tunda mu ditadi, ni maji ma tundu ku ditadi dia kolo.

¹⁴ Ni matheka ma jivaka ni lete ia ilunga ia jimbudi. Ni banha ia jiseseme, ni ia ilumbe ia jimbudi, jene kudila mu makèla ma Basane, ni ia isutu ia jihombo; ni tiliko ia nete kiambote. Eie ua zuuela jinga o manhinga ma ji-uva, o vinhu ia kambe ku thuthuma kifulu.

¹⁵ Maji Kazola kami kia zubha kiá o kuneta, kua mu iza kiá kubhana isènde: Ua nete, ua hangula! Ua di dikila ni ima ianete! Iu uaxʼiê kiá Nzambi iê, ua mu bhanga. Uate dikunda ku Tadi dia Muenhu uê, di mu bhana o kubhuluka!

¹⁶ A mu lokalala ni jinzambi jengi, phala ku mu bhekesa difuba; a mu thathamesa ni ma-ufusa mâ.

¹⁷ Jisata a ji satela madiabhu, o Nzambi kana. Jinzambi jene jeza leluʼidi, mʼokulu ki ja monekene; jinzambi ka jʼijidile, jabhingi nuka a ji bhezele kuala jitata jenu.

¹⁸ ʼTadi dia Muenhu ua mu jimbiê kiá, ua kuvuala; Nzambi uoso ua kʼumbile iú ua ku bhana o kukala, ki bhinga u mu jimba?

¹⁹ Jihova phe, kia ki mono, ua ehelela bhobho! Mbata azange, a mu lokalala! A mu zokesa ni anʼê a mala ni a ahatu!

²⁰ Uixi-phe; Ngʼa suekela pholo, ngi mone hanji o zubhilu diâ; mbata a di bhange muiji ua lusébu, ana kamoneka ufiiele moxi diâ.

²¹ A ngi ta ku difuba ni kima kia makutu, kala Nzambi ue; ima ia kingoho iene ia ngi lokalala-na-iu; Eme-phe ue nga-nda ku a ta ku dixinga ni athu kʼa kidi ngó; muiji ua juuala uene u nga-nda kua ẋokuesa-na-u.

²² Kuma kiene ki ngalʼiki njinda iami iauama túbhia, tua kà uama muene, katé tua bhiẋila mu jihota joso ja mukiukuluku; phala kubuikisa oxi ni funza iê ioso; ni ku jikatesa o madisesa ma milundu.

²³ Nga-nda ku a lunjika ndumba ia jiphaxi ku thandu diâ; matôma mami ngi ma zubha muene ni ku a kuba-kuba-u.

²⁴ A kà tala hadi, nzala ia kʼènda ni ku a zubha! A kà diua ku mahaxi a kuata ni muanha ni ku dibhebhu dia phulu. Ngʼenda ue ni ku a zangela iama, ni jinhoka ji tela ngàmbu, jenda ni ku fukunuka mu fufuta ia mavu.

²⁵ Anga mu ila: ku kanga xibhata i ídia, dia, moxi kimbuua kijeja. Ki kala o munzangala ua diiala, ki kala o mona-kilumba kiluua ejiia diiala; ki kala o mona bhu maku, ki kala o velu mukua jinvi,

²⁶ kifua ngeje kuila: ku hota joso ngi mi muanganesa-ku, katé a mi jimbi muʼaxaxi ka mundu.

²⁷ Maji nga kexile ni hele, mukonda dia nzabala ia nguma. Oso a mi kala ni luma avula ku ki mona; a soko-bhu kuila: Lukuaku luetu luene lua ki bhange, Jihova ki muene ua ki bhange ubheka uê.

²⁸ Kuma o mundu uami ene uâ kamoneki kaiula, kʼeniâ ni kilunji.

²⁹ Tamanu atetulukile! anga a tongolola, eji kuijiia o dizubhilu diâ!

³⁰ Se ʼTadi diâ ua kambele ku sumbisa o nguma jâ kua ene, mbé eje kutena kuila muthu umoxi ulandemeka midi, kiiadi a kaia kuinhi dia midi? Ki Jihova muene ua a bhakula?

³¹ Kuma o ditadi dia-êne, ka soka ni ʼTadi dietu-etu; o kiki ni jinguma jetu jene kia a tetulukila uâ.

³² Mukonda díbhia diâ dia mivide, dia tundu ku mivide ia Sodoma; o mu mikáu mu diala, o mikáu ia Ngomola; ji-uva jê ndululu ioso kuma jezala ikola-kola; o isàka ia ji-uva jê jela ni jene lokoso!

³³ O vinhu iâ, ia ualende ua ikolakola ia jinhoka, Mukua ni mathe ma ikolakola ia madiuta.

³⁴ Kʼeme muene nga kʼijiia kiasoko? Ki nga ki jika muene ni idimbu mu malundilu mami?

³⁵ Phonzo ia ngi tokala eme, eme-muène ngi futa bhu kizuua kiê; sai bhuoso mungu bhua kà ẋangumukina o dikanda diâ; mbata o kizuua kiâ kia kusenguluka kiazukama. O ima-phe ia-nda kubhita-na-iu kindala ia-nda kuiza muene, ki i kokoloka.

³⁶ Mbata Jihova ua-nda kubatuila o povo iê kiaiuka, Jiselevende jê u a kuatela henda. Kia mona kuila abhânge, alémbua, ki bhua subhuka muthu, né fôlo.

³⁷ Kiene kiua kia kèla: O kiki-phe nzambi jâ ja suku bhebhi? Ene bhebhi bhua suku ni ditadi diâ, dia kexe ku di fiiala?

³⁸ O jinzambi ja kexe kúdia o banha ia jisata jâ janete, ni kúnua o jinganza jâ ja vinhu ia a tela jinga ku izau? Ji balumuke-phe phala ji mi kuatekese, nda mu kale ni bhua ku kondamena.

³⁹ Mu ngi tala-phe kiá: Eme, Eme-muène ngó Nzambi; ki ngala dingi ni mukuetu, Eme ngi jibha, Eme ue ngi phaphumuna; Eme ngi kuama, Eme ngi saka; ki kuala u ngi ẋangumuka bhu lukuaku luami.

⁴⁰ Kuma nga-nda ku leka lukuaku luami bhulu, ngixi: Eme ngala ni muenhu unangenena katé ku hádia ni hádia.

⁴¹ Se ngedi ngi zuika o mukuale uami, uedi léko, ni ngi te lukuaku luami mu kubatula o milonga, ngi tata phonzo ku thandu dia jinguma jami, oso a ngi zemba ngʼa bhana o futu iâ.

⁴² Matôma mami ngi ma kodiuisa muene ni manhinga, o xibhata iami idiaúla xitu ni manhinga ma afi, ni ma jihutile; o mu kuvutula phonzo, jinguma ngi ji andekela tunde ku mútue.

⁴³ Enu ifuẋi, tanenu kumoxi ni mundu uê, mukonda Jihova ua-nda kuzokela jiselevende jê; o manhinga ma jiselevende jê muene u a tatela phonzo ku jinguma jâ. O jinguma jê muene u ji talesa hadi; anga oxi u i zelesa ku dibônzo mbe o mundu uê.

⁴⁴ Mozé anga uiza, utangela o kifuẋi maka moso ma mukumbi iú ku mátui mâ, ni muene ni Josuué monʼa Nune.

⁴⁵ Kuila Mozé uazumbuka kutanga makʼama kua Izalaiele ioso,

⁴⁶ ua ambela, uixi: Tenu-ku muxima ku maka oso u ngala ku mi bhela umbangi lelu, mu ma sambukise ku anʼenu, ene ue phala akale ni muanu ua ku kumbidila o maka moso ma kitumu kiki.

⁴⁷ Mbata o maka iá ki maka ma ngoho, uene o muenhu uenu; ene a-nda ku mi bhana izuua iavulu iadixala mu ixi i mua-nda kúvua, kioso ki mua-nda zaúka Njolodá.

⁴⁸ Mu kizuua kienhokio, Jihova Uambela Mozé, uixi:

⁴⁹ Banda bhu ditala dia Abadimi, ku mulundu ua Nebo, u ala mʼoxi ia Mouabhe bhua lulama ni Jedikó, u talese oxi ia Kanana i nga-nda kubhana anʼa Izalaiele mu ubhinganu.

⁵⁰ U fuila ku mulundu kuenhoko ku ua-nda kubanda; uie ku-àia Vumu dié, kala phangʼié Alá kia fila ku mulundu ua Hole, iu uaii kuʼàia o jitata jê.

⁵¹ Mukonda ua ngi te kituxi muʼaxaxi ka anʼa Izalaiele, bhu menha ma nzaia (Mediba) bhu Kadexi mu kikangalakata kia Nzini; kuma ua fudile ku ngi jingisa muʼaxaxi ka anʼa Izalaiele.

⁵² Mukonda dia kienhiki, oxi ia ku kala ku pholo, i nga-nda ku bhana anʼa Izalaiele, u i mona muene mu kanga iná, maji ku tené kua kà bokona-mu.