Matendelelu 31 - O Mikanda Ikola

Mozé u tungula Josuué, a bhingane bhu kididi kiê

¹ Mozé bhenhobho, uambela Izalaiele o maka mosoʼama;

² uixi: Lelu nga tenesa kiá hamʼa mivu ni makuinhi aiadi. Ki nga-nda kutena dingi kuila ngi tunda ngi bokona. Katu-ku dia kienhiki, Jihova muene ue ua ngʼedi, uixi: Njolodá ku tenʼê ku mu zaúka dingi.

³ O Jihova Nzambi ié muene ua-nda ku ku tuamenena ku pholo. O akua jixi jiji, iá muene ua-nda ku ku jikinisina-u, nda eie u vue oxi iâ. Josuué muene u ku kala ku pholo ia ku ku endesa, kala kiambe Jihova.

⁴ Jihova u a bhanga kala kioso kia bhange kua Sihone ni kua Hoke, jisobha ja Mamodi, ni kia bhange ku ixi iâ, iu ua a jikinisa.

⁵ Kioso-phe Jihova kia mi bhana-nâ, ku pholo ienu, mua tokala-phe mua bhanga kala kiambe o ngonge ioso i nga mi tendelela.

⁶ Kalenu mu indanda, mu kole kiambote o muxima. Ki mu kale ni uoma, mba mu kala ni kekenha ki mu a mona mesu, mbata o Jihova Nzambi ié muene uala kuia-nê, o muene ka-nda ku kúxia, ka-nda ku ku ehelela.

⁷ Mozé anga uixana Josuué, u mu ambela, bhu mesu a Izalaiele ioso, kuamba: Kala u kindanda, kola maku! Mukonda eie-muène ua-nda ku bokona ni mundu iú mʼoxi ia lokela Jihova ku i bhana ku jitata jenu; eie muene-phe ua-nda ku a lunduisa-iu.

⁸ Jihova muene ua-nda ku ku tuamenena ku pholo, muene ua-nda ku ku banda; muene ka-nda ku ku xa, kana; ka-nda ku ku ehelela. Kana kukala-phe ni uoma, mba u kala ni hele.

O kitumu kia tokala ku ki tangela o mundu, mu sambuadi ni sambuadi dia mivu

⁹ Mozé anga usoneka kitumu kiki, u ki bhana ku jinganga, anʼa Levi, oso akexe kunhata o álaka ia kikutu kia Jihova, ni ku adiakimi oso a Izalaiele.

¹⁰ Mozé iu ua a tendelela, uixi: Muila jinga, se bhua bhiti kiá sambuadi dia mivu, bhu thembu iatokala ku muvu ua ufolo, bhu fesa ia jifundu,

¹¹ kioso ki bhongoloka jinga Izalaiele ioso bhu pholo ia Jihova Nzambi iê, bhuʼikididi kia dibhata dia tungula muene, bhenhobho utanga Kitumuʼiki bhu pholo ia Izalaiele ioso, ku mátui mâ.

¹² Mu bhongolola jinga mundu uoso, ni mala, ni ahatu, ni anʼa ndenge, ni asonhi ala mu mabhata menu phala evue, a di longe, a xile jinge Jihova Nzambi ienu, phala a kale ni muanu ua kualuka ni kubhanga jinga kioso kia zuela o Kitumu kienhiki.

¹³ Mbé anʼâ oso a kambele ku kʼijiia, evue, a di longe kuxila Jihova Nzambi ienu, mu izuua ioso i mu tunga kulu dia mundu, mʼoxi i mua-nda kuzaúkila Njolodá, phala ku iʼvua.

Nzambi u tuma Josuué kutambula konda ia kifuẋi

¹⁴ Jihova anga uambela Mozé, uixi: Talesa, izuua ié ia ku-bhu, kuma ia zukama kiá ku dizubhilu phala kufuʼé kiá. Ixana-phe Josuué, mu ize mu balaka ia kutakanena, nda ngi mu tendelele. Kienhókio ni Mozé ni Josuué aia mu balaka ia kutakanena, bhu pholo ia Jihova.

¹⁵ Jihova bhenhobho utukuluka mu balaka, uejiia mu philadi ia dituta; o philadi ia dituta anga izenzama ku thanduʼa muelu ua balaka.

¹⁶ Jihova iú uambela Mozé, uixi: Talesa-ze, eie ua-nda kuia kiá ku kilu ku àia jitata jé; o kifuẋi kiki kia-nda kufundumuka mu kubhanga lubhandu lua jinzambi jengi, ja akua-jixi, kua-nda ku di telʼuku; eme a-nda ku ngi xa, o Kikutu ki nga tele-nâ a-nda ku ki bula.

¹⁷ Mu kizuua kienʼokio bhene-phe kiá bhua-ndu uamena o kutema kuami, anga ngʼa ehelelela, pholo iami ngi i lungisa kiá kuengi, phala a a jikinise; a-nda kutala hadi ni jiphaxi javulu, anga a kʼèla: O hadi ioso iii ia tuʼijila mukonda Nzambi ietu muʼaxaxi ketu kʼala-mu, ki kiene?

¹⁸ Né kienhókio, Eme-phe mu kizuuʼomo o pholo iami nga kà i sueka hanji muene, mukonda dia ituxi ioso ia-nda kubhanga ene mukonda dia kualukila kiá jinzambi jengi.

Jihova u longa Josuué mukumbi uobhe

¹⁹ Kindalʼiki-phe, enuʼenu di sonekenienu o mukumbi iú, muende ni ku u longa anʼa Izalaiele; tenu-u mu kanu diâ, kuma uene hádia u nga-nda kuelesa-na-u anʼa Izalaiele, uene u ngi kala mbangi iami mu ku a elêsa.

²⁰ Mbata kioso ki nga-nda ku a tula mʼoxi i nga lokela jitata jâ, oxi i zunzumuka lete ni uiki, kia-nda kúdia, kia-nda kúnua, anga a neta mukonda dia jimbote ji nga-nda ku a bhana a-nda kulungulukila ku jinzambi jengi, anga a ji sedivila, a-nda ku ngi thathamesa, o kikutu kiami ki nga te-nâ a-nda ku ki bula.

²¹ Kioso-phe kia-nda ku a tula o nzungule ia mavuua ma hadi ni mbùnda, o mukumbi iú uene ua-nda ku ngi kala mbangi iami, uixi: Mua bele; mukonda ka-nda kutena ku u jimba, ua-nda kuxalela mu kanu dia mbutu iâ; kuma eme ngʼejiia kiambote o ilunji iâ, iala ku di funina kiá lelu, sumbala kiluua ngʼa tula mʼoxi i nga a lokela.

²² Mozé iu ua soneka o mukumbi iú mu kizuua kienhókio, anga u u longa anʼa Izalaiele.

²³ Anga Jihova uambela Josuué, monʼa Nune, uixi: Kala u kindanda, u kole kiambote o muxima! Mbata eie ua-nda kubokuesa anʼa Izalaiele mʼoxi i nga a lokela Eme-muène nga-nda ku kala jinga nʼeie kumoxi.

Divulu dia Kitumu a di tula bhu mbandu ia Alaka

²⁴ Kioso Mozé kia zubha kusoneka o maka moso ma Kitumu kiki mu divulu, katé ku mahezu,

²⁵ ua bhana ngonge ku jilevita, akua kuambata o álaka ia kitumu kia Jihova, uixi:

²⁶ Tambulenu o divulu didi dia kitumu, tenu-diu bhu mbandu ia álaka ia kitumu kia Jihova Nzambi ienu, di kadiê bhenhobho, o bhenhobho di kale mbangi ia ku mi kuzala.

²⁷ Kuma eme o kubhukumuka kuenu nga ku ijiia, ni kuhinana o jixingu ku muene na-ku. Tala, sumbala eme hanji ni muenhu muʼaxaxi kenu, mua zoka, mua zoka kiá ni Jihova; kuambe dingi se ngafu-ami kiá!

²⁸ Ngi bhongoluedienu adiakimi oso a miji ienu, eze bhabha, ni jifixiiadi jenu. Ngandala ku a zuelela o maka iá ku mátui menu, ni kukuata-bhu o diulu ni oxi, phala a ngi kale jimbangi bhu kaẋi ni ene.

²⁹ Mbata eme nga kʼijiia kiambote muene kuila o ki ngi zubha o kúfua, enu kidi-èlele muene mua-nda ku di xidisa, o njila i nga mi xindilile mua-nda ku i a bhuka hé mu i xisa. Hádia-phe mu izuua ia kʼeza-ku divuua dioso dienhidi dia-nda ku mi tula muene, se Jihova mua mu bhange phulu, mu ku mu lokalala ni ikalakalu ia maku menu anga mu mu thathamesa.

Mukumbi ua Mozé ua zumbuka-na-u

³⁰ Mozé bhenhobho anga u tanga o maka ma mukumbi iú ku mátui ma kionge kioso kia Izalaiele, katé ku mbambe, uixi: