Matendelelu 30 - O Mikanda Ikola

Oso adiela ituxi, Nzambi uene ku a lendukila

¹ Hé ua mono kua kuiza ima ioso iii, dibesá mba uíndua, kala o ima iii i nga ku tela kiá ku pholo ié, se u i lembalala kiambote muʼaxaxi ka miji ioso kua kà ku takuila Jihova Nzambi ié;

² o ki u biluka kua Jihova Nzambi ié, anga dízui diê u di xikina, anga u bhana matui kala ki nga ku tendelela leluʼiki, nʼeie ni anʼê, anga mu ki bhanga muene ni muxima uenu uoso ni muenhu uenu uoso;

³ bhenhobho-phe o Jihova Nzambi ié, ua kà ku takana dingi ku ubhika ku uaiioko, anga u ku lendukila; hé ukuata ku ku phopha bhuamoxi, u ku bhongolola dingi mu jixi joso mua ku muangenene Jihova Nzambi ié muène.

⁴ Né-mbe hanji o jihutile jé a a balakala, a kala katé kua suku o diuluʼoko, Jihova Nzambi ié kuenhoko ua kà a bhongolola muene anga ua kà a katula-ku;

⁵ anga Jihova Nzambi ié u ku bheka mʼoxi ia vuile kiá kuala o jitata jé, anga eie ue u ivua; hé u ku bhandulula kiasoko, eie ubeta kusokoloka, o kia sokoluele o jitata jé, ndenge.

⁶ Jihova Nzambi ié ua-nda ku ku saia o muxima ué moxi, ni muxima ua mbutu ié ia-nda ku ku kaiela, phala kuzola jinga Jihova Nzambi ié ni muxima uoso, ni muenhu ué uoso, nda u kole muenhu.

⁷ O Jihova Nzambi ié ua-nda kulundulula o mázui mosoʼama ku thandu dia jinguma jé-eie, ni ku thandu dia oso a ku kuatela luma, oso muene ene ku ku zudidika.

⁸ Eie-phe kibhinga u tolola dingi muene o muxima, anga uenda ni kusuua o dízui dia Jihova; ijiia ioso i ngala ku ku tendelela leluʼidi uenda ni ku i bhanga.

⁹ Jihova Nzambi ié ua-nda ku ku izalesa ni jimbote mu ikalakalu ioso ia maku mé, ni ku mbutu i tunda mu mala dié, ni ku mbutu i tunda mu ibhaku ié, ni ibundu ia mavu a mikáu ié, anga u ku vudixila o mbote; mukonda o Jihova ua-nda ku ku sangulukila muene, mu ku ku bhanga o mbote, kala kia sangulukile ku jitata jé.

¹⁰ Maji kikale imʼiii ijiia mu kusuua o dízui dia Jihova Nzambi ié, ni mu kualuka o ijiia iê ni jingonge jê, jòsoneke mu divulu didi dia Kikutu, mu kuila eie uabiluka kiá anga u vutuka dingi kua Jihova Nzambi ié, ni muxima ué uoso ni muenhu ue uoso.

Kitumu kia Jihova kima ki nangenena, ki tetuluka. O muenhu ni kalunga

¹¹ Mbata kitumu kiki, ki ngala ku ku tendelela leluʼiki, ki kia ku jinganena, kana, (kuila ki lémbua ku ku tetulukila), ki kia kala ue bhualebha.

¹² Mukonda ki kiala ku maúlu, kuamba uila: Mukuahi u tu bandela ku maúlu, nʼa tu bhekele-kiu bhabha, nʼa tu ivuise-kiu, nda tuende ni ku ki bhanga?

¹³ Ki kiala ue kuemʼoko dia musanza ua Kalunga, kuamba uila: Mukuahi u tu zauʼkila o musanza iú ua Kalunga, nʼa tu bhekela-kiu kunu, anga u tu ivisa-kiu phala tu ki aluke?

¹⁴ Mbata o kizuelu kiki kia ku kala muene bhua zukama, mu kanu dié-muène mu ki ala, ni mu mu muxima ué phala u tene ku ki bhanga jinga.

¹⁵ Ua ki mono-phe, kuma, lelu ngala ku ku tudila o muenhu ni mbote ku mbandu kuku; ngala ku ku tudila ue o kúfua ni ʼlamba ku mbandu iamukuá.

¹⁶ Kuma ngala ku ku tendelela lelu, ngixi: Zola Jihova Nzambi ié, endela mu ikoka iê, ijiia iê bhaka-iu kiambote, ni jingonge jê, ni mabatuilu mê; se kiene ki u bhanga, u kala ni muenhu, u di sokolola u kala u munéne; o Jihova Nzambi ié ua-nda ku ku zediuisa mu ixi i ua-nda kubokona mu ku i vua.

¹⁷ Maji o ki uila-phe o muxima ué u ngi landuka Eme, anga eie u dituna kubhana mátui, katé kia ku sèndula phala kubheza jinzambi jengi, ni ku ji kalakela;

¹⁸ eme nga mi dimuna-phe lelu, ngixi, mua-nda kujikinina muene nga tange kidi; muanda kuila o Njolodá mua mu zaúka kiua, maji oxi ki mua xalela-na-iu, i mua fuamene o ku kutuka anga mu i vua.

¹⁹ Ni diulu ni oxi a ngi kale jimbangi, kuma nga ku tudila lelu o muenhu ni kúfua; nga ku tudila ue o kuzediua, ni kuxixima, sola-phe muenhu, nda u laie, nʼeie ni mbutu ié.

²⁰ Kale-phe u zola Jihova Nzambi ié, u bhana mátui ku dízui diê, uenda ni ku mu naminina ngó Muene; mukonda kuala o kulaia kué; kuene kuala o divula dia izuua ié; nda u tene kutunga ni kuxalela mʼoxi ia lokela Jihova ku i bhana jitata jé Mbalahamu, ni Izake, ni Jakobo.