Matendelelu 3 - O Mikanda Ikola

Izalaiele u tambula oxi ia Hoke ni Basane

¹ Anga tu biluluka, tu banda ni njila ia Basane; Hoke-phe, sobha ia Basane, utunda ku tu batuila ni muene ni mundu uê uoso, anga tulua-nê ita bhu Dilei.

² Jihova phe u ngʼambela, uixi: Ku kale ni uoma; mbata nga mu bhakula bhu lukuaku lué ni muene ni mundu uê uoso ni oxi iê. Kioso ki ua bhange Sihone, sobha ia Mamodi, ua kexi mu Hezebone, kiene ue ki u mu bhanga muene.

³ Jihova Nzambi ietu anga u tu bhana Hoke, sobha ia Basane, ni mundu uê uoso ua tu bhakuila-nê bhu makuʼetu, anga tu mu kuama muene katé ki tua mu jimi mbutu, né ngó muthu umoxi ka mu subhuka-ku.

⁴ Bu kumbiʼobho-phe anga tu tolola o jisanzala jê joso; ki tuaxi-bhu sanzala i tua kambe ku i tambula; makuinhi asamanu a jisanzala, mbambe ioso iaʼxi ia Angobe ia utuminu ua Hoke mu Basane.

⁵ Jisanzala jene joso jiji ja kondoloka mu imbaka ia di leka, ni imabhitu ni jiphapha ja felu; kua di tele ni jisanzala ja mukuá, janzungule muene, ja kambe kukala mu imbaka.

⁶ Tua ji sengulula muene, kala ki tua bhangele kua Sihone, sobha ia Hezebone, anga tu sengulula o jisanzala kumoxi ni mala ni ahatu ni tuana tua-nde-nge.

⁷ Maji o ibhaku ioso ni ima ioso ia xala mu jisanzala jâ, tua i tambula phala ikale mbole ietu.

⁸ Kienhokio oxi ioso ia sobha jiiadiʼojo ja Mamodi kiene kiá ki iabhita ku konda ietu ku sámbua kunu dia Njolodá, tunde ku honga ia Anone, katé ku mulundu ua Hezemone;

⁹ (Helemone-phe, akua Sidonha a mu luka exi Sidiione; maji akua Mamodi-phe exi Senile,)

¹⁰ jisanzala joso ja kiphenza, ni Ngiliiade ioso, Basane ioso, katé Sálaka ni Dilei, jisanzala ja utuminu ua Hoke mu basane, tua ji tambula.

¹¹ (Mukonda ku mazonda a xahulu, ua subhukile-ku ngó Hoke, sobha ia Basane; talesa o hama iê, hama ia felu; abha ki i ié hanji mu Labate dia anʼa Amone? Kulebha kuê dívua dia kóvadu, o kuzanza kuê kóvadu jiuana, mu midila ia kóvadu ia diiala.)

O kuuana o ixi ia tambula mu ita

¹² Oxi-phe tua i bhitisa muene ku undundu uetu, thembu ienhoio; tunde kiá ku Alouele ua zukama ni honga ia Anone, ni kaxaxe ka mulundu ua Ngiliiade ni jisanzala jê, nga i bhana ku anʼa Lubene ni anʼa Ngadi.

¹³ O kaxaxe ka muiji ua Manasa nga u lunduisa o mbandu ia Ngiliiade ia subhukile, ni Basane ioso, mua kexile o utuminu ua Hoke, ni dikaẋi dioso diaʼxi ia Angobe. (Mu xahulu o Basane ioso, akexi ku ixana exi oxi ia mazonda, o Jinefalime.

¹⁴ Jaíle monʼa Manasa, muene kiá ua tambuile o dikaẋi dioso dia ixi ia Angobe katé mu kiuanu ni akua Jesule ni akua Mahaka, anga u i luka dijina diê uixi: Basane-ia-Havote-Jaíle, katé mu kizuua kia lelu.)

¹⁵ O Makidi-phe nga mu bhe Ngiliiade.

¹⁶ Maji ni akua Lubene, ni akua Ngadi nga a batuila tunde ku Ngiliiade katé ku bonga ia Anone, ni dikaẋi dioso dia Kahonga katé bhu masangu, iene o mbambe katé ku kahonga ka Joboke, mu kiuanu kia ixi ia anʼa Amone.

¹⁷ Nga a tela-ku o mukáu uoso katé ku Njolodá tule, iene o mbambe iâ tunde ku Kinelete katé ku musanza ua tutu, o Musanza ua Môngua mu luiji lua Ajindode-pisga, ku mbandu ia thunda.

¹⁸ Mu thembu ienhoio anga ngi mi tendelela luamukuá, ngixi: Oxi iii, Jihova Nzambi ienu ua mi bhakuila-iu muene, phala enu ku i vua; enu-oso mu mala ma nguzu mua-bhu o uoma, bhakatenu, mu bhite ku pholo ia jiphange jenu, anʼa Izalaiele.

¹⁹ Maji ahatuʼenu ngó, ni tuana tuenu, ni ibhaku ienu (mukonda ngejiia muene kuma muala ni ibhaku iavulu), a xiale mu jisanzala jenu, ji nga mi bhana kiá.

²⁰ Katé Jihova kia bhana jiphange jenu o dinhohenu, kala kia mi bhana enu; nda ene a lundule uâ oxi ioso ia-nda ku a bhana Jihova ku sámbua koko dia Njolodá, anga mua kà vutuka kiua, kala muthu ku undundu uê u nga mi bhana kiá.

²¹ Mu thembu ienhoio nga tendelela ue Josuué, ngixi: O mesu mé ma ki mono kiá, kioso kia bhange Jihova Nzambi ienu, ku jisobha jiiadiʼiji; Jihova ua kà bhanga ue kienhiki ku mautuminu moso, ku mua kà bhita.

²² Kana ku a kala-phe ni uoma; mbata Jihova Nzambi ienu, muene ua kà mi luila o ita.

Musambu ua Mozé phala ku mu bhiẋidisa mu Kanana

²³ Kienhókio ue Jihova nga mu diondela o kiadi kiê bhenhobho, ngixi:

²⁴ Muadi Jihova, tata! Eie u Ngana uakalelà-ku, selevende ié uandeka kiá o ku mu londekeza kijingo kié, ni kioso kiene o lukuaku lué lua suina; kuma Nzambi kuẋi mu diulu ni mu ngongo, u kala ni uzonda kala o uzonda ué ni kubhanga o ima ia makota kala o ikalakalu ié ia nguzu i uene kubhanga?

²⁵ Ai ué, tatʼé! Se eme nga tenene ue kuzaúka, anga ngi mona o ixi iauabha kiki iala ku sámbua kuná dia Njolodá, ni mulundu uaiuka ió, ni Libano diê, koko!

²⁶ Maji, kuma Jihova ua thathamana ni eme, mukonda dienuʼenu, ua ditunu ku ngʼivua; muene iu ua ngʼambela uixi: Kuabhu, suka kiá! Ku zuele dingi maka iá.

²⁷ Banda ngó ku thala dia mulundu ua Piska u zambule mesu mé ku luiji, ni ku suku ni ku sulu ni ku thunda, ioso u i tale ngó ni mesu mé, mbata eie o Njolodá ku tené ku mu zaúka.

²⁸ Longesa-phe kiambote Josuué, mu suinise, mu kolokotese; mukonda muene ua-nda kutuamenena o mundu iú, ni ku u lunduisa oxi i ua-nda ku kengelelʼii.

²⁹ Kienhókio anga tu nakina mu dikôlo didi dia lulama ni Mbete-piiole.