Matendelelu 29 - O Mikanda Ikola

Nzambi u ta kikutu kióbhe ni kifuẋi

¹ Iá ene o maka ma kikutu kia tumu Jihova kua Mozé, mʼoxi ia Mouabhe, uixi: Ta-na-kiu, ni anʼa Izalaiele, ku thandu dia Kikutu ki nga a bhana kiá bhu Holebe, kuma kiokio kiengi.

² Mozé anga uixana Izalaiele ioso, u a ambela uixi: Mua di muena kioso kia bhange Jihova mʼoxi ia Ijitu, ku mesu menu, kua Falaó, ni ku jiselevende jê joso, ni mʼoxi iê ioso.

³ Ijimbuete iamakota ia kidi, eie ua di muena-iú; ni isunji ni madiuanu mònene,

⁴ maji-phe Jihova ka mi bhana o muxima ua kutetuluka, ni mesu phala kumona, ni mátui phala kuívua katé mu kizuua kia lelu.

⁵ Makuinhi auana a mivu u nga mi endesa mu kikangalakata; izuatu ienu ki ia kukila ku mikutu, ni jisabhatu jenu hanji bhu jasukuê ki ja kukila ku kinama.

⁶ Ki muadi mbolo, ki muanu vinhu, mba makunua moso makódiuisa phala mu ijiie kuma eme muene Jihova Nzambi ienu.

⁷ O ki mua tula-phe bhu kididi kiki, Sehone, sobha ia Hezebone ni Hoke, sobha ia Basane, a tu tundila mu ku tu kauidila phala kubhânga; etu-phe tua a kuama.

⁸ Oxi anga tu a tambula-iu, etu tua i bhana akua Lubene ni akua Ngadi ni kaxaxi ka muiji ua Manasa, mu ubhinganu.

⁹ Maka ma Kikutu kiki bhakenu-u, muende ni ku ma bhanga; phala mu zediue mu ima ioso i mu bhanga.

¹⁰ Leluʼidi enu-oso muene muala bhu pholo ia Jihova Nzambi ienu; ni makota ma ibuka ienu, ni adiakime enu, ni jifixiiadi jenu, ni mala oso mu Izalaiele;

¹¹ ni tuana tuenu, ni akajiʼenu, ni nzuángiza uala muʼaxaxi ka kilômbo kié; tundé ku muẋangiʼa-huinhi lué, katé ku mutekiʼa menha mé;

¹² phala ene oso a bokone mu Kikutu kia Jihova Nzambi ié, ni mu mulôko uoso uate Jihova Nzambi ié nʼeie lelu.

¹³ Mu kusota o ku ku xikika kiambote mu kukala lelu u kifuẋi kiê-muène ngó; o muene ue a ku kale Nzambi ié-eie, kala kia ku ambelele kiá, kala ue kia lokela ku jitata jé, Mbalahamu, ni Izake, ni Jakobo.

¹⁴ O kikutu kienhiki-phe ni mulôko uenhú, eme ki nga mu ki ta ngó nʼenu.

¹⁵ Maji ni uoso lelu uemana nzanza bhabha nʼetu bhu pholo ia Jihova Nzambi ietu, ni ió uoso leluʼidi bhabha kala-bhu.

¹⁶ Kuma-phe enu-enu mua kʼijiia kiambote kioso ki tua nakina mu Ijito, ni kioso ki tua bhiti muʼaxaxe ka ifuẋi ioso i mua sombokʼoio;

¹⁷ ufusa uâ mua di muena-u, ni mahamba mâ, o iá a miẋi, o iá a matadi, o iá a phalata, o iá a ulu, muʼaxaxi ka athu amoxiʼá.

¹⁸ Ki bhu kale-phe diiala muʼaxaxi kenu, mba muhatu, mba diembu, mba kibuka kia muiji, nʼa kala ni muxima u ẋanjuka kua Jihova Nzambi ietu, hé u di ta mu bheza o mahamba ma miji iii; phala muʼaxaxi kenu ki mu kale kima ki sabhukisa lundanji lualulu.

¹⁹ Ki bhu kale ue muthu o kievua maka ma mázui iá mʼònake mu divulu didi, anga ukuata ku di bhomba mu muxima ué, uixi; Ki kidié kima, né ngendʼami kala kia ngi tumu o muxima uami, hanji nga-ndu kalʼami muene ni kutululuka kua mbote; anga ku dinhota u bandekeza-ku uhólua.

²⁰ Jihova phe ka-nda kuẋikina ku mu loloka! inda o njinda ia Jihova ia-nda kuuama, kia ta-ku o difuba diê, mázui moso-phe mòsoneke mu divulu didi ma-nda kuiza ku thandu dia muthu ió, anga u tala na-u hadi; Jihova u mu jima o mbutu bhoxi dia diuluʼabha.

²¹ Jihova u mu tungula ku miji ioso ia Izalaiele, phala ku mu huha, kioso kia soko mázui moso ma Kikutu kiosoneke mu divulu didi dia ngonge.

²² Oso-phe a kèza-ku ku muiji iú, o anʼa a-nda kubalumuka kioso ki mu bhua-ku enu, ni ene kiá ni oso a kà tunda ku makanga, kioso kia mona o mabhebhu a kà sekalesa oxi iii, ni mahaxi mê moso ma mu nemekana-u Jihova.

²³ Mù kuila mua bhiti mbòmbe ia xofidi ni môngua oxi ioso ia seluka iazubha, kuma ia lémbua kuima, ia lémbua kusabhukisa ngó dife dimoxi; mbambe ni kia bhitile mu Sodoma, ni Ngomola, ni Adama ni Nzebouime, a a buikisile kuala Jihova kia mu kuatele o njinda ié ni kutema kuê.

²⁴ Anga miji ia ifuẋi ioso ia kʼèla: Jihova oxi iii ua i bhangela-hi kiki? Kima kiahi kia bheka o njinda isoka kala kiki?

²⁵ Kienhokio-phe a kà a jimbuila kuamba: Mukonda o Kikutu kia tele-nâ Jihova Nzambi ia jitata jâ, kioso kia a katula ku Ijitu, a ki tele dikunda, ka ki suuile.

²⁶ A di tele mu ku kaiela ni ku bheza jinzambi jengi, ni ku ji fukamena, sumbala ka dʼijiia na-ju, o Jihova muene ue ka a bhana-ju kuila ji kituke undundu uâ,

²⁷ Kala kiki-phe Jihova njinda ja mukuata mukonda dia oxi ienhiʼii, ku thandu diê iu ua bheka-ku o mázui moso mala mu divulu didi.

²⁸ Jihova ue, iu ua a katula ni njinda ni kutema, ni kudimbuluka kuònene, iu ua a takuila kʼoxi iengi, kala ki kia di monekena leluʼiki.

²⁹ Ima ioso iosuekeʼoio ima-phe iangene ia Jihova Nzambi ietu; o ioso ia di monekena ia tu tokala etu ni anʼetu, katé kiá ku hádia ni hádia. Phala tuende ni ku kumbidila o maka moso ma Kitumu kiki.