Matendelelu 28 - O Mikanda Ikola

O mabesá ma kutumaka

¹ Eie-phe se uaẋikina kuívua ni muanu uoso o dízui dia Jihova Nzambi ié, anga o jingonge jê joso ji ngala ku ku tendelela lelu, u ji ta muxima, anga u ji kumbidila muene, Jihova Nzambi ié ua-nda ku ku zangeleka, anga ifuẋi ioso mu ngongo i kala ndenge.

² Mabesá oso a-nda kuiza kokué u ua-nda kutambula, enhá: Se ua tumaka o dízui dia Jihova Nzambi ié:

³ Ua kà zediua mu sanzala, ua kà zediua ku mukáu mu ditutu.

⁴ Ia kà zedikua o mbutu i tunda mu divumu dié ni mbutu i tunda mu díbhia dié. Ia kà zediua o mbutu ia ibhaku ié ia jingombe, mba ilunga ia jimbudi jé. Tua kà zediua o tuana tua jingombe jé ni tuana tua jimbudi jé.

⁵ Kia kà zediua o kinda kié ni nguiku ié.

⁶ Ua kà zediua ki u bokona, ua kà zediua ki u tunda.

⁷ Jihova ua kʼènda ni ku ku toluela o jinguma joso ji balumuka mu ku ku kanena, u a nemeka muene bhu pholo ié. Se eza njila imoxi mu kubhânga ni eie, eie ua-nda ku a kaia, a ku lenga mu sambuadi dia njila.

⁸ Jihova ua-nda kutuma kusuku-muina o dibesá diê ku itula ié-eie, ni ku ikalakalu ioso i u bhanga ni maku mé; anga muene u ku bhana kuzediua mʼoxi ioso ia-nda ku ku bhana Jihova Nzambi ié.

⁹ Jihova ua-nda ku ku imika mu ku kala u kifuẋi kia ditungula, kala kia ku lokela-kiu kiá; kikale-phe eie uaiuka o ijiia ia Jihova Nzambi ié, anga uendela jinga mu ikoka iê.

¹⁰ O ifuẋi ioso mu ngongo a-nda kumona kuma, enu mu akua Ngana mu kidi, anga enda ni ku mi ẋila.

¹¹ O jimbote Jihova ua-nda ku ku vudixila-ju kiá, akuenu oso ndenge; u ku bhana-ju ku ibundu ia divumu dié, u ku bhana-ju ku ibundu itunda mu ibhaku ié, u ku bhana-ju ku ibundu ia mavu aʼxi ié, mʼoxi ia lokela Jihova ku i bhana ku jitata jenu.

¹² Jihova ua-nda ku ku jikuila o dibhakelu diê, dia mbote, o diulu, phala diende ni kubhana o mvula ku mavu mé bhu thembu iatokala; anga Jihova muene uzediuisa o ikalakalu ia maku mé. Eie-phe, ua-nda sobhesa miji ia athu avulu, maji eie nuka ua-nda kusobha kima.

¹³ Jihova ua-nda ku ku bhanga u mútue, ku kala u mukila, kana; kididi kié u kala jinga ku thandu, kukala bhoxi, kana; kabasa eie u tumaka jinga o ijiia ia Jihova Nzambi ié i ngala ku ku tendelela leluʼiii, anga u i ta ku muxima, hé uia jinga ni ku i bhanga.

¹⁴ Ku maka iá oso u ngala ku ku tela lelu, kana kubhambuka mu kuila ku dilu mba ku kiasu, anga uenda ni kulandukila kukaiela jinzambi jengi, phala kuia ni ku ji bheza.

O mázui ma kuxibhaka

¹⁵ Kia kà kala-phe kiki, o ki udituna kuividila o dízui dia Jihova Nzambi ié, anga ufula kulunda, ufula kubhanga o ima ioso ia xindi mu ijiia iê ni jingonge jê, ji ngala ku ku tendelela lelu, ua-nda kutala hadi ni mázui kala iá, a-nda kuiza ku thandu dié.

¹⁶ Ua kà kala ni uíndua mu sanzala, ua kà kala ni uíndua ku mukáu.

¹⁷ Kuxixima kua kinda kié, kuxixima kua nguíku ié.

¹⁸ Mbutu i tunda mu divumu dié ikala ue ni uíndua; o mbutu i tunda mu díbhia dié i kala ue ni uíndua; o ibhanga ié ia jingombe, ni ilunga ié ia jimbudi, ikala ue ni uíndua.

¹⁹ Ua kà xixima ki u bokona, ua kà xixima ki u tubhuka.

²⁰ Jihova ua kà ku tumikisa mázui ni lusébu ni kubhondalala ku ima i u bhanga, o ku ua kà sukʼoko usekumuka muene, anga utukumuka uajimi o mbutu mu kathembu kófele ngó, mukonda ua di bhange phulu mu ku ngi ta dikunda ni ikalakalu ié ia iibha i uala kubhanga.

²¹ Jihova a ku tumikise dibhebhu dia peste nda di ku sange, di ku jime o mbutu mʼoxi i ua-nda kulundula, phala ku i vua.

²² Jihova ua kà ku kuama ni uhaxi ua thulu, ni nzonzódia ia kukata-kata, ni kijimba-jimba, ni munza, ni kimaji, ni dixiximinu, ni kiangala, ni kibuika kia idima, ni ngulèle, anga i ku tatesa ni ku ku landameka katé ki u jima o mbutu.

²³ O diulu dioso di zenzamena bhu thalʼa mútue ué di kale dia ngòndo; o mavu ue u u diata bhoxi akale mukuâ ni felu.

²⁴ O ki uinda o mvula Jihova a ku tumikise fufutila; ku diulu kuende muene ni kulalumuka utôkua mbe o ku ku jikinisa katé ki uia muʼalunga.

²⁵ Jihova u ku toluela muene bhu pholo ia ʼnguma jé; mu ku tundila o jinguma jé phala kutakana-na-ju, uila u a kaia mu njila imoxi, eie-phe ua kà lenga lusambuadi bhu pholo iâ, a kà ku lebhula mu jixi joso mu ngongo.

²⁶ Bhuoso bhu ua kà fuila o kimbi kié kikale kúdia kua jinjila ja diulu ni iama ia mukáu mungongo, ki bhua kàla muthu u ji sasumuisa.

²⁷ Jihova u ku tatesa ni mikôngo ia tokala akua Ijito; anga ku di ta matute ni jihana ni madiazela, ma ku kuatela ku mataku, anga uila o saké, lémbua.

²⁸ Jihova ua kà ku kuama ni munhunga, ni kusaluka, ni ufuôfuo, ni kiteketela kia muxima.

²⁹ Anga ku ku iza kiá uendelu ua kuila katé ni mu ʼkumbi dia mediia uenda ni ku babajala kala ki bhanga o kifofo muʼavundu; mu njila joso kuzediua u ku lémbua. Ku muenhu ué uoso u kala ni kubhondalala; izuua ioso aia ni ku ku nhana ni ku ku bhûnda o u ku kudila ku mu mono.

³⁰ Ua kà sakana muhatu, maji muthu uengi u zeka-nê. Ua kà tungaʼonzo, maji muthu uengi u i bokona. Ua kà dima mulenga ua mivide, maji ua kà lémbua kulola-ku kibundu.

³¹ Ngombe ié a ku jibhila-iu bhu pholo ié-bhene, maji ku tenê kudia-ku xitu. O bulu ié a kà i nhana hé a ku ambata-iu bhene bhu uala, anga iendelela muene. Jimbudi jé a ji tambuisa hé jiia ni jinguma jé, o u ku banda ngó, kamoneka.

³² Anʼé a mala ni anʼa ahatu a ku bua-u, anga a a bhanʼê ku miji iengi; eie-phe u talé ngo mesu, uambuka muene kumbi dioso dia kambamba, nguzu ia kubhanga kima kioso-kioso ku i mono.

³³ Idima itunda mʼoxi ié, ni ima ioso kiá i u talela hadi, a i dia kuala povo iengi eie-muène kua ejiia ngó, anga a ku bhondelekʼé ngó kienhiki izuua ioso.

³⁴ Anga ku ku iza kiá kubhuuama, mukonda dia ima i ua muia ni kumona izuua ioso ni mesu mé.

³⁵ Jihova-phe u ku ẋolomona o jiphuna ni matabela anga uila muene ẋôtoto ni kítanga, tunde bhu kànda dia kinama katé bhu thalʼa mútue, anga u lémbua ku ki saka.

³⁶ Jihova ua kà ku ambata nʼeie ni sobha i ua-nda ku di hingixile eie-muène, anga u mi bhakula kuʼathu, kua ejiia ngó nʼeie ni jitata jê; o kuenhoko, kuene ku ua kà bhikila o jinzambi jengi, ja miẋi ni ja matadi.

³⁷ Kuabhu-phe, ua kà di bhanga u kidiuanu, uà kà kituka u musoso, ua kà kala u kima kia jingolela muʼaxaxi ka ifuẋi mua-nda kuà ku bheka kuala Jihova.

³⁸ O ki u kuna idima iavulu ku mábhia, ku ku iza nguédia; u lémbua kumuna kia soko, mbé o kihoho kuenda ni ku idia iene ioso.

³⁹ Ua kà phapha mivide ia vulu, anga u i dimina muene, maji, kua kà katula-ku tuvinho tua kúnua, mba u kanza-ku ji-uva, mukonda tubamba tuene kujeja, tua kà i sasala.

⁴⁰ Mu mikáu ié ioso midiva ukala na-iu muene, maji-phe o maji a kuuaia u a tokoka, kutena ku a mona, mbé o ibundu ia midiva kuenda ni kulalumuké ngó iene mu konda ié.

⁴¹ Uvuala muene anʼa mala ni anʼa ahatu, maji ku tena kukala-nâ nʼa ku bande, mukonda a-nda ku a ambata kuala o kikuka, nʼaii ku ubhika.

⁴² Ni miẋi ié ioso, ni ibundu iaʼxi ié, ienda ni kujikinina jinga ku tubamba.

⁴³ O nzuángiza ua tungu mʼoxi ié, u ku tunda muene kiavulu, ubeta ku di ta kitala; eie-phe u tunuka jinga ngó katé ki u sekala.

⁴⁴ Muene muene uenda ni ku ku sobhesa eie, eie-phe bhu u nomuena kia ku mu sobhesa muène ku mono-bhu. O nzuá-ngiza muene u di bhanga o mútue, eie u kituka u mukila.

⁴⁵ O mázui oso enhá a-nda kuiza mu ku ku sukumukina ku thandu dié; anga a ku kuata muene, anga a kuila o sondemekʼê, katé kia ku jikinisa. Mbata eie uaẋinuka, o dízui dia Jihova Nzambi ié, ngué ku dʼivua. O ijiia iê ni itumu iê ia ku xindila muene, eie-phe ngué ku i aiuka.

⁴⁶ Momué ni mu mbutu ié i ku kaiela, ki mua kà bhua dingi o uíndua ni kuxixima; kia kà di bhanga kianu ku mbutu ié katé ku hádia ni hádia.

⁴⁷ Mbata o Jihova Nzambi ié kua mu bhikila ni vondadi, kua mu bhikila ni kisanngusangu kia muxima, kioso ki uala mu ndumba ia jimbote ja kuvudila.

⁴⁸ Kala kiki, ni nzala, ni dinhota, ni tuẋi, ni kukala u ngadiama ia hatu, ima ioso i ku kamba, inda ua kà bhikila kiá o nguma ni nganga-sèse a-nda ku ku tumikisa-nê kuala Jihova Nzambi ié, muene anga u ku kuzula o kanga ia felu mu xingu, katé kiá ki u jima na-iu o mbutu.

⁴⁹ Jihova ua kà ku kasela muiji ua akua makanga ku jihota jʼaxi, uijiia bhulu mukuâ ni holokoko ia di ambatesa ni kuôna; muiji ua athu a dingula a bhingi o dízui dia zuela eie ku tena ngó ku dʼivua;

⁵⁰ muiji ua isuéia, ua landamaná jipholo, ka ẋila muthu ua kuka kiá, ka xikina ku kuatela henda ia kamona kandenge!

⁵¹ Luvualu luoso ta ibhaku ié ene a kà lu habula anga a lu minha, a kʼèkuta jinga ni idima iaʼxi ie, katé eie ua buika; enhá ima ioso a kà ku bhûnda-iu ka kà ku xila mbolo, mba ngó tuvinhu, mba maji, né ibhanga ia jingombe mba ilunga ia jimbudi, katé eie muene ua jikinina.

⁵² Sanzala jé joso ja kà sekala, kuma a kà ji kondoloka ku jinguma; o imbaka ié ioso iamakota i ua dielelele, ia ku fikidile kiambote, a i lundumuina bhoxi. Mu ididi ioso mu uatungu ua kà kala ni mukondo, a kà ku kondela bhu mielu ioso katé kiá kua suku oxi ioso ia-nda ku ku bhana Jihova Nzambi ié.

⁵³ Kienhókio o mbutu ia mu mala dié, ua-nda ku idia xitu; ua-nda kúdia muene o xitu ia anʼé a mala ni anʼé a ahatu, a-nda ku ku bhana-na kua Jihova Nzambi ié, mu kuila ngongo ja ku kondo kiá, mukonda dia nguma jé ja ku kondoloka mbandu ni mbandu.

⁵⁴ Bhenhobho muthu uoso a kexe ku mu ila mu Izalaiele exi, munjólo, kusangumuka kuvula, mukua kiadi, kienhókio ua-nda ku kituka muthu uaiibha, mesu a kà mu tunda mu mútue, ka kà suua dingi phangʼiê, mba mukajiʼê ene-phe-ne bhu háma imoxi, mba o ana oso hanji a nu xala-ku.

⁵⁵ O kia kuata kudia xitu ia anʼê, muhatu ni mona, ni phange, ka a bhana-ku ka musuinhi, mukonda dia kukamba kima kiengi kia kúdia; kuma mu mukondo ni dilamba dia jinguma jé ja ku kondoloka ku mielu ioso mu jimbonge jé ku kuedi ngé, ua lémbua dingi kima kioso ki u bhanga!

⁵⁶ O muhatu ua fina muʼaxaxi kenu, uoso ua kexe mona bhu kididiʼó katé ka xikana kudiota bhoxi, muenhó, bhu kumbiʼodio ua-nda kukituka muthu uaiibha, mu kubilukila muadi uê uene mu kuzeka bhu jihata jê bhu hàma imoxi, kiene kimoxi kia bhanga ku monʼê ua diiala ni ku monʼê ua muhatu.

⁵⁷ Ua zemba kiki mukonda ngó dia kibu ni ima dingi itundila mʼoxi a inama iê mu kubhanduluka; o kia vuala mona, anga udiê, u a dila mu kasuekèle bhu hota, o munumiʼê a zekele-nê bhu hàma imoxi, u mu imina-u, mukonda-phe dia kukamba kúdia kuengi, kingumba o jinguma jenu ja mi bhondeleka ni ku mi kondela kuene kuoso, anga ku mielu ienu ioso kuila ngé.

⁵⁸ Se ua kambe kualuka ni ku kumbidila o maka moso ma Kitumu kiki, mòsoneke mu Ndunda ienhiʼii, anga u kamba kuxila o dijina diangene dikola, di kuatesa uoma, o dijina dia Jihova Nzambi ié,

⁵⁹ kienhókio Jihova-phe ua-nda ku ku tudikila-ku kiá mabhebhu a makota a madiuanu, eie ni muiji ué uoso ua-nda ku ku kaiela, u mi bhana mauhaxi aiibha, né a a saka, ka xikina kuiluka. A kala mabhebhu aiibha kiavulu, a nangenena; mahaxi aiibha kiavulu, a nangenena.

⁶⁰ Jihova ua kà bhangesa kuila o kikote kioso ni mauhaxi oso a ku kuatele uomʼô, a bhiti na-u akua Ijito, a kà ku vutukila eie, hé a ku naminina muene, anga u di bonga na-u.

⁶¹ Katé ni i-mauhaxi, ni i-mabhebhu ia kambe kukala iòsoneke mu divulu didi dia ngonge, Jihova ua-nda ku ku tumikisa-iu, phala nʼu sekale kiá muene, katé kia ku jikinisa anga uendelela muene.

⁶² Mua-nda kuxala-phe kiá ngó mu tumbalumbalu tua athu, suke mʼokulu-phe muavudile kala jithéthembua ja diulu; mbata eie kua xikina kubhana mátui ku dízui dia Jihova Nzambi ié.

⁶³ Kala mʼokulu Jihova ki kia mu uabhelele kiavulu o ku mi suua, ni ku mi banga mbote, ni ku mi sokolola, kiene ue ki kia kà mu uabhela kiavulu o ku mi sengulula ni ku mi jikinisa, katé ki mu bhua-ku; nda oxi i ua-nda kuvuʼiii, u mi vuza-mu katé mua kukumuka-mu.

⁶⁴ Jihova ua ka mi muangena muʼaxaxi ka miji ioso tunde kua tundu oxi ʼté ku maẋokololo ku iasuku; o kuenhoko kuene kiua ku ua kà bhikila o jinzambi jengi, ja bhingi nʼeie ni jitata jé kiluua mu jʼijiia ngó; jinzambi ja miẋi ni ja matadi.

⁶⁵ Né hanji-phe muʼaxaxi ka miji ienhoio, dinhohenu kua kà di sanga-mu! Katé ni dikànda dié dia kinama, ki dia kà mona ngó kakididi bhu di nhohena! Mbata ue kuenhoko Jihova ua ka ku bhana muxima ua kiteketela, anga u ku bhana mesu a zonzalala, ni muenhu ua bhuuama ni kikote.

⁶⁶ O muenhu ué uila ni uene kala a u nhengeneka, izuua ioso bhu pholo ié bhene! Ukenana ngó, ni mu muanha ni mʼusuku, uia ni kusasumuka! O muenhu uene ue ku uʼindi dingi.

⁶⁷ Kuma ki kúkia, uixi: Uá! kumbi difuê luua; tamanu ngi bhiẋila ku ngoloxi, amoxi usuku kimuua! O kʼiza ngoloxi, uixi: Kúkie, tata! Kuma, sembele muanha! mukonda-phe dia uoma, muxima uenda ni kuilʼê ngó kenené ni kimbuua kia uoma, kingumba o isunji i ua kʼènda ni kudiuana ni mesu mé.

⁶⁸ Jihova ua kà mi bhangesa ku vutukila dingi ku Ijitu mu jinaviiu, ku njila iene ia kuambelele kiá, kuila: Njila iii ki mungu dingi u i kengelela. Kuenhoko-phe mua kà di bhakula ku jinguma jenu, muexi: Tu sumbienu phala tu kale tu abhikʼenu a mala ni abhikʼenu a ahetu, maji muthu ua kà mi sumba ka kà moneka.