Matendelelu 27 - O Mikanda Ikola

Kua bhingi kuimika ditadi dia kimaku, kuene ku a soneka o kitumu

¹ Mozé ni adiakimi anga a bhana o ngonge ku mundu ua Izalaiele, exi: Ijila iii lundenu-iu, i ngala ku mi tendelela lelu.

² Kioso ki uà zubha ku zaúka Njolodá, anga u diata mu ixi ia-nda ku ku bhana Jihova Nzambi ié, bhenhobho bhetula u imike matadi mònene, u ma kaiala ni hála.

³ O ki u zubha kuzaúka, kuene ku ua kà soneka o maka moso ma Kitumu kiki, phala kubokona kiua mʼoxi ia-nda ku ku bhana Jihova Nzambi ié, oxi i zunzumuka lete ni uiki, kala kia ku ambela kiá Jihova Nzambi ia jitata jé.

⁴ O ki u zaúka Njolodá, matadiʼama u nga ku tendelela, imikenu-u muene ku mulundu ua Ebale, mu ma kunge hála.

⁵ Bhenhobho u tunga-bhu ue kalatódio phala Jihova Nzambi ié, kalatódio ka matadi; o matadi mê kana ku ma bhitisa felu.

⁶ Ma kadié ni muzunda ué, u tunge-nâ o kalatódio ka Jihova Nzambi ié; uende ni kusatela Jihova Nzambi ié kuenhoko o jisata ja kuoha.

⁷ Usatela jinga ue jisata ja paze anga bhenhobho údia, usanguluka bhu pholo ia Jihova Nzambi ié.

⁸ O ku matadiʼama kuene ku u soneka o maka moso ma Kitumu kiki, u ma soneka muene ni mixinda ia tono kiambote.

⁹ Anga Mozé uzuela dingi, kumoxi ni jinganga, akua Levi, ambela Izalaiele ioso, exi: Batekela uívue kiambote, eie Izalaiele! Mu kumbi dia lelu ua bhiẋila mu kukala u kifuẋi kia Jihova Nzambi ié.

¹⁰ Kala kiki, enda ni kutumaka jinga o dízui dia Jihova Nzambi ié, o ijiia enda ni ku i kumbidila jinga, ni jingonge joso, ji ngala ku ku tendelela lelu.

O mázui moso ma kà naka ku mulundu ua Ebale

¹¹ Mozé anga uambela o mundu mu kumbi dienhodio, uixi:

¹² Kioso ki mu zubha kuzaúka Njolodá, muila ni Ximinhá, ni Levi ni Juda, ni Isakale, ni Zuze, ni Bejamí, enhá emane ku mulundu ua Ngedizine, phala ku ta kizediuise ku kifuẋi.

¹³ O iá ue, Lubene ni Ngadi ni Asele, ni Nzebulone, ni Dane, ni Nafitali emana ku mulundu ua Ebale phala ku ta mázui.

¹⁴ O jilevita a kà zangula dízui dia hasa ni kuambela Izalaiele, kuila:

¹⁵ Lamba dia ió uoso u iudika kiteka, kia kusonga, mba kia kuzunza, kia di zemba na-kiu Jihova, ufunu ua hete, anga u ki tula bhu hota mu kasuekele. Mundu uoso-phe a kà tambuijila ni kuila: Amén!

¹⁶ Lamba dia ió uoso u lebhula tatʼâ mba mamʼâ! Mundu uoso-phe a kèla: Amén!

¹⁷ Lamba dia ió uoso usondolola o mbambe ia tokala mukuá. Mundu uoso a kèla: Amén!

¹⁸ Lamba dia ió uoso u tondalesa kifofo, na ki luezesa o njila. Mundu uoso a kèla: Amén!

¹⁹ Lamba dia ió uoso u lungulula o kidi kiangene kia nzuángiza, mba kia hukunhu, mba kia mutudi. Mundu uoso a kèla: Amén!

²⁰ Lamba dia ió uoso uzeka ni mukajiʼa tatʼâ, ió-phe ua fukuila o hàma ia tatʼâ. Mundu uoso a kèla: Amén!

²¹ Lamba dia ió uoso muthu uzeka ni kibhaku. Mundu uoso a kèla: Amén!

²² Lamba dia ió uoso uzeka ni phangʼiê ia muhatu, a mu vuala-nê tata imoxi, mba mama imoxi. Mundu uoso-phe a kèla: Amén!

²³ Lamba dia ió uoso uzeka ni ukouʼê ua muhatu. Mundu uoso-ze a kèla: Amén!

²⁴ Lamba dia ió uoso muthu u kuama mukuá mu kasuekèle. Mundu uoso-phe a kèla: Amén!

²⁵ Lamba dia ió uoso utambula nganhu phala kujibha muthu ua kambe kikuma. Mundu uoso-phe a kèla: Amén!

²⁶ Lamba dia ió uoso ufula kuẋikina kiambe o kitumu kiki, anga udituna ku ki kumbidila. Mundu uoso a kèla: Amén!