Matendelelu 26 - O Mikanda Ikola

Jisambatènde ja ʼxi

¹ Mu kuila-phe eie ua bokona kiá mʼoxi ia-nda ku ku bhana Jihova Nzambi ié mʼubhinganu, anga u iʼvua, anga utunga muenhomo,

² u katula ku jisamba-tènde ja ibundu ioso i ua-nda kumuna ku mavu aʼxi ioio ia-nda ku ku bhana Jihova Nzambi ié, anga u i longela mu kinda, uia-na-iu bhu kididi kia-nda kutungula Jihova Nzambi ié, bhua-nda kuxikika o dijina diê.

³ Anga uiza kua nganga uoso uala-ku mu izuuʼomo, hé u mu ambela, uixi: Ngi ki tanga lelu bhu pholo ia Jihova Nzambi ietu, kuila, eme lelu nga bokona kiua mʼoxi ia lokela jihova ku i bhana ku jitata jetu.

⁴ O nganga-phe u tambula kinda bhu lukuaku lué anga u ki tula bhu mbanduʼa kalatódio ka Jihova Nzambi ié,

⁵ eie-phe anga u di hambelela kua Jihova Nzambi ié, uixi: Ku tanga o kidi, tatʼetu kia kexe mu Sídia, uakexe sébhue ngó, iú ua kulumukine mu Ijito, anga u kuata kubunganena muenhomo ni kafamília kófele ngó, kala nzuángiza ia hatu; o kuenhoko kuene kiá kua sokolokela, iú ua di bhange kifuẋi kiònene ni mu kusuína, ni mu kuvula.

⁶ Maji akua Ijito-phe a tu muesa hádi ni mbunda iònene, anga a tu xinda muene ubhika ua kabhikolo!

⁷ Bhenhobho anga tu di tenda kua Jihova Nzambi ia jitata jetu; Jihova-phe ua tu ivu mutendu ua dízui dietu, ua tongolola o dilamba dietu, ni thonga ietu iala ku tu huha, ni kubhondalala kuetu.

⁸ Jihova iú ua tu katula ku Ijito ni lukuaku lua suina, ni isunji, ni ijimbuete, ni madiuanu.

⁹ Muene iu ua tu bheka kunu, iu ua tu bhana oxi iii, oxi izunzumuka lete ni uiki,

¹⁰ O kiki talesa-phe, ngeza kubhakula jisamba-tènde ja ibundu iaʼxi, i ua ngi bhana eie-muène u Jihova. Anga uzangula-phe o jisamba-tènde jenhiji, hé u ji tula bhu pholo ia Jihova Nzambi ié, anga u diunda, u bheza bhu pholo ia Jihova Nzambi.

¹¹ Anga uenda ni kusanguluka mu mbote ioso-phe i ku bhana Jihova Nzambi ié, iene i u tana-na-iu, kumoxi ni dibhata dié, anga o levita ni nzuángiza uoso ua tungu momoʼé, u sanguluka ue.

Musambu ua ió uoso uabhakula madijimu (thule) (lubhaku)

¹² Mu muvu ua katatu, ua tokala o madijimu, kioso ki u zubha o kubhongolola madijimu oso a jimbote ja idima ié, enda ni ku ma uanena o levita, ni kidijila, ni monʼa difundu, ni mutudi ua fundu o diiala, nda akale ni kia kúdia mu diembu diʼeie, phala ekute.

¹³ O Jihova Nzambi ié-phe u mu ambela kiki, uixi: Ku ima ioso i ngʼavu, nga nomona-ku kiangene kia tokala eie, eme nga ki bhana ku levita, ni ku kidijila, ni monʼa difundu, ni mutudi ua fundu muadi uê, kala kiambe o jingonge jé ji ua ngi lekelela; kana ngonge i nga lueza-bhu, kana ngonge i nga landuka-ku.

¹⁴ Kioso kia ngiza o thambi, ku madijimu ki nga nomona-ku kima ki nga dila dilamba diami, lémbue, mba ngala ni kuxila, anga mu kuxila kuami ngi nomona-ku kima anga ngi ki dila ku ufusa uami, mba nga ki te ku muthu ua fu, kana! Inda nga tumaka ngoho o dízui dia Jihova Nzambi iami eme. Nga bhange kala kioso ki ua ngi lekelela eie.

¹⁵ Kala kiki, kuene-phe ku kibuta kié kikôla ku ualʼoko takula mesu mé, tunde mu diulu katé bhabha, u besouale o povo ié ia Izalaiele, u besouale ue oxi i ua tu bhe, kala ki ua lokela ku jitata jetu, oxi iala kuzunzumuka o lete ni uiki.

O kutumaka a ku tendelesa

¹⁶ Bhu kumbi dia leluʼabha Jihova Nzambi ié ua ku tumu ku kumbidila o jingonge jiji ni mabatuilu iá; lunda-ju-phe, uende muene ni ku ji bhanga, ni muxima ué uoso ni muenhu hé uoso.

¹⁷ Lelu-ze ua di tange kua Jihova kuamba muene ukala Nzambi ié, eie uambe uixi, ua-nda kuendela jinga mu ikoka iê-muène, kuma ua-nda kualuka jinga o jingonge jê ni ijiia iê ni mabatuilu mê, ua-nda ku bhana jinga ue mátui kia ku zuelesa.

¹⁸ Jihova lelu ua ku jingisa iu ua ku edi: Tanga-kiu muene kuamba u kala u kifuẋi kiami muene, kala kia ku ambelele kiá, iu ua ku solo phala uende ni kualuka jinga o ijiia iê ioso.

¹⁹ Kifua ua mu bhana o dikuatelu mukonda muene uandala ku ku zangeleka ku thanduʼa ifuẋi ia miji ioso ia bhange; u kale u di tunda diê, u fuma iê, u kijingo kie, u povo ia di zelesa kiasoko; ii ia di lumbila kua Jihova Nzambi ié, kala kia ku ambelele kiá.