Matendelelu 25 - O Mikanda Ikola

Kaxtiku ka isanzu

¹ Se bhu kala athu kiiadi a di kuata mvunda, anga eza kufunda, phala ku a batuila milonga, uoso ualungu mu lungise; o uêle a mu elêse muene.

² Se mukua mulonga uatokala ku mu beta ni ku mu bha isanzu, mufundixi u tuma ku mu zekesa bhoxi, anga u mu betesa muene bhu pholo ié, u mu xindila konda ia kaxtiku ka soko ni mulonga uê.

³ Makuinhi auana a jixikote asoko, kana kuta-ku dingi; kuma-phe, ki uila u sombuesa-ku dingi, phangʼié-phe ua-nda kusekala kiá ku mesu mé.

⁴ Ngombe i titidila o masa kana ku i kuta dikanu.

O diiala kusakana ni mutudi ua phangʼiê

⁵ Se bhu kala jiphange bhuamoxi, anga mukuá ufua-bhu, sé kuxia monʼa diiala, mukajiʼa difundu iú-phe, ka tena kusakana kuengi; kale huediʼê muene u mu sakana; o kijila kia tokala o uhuedi a ki kumbidile.

⁶ O monʼa diiala uoso a dianga ku mu vuala, a mu luke dijina dia difundu phangʼiê, phala o dijina diê ki di jimuke mu Izalaiele.

⁷ Maji, se muene nguê kusakana ni huediʼê, huediʼê-phe abande muene bhu telelu ia adiakimi ni kuila, uixi: Huediʼami-ze uaditunuʼê kutombola o dijina dia phangʼiê mu Izalaiele; mukonda nguê ku kumbidila o kijila kia uhuediʼakime nʼeme.

⁸ Bhenhobho o makota ma dibhata a mu ixane, phala a zuele-nê; o kia jiza, uixi: Eme nguami muene ku mu sakana, nʼa kala muhatuʼami, kuma ka ngi uabhela.

⁹ Huediʼê ia muhatu a mu zukame muene bhua tena o makota, anga u mu zula o sabhatu ku kinama hé u mu ṗhamena mu pholo, anga u mu lebhula, uixi: Diiala uoso u kamba kutungila phangʼiê dibhata, a kà mu bhanga kienhiki!

¹⁰ O dijina dia dibhata diê, mu Izalaiele, a kà di luke: Onzo ia na Kinama-Kiazuluka.

O jimvunda ni ifua iambote

¹¹ Se bhu kala mala aiiadi a di kuata mvunda ia kubhânga, anga o mukajiʼa ió uoso a mu xinina bhoxi uiza kubhângela munumiʼê, o mu ku uanuna anga usunununa o lukuaku luê hé ukuata o nguma moxi a inama.

¹² Muhatu ió mu mu batula o lukuaku; kana ku mu kuatela henda.

O jipezo ni jinzôngo jikale ja kidi

¹³ Kana kuvula jipezo mu muxila ué, anga uila ni jatenena ni ja kambe kutenena.

¹⁴ Mu dibhata dié ku kale-mu ni ji-efa jiiadi ja kuzongela, ni iafika ni ia fumbu.

¹⁵ U kala ni pezo ia kidi iamvimba; u kala ue ni nzôngo ia kidi iatenena; nda ukole muenhu mʼoxi ia-nda ku ku bhana Jihova Nzambi ié.

¹⁶ Muthu uoso u bhanga o mangonha, ió kua Jihova Nzambi ié-phe, kikôla! Kuma Jihova Nzambi ié ua di zemba ni muthu uia ni kufumba akuâ ni ku a bhanga mangonha.

Amaleke a mu jikinise

¹⁷ Lembalala jinga kioso kia ku bhangele Amaleke mu njila mu uejiia, kioso ki ua tundu mu Ijito;

¹⁸ kaẋi muene ua ku tundile anga u ku jibhila o jifalaku jé joso ja xedi kuema, ia a kexi mu ku ku kaiela, kioso eʼmuène ki uedile uabhuila, uaioko-joka; ka kexe-phe ngó ni uoma ua Nzambi.

¹⁹ O kioso-phe Jihova Nzambi ié kia-nda ku ku bhana I kiá o dinhohenu, ku jimbandu kuene kuoso nguma jé joso jabhu-ku, mʼoxi ia-nda ku ku bhana Jihova Nzambi ié mu ubhinganu, phala ku iʼvua, Amaleke mu jime muene o mbutu bhoxi dia diuluʼ ʼabha. Kana kujimba-ku.