Matendelelu 24 - O Mikanda Ikola

O lubongo lua kusenga muhatu; o miii; o dibhute ni jingonge ja mukuá dingi

¹ Se bhu kala muthu u sakana muhatu, o ku pholo ku-aia, se ua mu mono kuila ka mu uabhela dingi kiambote mukonda, uala ni kisemu kioso-kikoso kiaiibha, a mu bhangele mukanda ua kusenga, a mu tule-u bhu lukuaku, a mu ambudise, nda aié,

² Maji-phe, o ku-aii, se uasakané diiala diengi,

³ o diiala diengʼidi-phe ue se di mu zemba kiòmuene, anga u mu bhangela ue mukanda ua kusenga, uixi muangana; mba-phe, se diiala dia kaiadi dia mu sakana kindalʼidi, se diafu,

⁴ munumiʼê uadiangʼó, ka tena dingi ku mu vutukila ku kala mukajiʼé, kia zubha kiá o ku mu kasanesa kuengʼiki. Mukonda o kienhókio kikôla kua Jihova kuma ku mesu mê ió ufusa; oxi-phe ia ku bhana kuala Jihova Nzambi ié mu ubhinganu, eie kana ku i bokuesa lufuku.

⁵ Se bhu kala muthu uabhenga díbhanga diê, muenhó kʼaie luua ku ita; kana luua ku mu tuika kikalakalu ki mu katula ku bhata diê; mu mu ehela a bhite hanji muvu ua muvimba mʼonzo iê; a sanguluke, a di xiale muene, enduluke hanji niʼbhànga diê dia bhenga, nda a bhange o mbote kua muhatuʼê.

Ijila iamukuá

⁶ Matadi ma kuhuhila masa kene ku ma tambula ku kikunji ene kiiadi kiâ ni dia thandu, ni dia bhoxi, né-mbe dia thandu ngó diene, kuma kiokio kuximbika muenhu.

⁷ Se bhu kala muthu unhana muthu ni mukuá, ku phange jê anʼa Izalaiele, phala ku mu bhanga mubhikʼê mba u mu ta uenji, hé u mu sumbisa, muii u kala kiki afue muene. Kifua phekalu ia ufusa muʼaxaxi kenu mua i bhuisa-mu.

⁸ Dimuka jinga ni dibhute, enda ni kukumbidila muene kioso ki ku longa o jinganga, a kua muiji ua Levi; kioso ki nga tendelela eme kua ene, endenu ni ku kuata muanu ku ki bhanga muene.

⁹ Eʼmuene ulembalala ngó kioso kia bhangele Jihova Nzambi ié kua Midiiana mu njila, ki mua tundu mu Ijito.

O kusobhesa mukuenu

¹⁰ Kioso ki u sobhesa kima kua mukuenu, kana kubokona mʼonzo iê mu ku mu tambula kikunji.

¹¹ Eie u kinga bhu kanga, inda mukuenu muene ua mu sobhesa, muene u ku bhekela o kikunji bhu kanga bhenhobho.

¹² O kia kala-phe ngadiama, kikunji kia ku bhe, ku zeke na-kiu;

¹³ kumbi se dia tula kiá, sé phata muene, mu bhekele o kikunji kia ku bhele, nda a di fute-kiu hanji a zeke bhu thanga iê phala a ku besouale. O kienhiki-phe Jihova Nzambi ié u ku mona u muthu uaiuka.

Jingadiama, ni jinzuangiza, ni anʼa difundu afuama ku a kuatela henda

¹⁴ Muthu se uala phulungu, anga uiza ku ku bhangela kikalakalu kia kizuua ku ungunza, eie kana ku mu fumba, né phangʼié, né nzuangiza, kua iá ala mʼoxi ienu u ua tungu-nâ.

¹⁵ Izuua ioso inda ua mu futu o nganhu ie ia lelu, kuile uixi dikumbi kiluua di tula; xinganeka-ze, kuma muene mukua-hadi, o muenhu uê ua dielela ngó bhene bhua kalakalʼabha. Mu bhe-phe, phala ka di tende kua Jihova, ni ki di bhange kituxi kié.

¹⁶ Kana kujibha jitata mukonda dia mulonga ua anʼa, mba mu jibha ue ana mukonda dia mulonga ua jitata; kala muthu ufua mu kikuma kiê.

¹⁷ Diba dia tokala kulungisa nzuángiza mba monʼa difundu, kana ku mu diodia na-diu hé u di lungulula; kana kutambula izuatu ia mutudi ua muhatu mu kikunji.

¹⁸ Maji uenda ni ku lembalala jinga kuila eie uakexe u mubhika mu Ijito, eué Jihova ua ku katula-ku; kiene ki nga ku tendelela kuila eie ue bhanga jinga kienhiki.

¹⁹ O kioso ki u muna idima ié mu mábhia, se ualanduka-mu kita kimoxi, ku ki vutukile dingi; ehá-kiu kiá phala o nzuángiza, ni monʼa difundu, ni mutudi uoso ua fundu diiala; bhanga kienhiki, phala Jihova Nzambi ié a ku bhandulule mu midimu ioso i u bhanga ni maku mé.

²⁰ O ki u lalumuna o muvide ué, ku zubhe. Xisa tu ibundu ku jithangu, mbé o muthu ua tunda dikanga, ni monʼa difundu, ni mutudi.

²¹ O kioso ki u kanza o mulenga ué ua muvide, ku vutuke mu kuangulula-mu o tumbalu-mbalu tua subhuka ku jithangu; tuoso tua subhujuka ehela-tu phala nzuángiza, ni monʼa difundu, ni mutudi uoso ua fundu diiala.

²² Ki ki ku jimbe jinge kuila uakexe u mubhika mʼoxi ia Ijito. Kiene ki nga ku bhela o kijila kiki; eie ue bhanga jinga kienhiki.