Matendelelu 23 - O Mikanda Ikola

Athu oso a a kidika kuiza bhu kionge kikôla

¹ Muthu uoso uala ni mbùmbi, ka tokala kuiza bhu kionge kikôla; o a mu sevala ue, ió bhu kionge kia Jihova ka tena ue kuiza-bhu.

² Muthu uoso a mu lumbula mu nzunga kuala mamʼâ, ka moneka tata ia kidi, ió kana ku mu ehela bhu kionge kikôla; tunde ku mulúlu, katé ku muiji uê ua kakuinhi ka tena kuiza bhu kionge kikôla kia Jihova.

³ Kana kuehela mukua muiji ua Amone, mba mukua muiji ua Mouabhe bhu kionge kia Jihova né o muiji uê ua kakuinhi katé ku hádia ni hádia.

⁴ Mbata o ki mua tundile ku Ijito, ene a ditunine ku mi kauidila mu njila ni mbolo ni menha; ni mukonda ue dia kulukala Balamu, monʼa Beole ku Petole ia Mezopotamiia, phala ku mi ta mázui.

⁵ Maji o Jihova phe ka ẋikinine kuívua ki zuela Balamu; inda Jihova Nzambi ié o mázui ua ma bilula dibesá; mbata Jihova Nzambi ié ua ku zola.

⁶ Eie u di batuka-nê muene, nuka usota kukala-nâ kiambote mba mu kala ku paze.

⁷ Mukua Edomo kana ku mu zemba, ku mu mone uthu uengi, mbata phangʼié; mukua Ijito ue ku mu suekele pholo, kuma ua ku zalelele kiá mʼoxi iê.

⁸ Alaula âene, a-nda kuvuala ku muiji ua katatu, hádia mu a ehela kubhiẋila jinga bhu kionge kia Jihova.

Bhu kilômbo bhu zela

⁹ Se uasulula kilômbo kié kia ita, kuia mu kúlua ni jinguma jé, bhenhobho-phe kibhinga eie u di langa ku ima ioso iaiibha.

¹⁰ Se bhuala disoladi, o muia ku kilu, sé ku ki ta muxima, ua di xidisa mʼusuku iu ua xidi, muenhó atubhuke ku kanga, mu kaẋi ka kilômbo ka kale-mu,

¹¹ a nange muene ku kanga, o ku ngoloxi a dʼiẋike ni menha, kioso ki tula dikumbi, a bokone kiua mu kilômbo.

¹² Eie u kala jinga ni kididi ku maxilu a kilômbo; kuene ku uenda ni ku di tela jinga.

¹³ Mu kala jinga ni pá muʼaxaxi ka ibhakatu ienu ia ita, ki uia ku iangu ukanda na-iu kadikungu, o ki u zubha o kuxidisa u lunguluka anga uvumbika dixidilu dioso dia tundu moxi dié.

¹⁴ Mbata o Jihova Nzambi ié ua-lu nhungina muʼaxaxi ka kibangu kié, phala ku ku kudila, ni ku ku bhakuila o jinguma jé; kibhinga-phe o kibangu kiê kizela; phala ka ku mone ni kima kia ufusa, hé u ku ta dikunda.

O mubhika kia lenga

¹⁵ O mubhika se ualenge kua ngana iê, iu ueza kokué, eie kana ku mu bhakula dingi kua muene ua mu vu;

¹⁶ inda atunge kiá nʼeie, atunge ngó mu bhata dienu bhuoso bhua mu uabhela muene, bhua tena kukala kiambote, kana ku mu bhondeleka.

O idianzunga ni akua mituta

¹⁷ Muʼaxaxi ka ilumba ia Izalaiele ki mu kale idianzunga, o muʼaxaxi ka minzangala ia mala ue, ki mu kale ku di ta mituta ni akuá, mu anʼa Izalaiele.

Itadi ia ufusa. O kusobhesa ni avasu

¹⁸ Kioso ki uiza mu kumbidila hasa ié mʼonzo ia Jihova Nzambi ié, kana kubheka-mu kitadi kia lumbula kidianzunga mu uuaia, mba suilu iatundu ku uenji ua imbua i ua sumbisa. Mbata ima iiadi ienhiʼii Jihova Nzambi ié ua di zemba na-iu, kuma ufusa.

¹⁹ Phangʼié, ki uila, u mu sobhesa kitadi, kana ku mu sobhesa ni avasu; kikale kitadi, kikale mákudia, kikale kima kioso-kioso, ki ene kusobhesa ni avasu, eie ku ki bhange.

²⁰ Se mukuaʼxi iengi, ió utené ku mu sobhesa ni avasu, maji phangʼié o ki u mu sobhesa, kana kutambula avasu. Phala Jihova Nzambi ié a ku zediuise ni dibhesá diambote ku thandu a ima ioso i u tula o lukuaku lué phala ku i bhanga mʼoxi i ua-nda kúvua.

Se uabhange polomesa kumbidila-iu

²¹ O kioso ki u bhanga plomesa bhu pholo ia Jihova Nzambi ié, ku laleke-phe mu i kumbidila; mukonda o Jihova Nzambi ié ka fulu ku kuibhula-iu muene mu kidi, bhenhobho-phe, ei ueza mu kituxi.

²² Maji se ua kambe kubhana polomesa, ku kalé ni kituxi.

²³ Uila jinga hé ua zuela kima mu kanu dié, u ki kumbidila muene anga u ki bhanga; né ujitu ua ku di fikixila u uambe kubhana kua Jihova Nzambi ié; kioso-phe kia tanga o dikanu diê u ki bhanga muene.

Ki u kala ni nzala, hé ukutuka mʼobhia dia mukuenu

²⁴ O kioso ki u kutuka mu mulenga ua mivide ia mukuenu, diá ngó ji-uvua joso jasoko ni nzala ié, katé ki uikuta, u suke; kana kuambata-ku kima mu kinda kié.

²⁵ O kiu kutuka mu díbhia dia mukuenu, bukula ngó ni maku o mítue ioso ia masa iasoko ni udile nzala ié; kana kukuata omvo mu kumuna iadimi mukuenu.