Matendelelu 22 - O Mikanda Ikola

Mukuenu u mu zola. O kubonga kioso kia jimbila

¹ Se u mona ngombe mba mbudi ia phangʼié ia jimbidila, ku i ehele kusomboka; kuata-iu u i tumikise kua phangʼié, sè kufula.

² O kʼikala-phe phangʼié uene makanga, mba ua kambe ku mu ijiia, kiene kimoxi, kuata-ju u ji tambule konda, katé mukuenu kieza ni ku ji sota, u mu bhane-ju.

³ Kienhiki kiene ki ubhanga jinga, kixi kabulu, mba izuatu, mba kima kiosokioso kiatexika kiangene kia mukuenu, kia jimbidila, eie anga u ki bonga, kana ku ki sueka.

⁴ Ki u mona bulu, mba ngombe, ia mukuenu, ia dibhalela mu njila, eie kana ku bhita ngó ni usombokʼé maji u mu kuatekesa ku ji balumuna.

O izuatu ia diiala ni ia muhatu ni ijiia ia mukuá

⁵ Muhatu ka tokala kuzuata kizuatu kia diiala; o diiala ue ka tokala kuzuata kizuatu kia muhatu; mbata uoso ubhanga kiki kifusa ku pholo ia Jihova Nzambi ié.

⁶ Mu kunhunga kué, se ua sange kikalanga kia njila ku mbanduʼa njila mu muẋi mba bhoxi, mu kikalanga anga mu kala tunjila, mba maiaki, kuile-phe ni tuana ni mama uambata;

⁷ uambula o màma, anga eie uxala ni tuana, phala u tunge u some, uvule izuua ia kukola o muenhu.

⁸ Kioso ki u tunga onzo iobhe, o bhu hongo kondoluesa-bhu kifikidilu bhu ditala dioso di u iudika-bhu, phala ki mu langumuke muthu bhu hongo ié, anga eie uiza mu mulonga ua manhinga, exi, uajibha.

⁹ Díbhia dié dia mivide ku di vudise jimbutu ku idifua-idifua, mbutu joso muene, javula kuseluka, o mulenga ua midiva ue ki u tena kuima kiasoko.

¹⁰ Kana kuila ku arado imoxʼiii u kutila-ku bulu ni ngombe bhuamoxi, anga ukuata kudima.

¹¹ O ki u zuata, kana kufungisa ni lã ni linho bhuamoxi.

¹² O thanga ié ia kudifuta u i ta jifalanja jiuana bhu jithungi.

Jikaxtiku joso ja tokala ituxi ia phànda

¹³ Se muthu usakana muhatu, o kia zubha ku muijiia anga u mu zemba,

¹⁴ u mu tatela ima ia malebhu, u mu fumanesa ku mundu, uixi: Muhatu iú, ngedi ngi zubha ku mu bhenga, o ki nga tuia-nê moxiʼanzo, nga sange kuila undenge uê kʼala na-u dingi;

¹⁵ o tata-phe ia kilumba kiki ni mama azangule malasola ni ijimbuete ia undenge uê, aie-nê ku adiakimi a mbonge, a xikame bhu dibhitu,

¹⁶ o phaiʼa kilumba a di kexiale ku adiakimi, kuila: Enu jingana, monʼú nga mu bhana mʼonzo ia kusakana ku diiala didi, maji-phe o munumiʼê ua mu iibhila kiá.

¹⁷ Kua bhingi-phe ua mu tatela kiá ima ia isunji, uixi: Monʼé kikumbi ua ki texi. Ijimbuete-phe ia kikumbi kia monʼami iene kiabhuʼiii. Anga afutununa dilasola bhu pholo ia adiakimi a diembu.

¹⁸ Adiakimi-phe a mbonge ienhoio anga akuata diialʼodio na mu bhane o kaxtiku kê.

¹⁹ A mu futisa hama ia itadi ia phalata, phala na i bhana kua phaiʼa kilumba; mbata muthu ió ua fumanesa kiaiibha ku kilumba kia muzeletete mu Izalaiele. U sakana-nê muene izuua ioso ia muenhu uê; ka tena ku mu senga.

²⁰ Maji, se ki kala kituxi kia kidi kiate o kilumba, kikumbi ua ki texe ni kidi, kuma o undenge ka mu sange na-u,

²¹ kilumba muenhô aie-nê bhu muelu ua tatʼâ, o akua-bhata diê bhenhobho a mu bube ni matadi katé kiafua; mukonda uabhange ulaji mu Izalaiele, o ku di bhanga ndumbu mʼonzo ia tatʼâ; mu kubhanga-phe kienhiki, mua di zelesa.

²² Se bhu kala diiala a mu sanga ua zeka muhatu uangene ua dikaza, kiiadi kiâ áfue muene, ni diiala dioso diazeka muhatu ni muhatu muene. Kuabhu-phe, mu kubhanga kiki Izalaiele mua i zelesa.

²³ O ki bhu kala monʼa kilumba, a mu solo ngó kuala diiala, anga bhu kala diiala diengi mu sanzala u mu endesa, hé u ta-nê kituxi,

²⁴ mu a kuata kiiadi kiâ, anga muia-nâ bhu muelu ua mbonge ienhoio, anga mu a bûba ni matadi, katé kiafua; o kilumba, mukonda nguê kudikola mu sanzala; o diiala, mukonda dia sebulula mukajiʼa mukuá; o ki mu zubha kubhanga kiki, mu kaẋi kenu mua zelesa-mu.

²⁵ Maji se bhu kala diiala diala kunhungina mu mukáu, anga di sanga-mu monʼa kilumba, a mu solo kiá, anga diialʼidi di mu lundamena bhoxi, di mu zeka; diialʼodio mu jibhienu muene ngó ubheka uê mukonda dia kuzeka-nê;

²⁶ maji o kilumba kana ku mu bhanga kima; kilumba kʼalé ni mulonga ua kima u fuama ku mu jibha; mukonda kiasoko ni kifumbe u balumuka mu ku jibha muthu ni mukuá, hé u mu katula muenhu uê; kiene kimoxi ni kiki.

²⁷ Mbata kilumba a mu sange mu mukáu; o kilumba a mu solo ua dikola, maji o ua mu kudila-phe, kamoneka.

²⁸ Se diiala di di bonga ni monʼa kilumba, uala muzeletete kiluua ngó a mu sola kuengi, anga u mu kuata, uta-nê kituxi, anga a a kuata,

²⁹ diialʼodio, afute makuinhi atanu a itadi ia phalata kua phaiʼâ, mukonda ua mu jingununa, anga usakana-nê kiá; maji ka tena ku mu senga, katé bhu ufuilu.

³⁰ Ki bhua kà kale muthu u sakana mukajiʼa tatʼâ; ki bhua kà kale muthu u vungununa o hama ia tatʼâ ni ku i fukuila.