Matendelelu 21 - O Mikanda Ikola

O Sata ia kujimuna mulonga ua kijibha kiòbonge, se o uajibha ukamba kumoneka

¹ Se mʼoxi ia-nda ku ku bhana Jihova Nzambi ié, mua sange-mu kimbi kia muthu, ua fuila mu mukáu, o ua mu jibha ki mua mu ijiiia,

² bhenhobho ni makota ni afundixiʼé a balumuke, aie a zonge o dikanga tunde bhuala o kimbi katé ku jimbonge joso jatungila bhua zukama ni mukáu uoso uafuila o kimbi.

³ O mbonge ioso iabeta ku di zukama ni kimbi, makota ma mbongeʼoio akuate seseme ia ngombe ia mukaji, ioso kiluua ibhita ku kikalakalu, kiluua iambáta kimbámba.

⁴ Anga makota ma mbonge ienhoio abheka kangombe koko mu dikôlo dia kitumba kia maxinde, nuka a dimine-mu, nuka ue a kunine-mu; o kangombe a ka batuile mútue muenhomo.

⁵ Kienhokio-phe o Jinganga ja anʼâ Levi ji bhiẋila-bhu, kuma o Jihova Nzambi ié ua a sola phala ku mu bhikila muene, ni kubenzela athu mu dijina dia Jihova; o ki bhu kala mulonga, mba manhinga, enhá ene a batula o maka.

⁶ Adiakime oso atokala ni mbonge ialulamena bhua fuila o mufi, a sukule maku mâ ku thanduʼa kangombe ku mua batuila o mútue mu dikôlo;

⁷ anga ata hasa, muthu ni muthu, exi: Maku metu ki ene a zunza o manhinga a mufiʼiú, o mesu etu ki ma mu mono kioso kia mu jibha.

⁸ Uila kiki-phe, eie Jihova, o mundu ué ua Izalaiele luuluka-nâ, Eie-muène ua a kula, kana ku a xina ku thandu diâ o mulonga ua manhinga ma muthu iú ua kambe kikuma. Kuabhu-phe, o manhinga momo a ma katula kiá ku konda iâ, ene anga a di zela.

⁹ Mu ku bhanga kiki, mua katula o manhinga ma muthu ua kambe kikuma muʼaxaxe kenu, kuma mua kumbidila ima iafuama ku mesu ma Jihova.

Muhatu a mu kutu mu ita

¹⁰ O kioso ki uia ku di lua ni jinguma jé, o Jihova Nzambi ié anga u ku bhana-nâ bhu maku, eie anga u kuta amoxi-mu uia-nâ ku bhata,

¹¹ o ki uila o jipelezu suí, anga u mona-mu muhatu ua uabha kiambote, eie anga u mu sendukila, u mesena kusakana-nê,

¹² bhenhobho, eie muʼambate-phe uize-nê ku bhata dié. Muene abhute hanji mútue uê, a di sese iala.

¹³ Anga u zula o kizuatu kia upelezu uê a xikame mʼonzo ié ni kudila o thambi ia tatʼâ ni mamʼâ, katé kia tenesa mbeji ia muvimba. Kioso ki ibhua kiene kiua kia kala mukajiʼé; muene ue kiene kiua kia ku bhanga u munumiʼê.

¹⁴ Maji-phe, se ka ku uabhela dingi kiasoko, mu ambudise-phe, aié; kana ku mu sumbisa mu kitadi, mba u mu kitula kima kia kutela kambala, mbata eie ua mu tununa kiá, kuma uakexe mukajiʼé.

Kioso kia tokala ana a phande-kumbi

¹⁵ Se bhu kala muthu usakana ahatu kiiadi, anga o iú u mu zola, o mukuá u mu zemba, o iú a mu zembe anga uvuala ana, o ió a mu zolo anga uvuala ue ana, maji o phande-kumbi anga a mu vuala kuala muhatu ió a mu zemba,

¹⁶ bhu kumbi dia kulunduisa dibhata diê ku ana, o ukota ka tena ku u bhana ku mona ua muhatu ua kazola, nʼa u tambule ku monʼa muhatu a mu zemba, ua mu tokalele.

¹⁷ Kale u u bhana muene kua monʼa muhatu a mu zemba; mu kulunduisa, u mu lunduisa mabunda maiadi ku ima ioso iavu; mukonda muene monʼê a mu vualele mu kivula nguzu, muene o kibundu kiadianga kia nguzu iê, ukota muene ua mu tokala.

Ana oso a bhukumuka

¹⁸ Se bhu kala muthu u vuala mona uedi ni kubhukumuka ni kuhuka, ka xikina kuívua ki zuela tatʼâ, mba ki zuela mamʼâ, anga a mu ila o betʼé, lémbue.

¹⁹ Tata ni mama a mu kuate, aie-nê ku adiakimi a mbonge iâ, a mu tule bhu muelu;

²⁰ a tangele adiakimi a mbonge, exi: Enu, jingana, tata, o monʼetu iú (ua tu tundu o thulu), kuma uedi ni kuhuka ni kubhukumuka, ka xikina ku tu ivua ki tu zuela; iu uedi ue, ni ungandixi ni uhólua.

²¹ Bhenhobho-phe athu oso a mu mbongeʼomo a mu bûba ni matadi, katé kiafua; mu kubhanga kiki, eie ua bhuisa kikuma muʼ axaxe kenu, phala Izalaiele ioso kia kʼivua, a kale ni uoma.

Imbi ki iafuama kuzekela ku muẋi ua dinhengenu

²² O kioso ki bhu kala muthu uate mulonga u bhinga Sendesa ia kalunga, exi afue anga a mu nhenga ku muẋi,

²³ o kimbi kiê ki ki xialele bhulu dia muẋi, kana; kale lelu muene mu ki funda; mbata uoso a mu nhenga ku muẋi a mu te mázui kua Jihova; kala kiki, eie ku mu nangese ku kimoxi, phala oxi ié ki i tambule lufuku, oxi ia ku bhana Jihova Nzambi ié.