Matendelelu 20 - O Mikanda Ikola

Kitumu kia oso aia ku ita

¹ Kioso ki u tunda mu kuia kúlua ita ni jinguma jé, anga u mona jikabalu, ni makalu, ni makuenze mabeta kuvula eie ndenge, kana ku a kuatela uoma; mbata o Jihova Nzambi ié, uoso ua ku katula kʼoxi ia Ijito, ua ku bande.

² Kioso-phe ki mu bhiẋila bhu kididi kia ita, nganga a bhite ku pholo ambele o povo,

³ kuamba: Ivua, u Izalaiele, lelu mueza kúlua ita ni jinguma jenu; muxima ki u mi botomoke, mba mu kala ni uoma, ki mu tekete, kana; kioso ki mu a mona, ki mu kale ni kimbuua.

⁴ Mbata o Jihova Nzambi ienu muene uala kuia nʼenu mu kúlua ita ni jinguma jenu, phala ku mi bhulula.

⁵ Bhenhobho-phe o jifixiiadi ji tangele mundu ni kuibhula kiki: Mukuahi uatungu inzo iobhe, iabhingi hanji oku i lumbila? A vutukile ku bhata diê, phala ki ki bhite kuila muene ufuila mu itʼumu, onzo iê anga a i lumbila kuala muthu uengi.

⁶ Mukuahi uaphaphe díbhia dia mivide, maji kiluua a tomona ku ibundu iê? A vutukile ku bhata diê, phala ki ki bhite kuila muene ufuila mu ita mumu, o díbhia diê nʼa di tomone kuala muthu uengi.

⁷ Mukuahi ua solo muhatu, maji ka mu bhenga luua? A vutukile ku bhata diê, phala ki ki bhite kuila muene ufuila mu itʼumu, dibhânga diê na di lundule kuala diiala diengi.

⁸ Jifixiiadi a kolokote muene ni kutendelela o kifuẋi ni kuibhula, kuamba: Mukuahi uene ni uoma, uala ni muxima ua botomoka? aie kiá, a vutukile ku bhata diê, tua lengesa kuila uavula kusambukisa akuá o muxima uê ua uoma, anga u botomokesa o muxima ua jiphange jê kala o uê-muène.

⁹ O ki zubha jifixiiadi ku tangela o kifuẋi imʼiii, a kà sola kiá o ilolo ioso ituamena o ibuka ia ilolo iʼeta.

¹⁰ O kioso ki u bhiẋila ku diembu phala ku di lua, dianga ku di felesela o paze.

¹¹ Se o diembuʼodio dia xikina o paze iene, anga di ku jikuila o mabhitu mê, kuabhu-phe, mundu uoso uatokala-mu ukale akua lubhaku lué anga enda muene ni ku ku bhikila.

¹² O ki kala-phe nguâ paze, anga ua mona ia a kuata ku jixibhata phala kúlua ita nʼeie, eie-phe u a konda kiá.

¹³ Bhenhobho Jihova Nzambi ié mbanza ioio ua-nda ku ku bhana-iu bhu maku; mala oso-phe ala-mu bhitisa-na-u ku maju a xibhata.

¹⁴ Mu xa ngoho ahatu, ni tuana tua ndenge, ni ibhaku; ima ioso i u sanga mu diembuʼomo, umvuama uâ uene uoso, u kale mbole ienu; sembele mu die-ku ku mbole ia jinguma jenu, ji mi bhana kuala Jihova Nzambi ienu.

¹⁵ Kienhiki kiene muene ki mu bhanga ku madiembu oso a ku kala bhualebha, oso ka tokala mu jixi jiji ji mua-nda kulundula.

¹⁶ Maji o madiembu ma ifuẋi iii ia ku bhana Jihova Nzambi ié mu ubhinganu nuka uxa-mu kima kiala ni muenhu kia-lu bhuima.

¹⁷ Kikale mu ki jikinisa muene, sé kuxa-ku kima; ni athu akua Hiti, ni Mamodi, ni Makanana, ni Mapelezeu, ni Mahivi, ni Majebuzeu, kiene kia ku tendelela Jihova Nzambi ié, kiene.

¹⁸ Kuma avula ku mi longesa kufikisa o ima iâ, ia ufusa ni kubhuma, iene kubhanga ene ku jinzambi jâ ja mahamba; anga a mi tesa kituxi kua Jihova Nzambi ienu.

¹⁹ O ki u kondoloka o diembu mu izuua iavulu, mu kúlua na-diu phala ku di tambula, o miẋi iâ i a phaphe-mu kana ku i kokela bhoxi ni dikuua, kuma eie uanda kudia-ku ku ibundu iê; ku i koke-phe (kuma o miẋi ia mukáu uodime inene o huta ia muthu) sembele iene ue ia ku fikidila.

²⁰ Inda o miẋi ngó, ioso i uejiia kuma kʼene ku iʼdia, ioio kokela-iu bhoxi, u i jikinise; iene i u bhanga na-iu o imbaka ia kukonda o mbonge mu jimbandu katé eie ua i tolola.