Matendelelu 2 - O Mikanda Ikola

Izalaiele a mu tolola bhu Hôloma

¹ Kienhokio-phe kiene ki tua biluka anga tu di tela ku kikangalakata, ku njila ia lungu ku musanza ua Kalunga Kakusuka, kala kia ngambele Jihova, anga tu kuata kuingumuka o mulundu ua Seíle mu izuua iandumba muene.

² Jihova bhenhobho u ngi zuelesa, uixi:

³ Mulundu iú mua u ingumuka kiá kiavulu; lungenu ku mbandu ia kusuku.

⁴ O mundu tumina-u, kuila: Muanda kubhita mu jimbambe ja jiphange jenu, o anʼa Izaú, a tungu mu Seíle; ene-phe a-nda ku mi kala ni uoma; maji enu-phe di langienu kiambote.

⁵ Kana ku di kuata-nâ, mbata Eme ki nga-nda ku mi bhana-ku né ngó kama kua Izaú mu ubhinganu.

⁶ Kudia kuoso ku mua-nda kúdia mu ku sumba-nâ mu kitadi; o menha ue, oso u mua-nda kúnua, mu ma sumba mu kitadi.

⁷ Kuma Jihova Nzambi ié ikalakalu ioso ia maku mé ua i zediuisa muene; muene ua kʼijiia kiambote kuila eie u ngenjiʼa-thumba uala kuenda mu kikangalakata kia dikotʼiki; o mu makuinhi auana a mivu oso iá, Jihova Nzambi ié ua ku bande muene, ki kuala kima kia ku kambe.

⁸ Kienhokio-phe ki tua kexe kubhita mu jiphange jetu, anʼa Izaú a tungu mu mulundu ua Seíle, tua-lu kungila njila ia kiphenza kia Elate ni Enzone-ngabele, tualulukile anga tu di tela njila ia kikangalakata kia Mouabhe.

⁹ Bhenhobho Jihova phe u ngʼambela, uixi! Mouabhe kana ku mu tatesa, kana kúlua-nâ mvunda, mbata ku ixi iê, ki nga-nda ku ku lunduisa-ku kima; kuma oxi ia Ale nga i bhana kiá anʼa Lote mu ubhinganu uâ.

¹⁰ (Adiangele kutunga-mu mu xahúlu o Mamimi, kifuẋi kiadikota, kia musoko-soko, alebha kala o anʼa Anake.

¹¹ Anga ene uâ a a luka exi Jinefalimi kala o akua-Anake; akua-Mouabhe-phe anga a a luka exi Ji-Emeu.

¹² Mu xahulu akua Hole ue a tungile mu Seíle, maji anʼa Izaú a a muanganesa-mu, ia a a buikisa muene katé kia a-bhu ku mesu, anga ene a tunga mu jingùndu jâ, kala kiki kia bhange anʼa Izalaiele mu ixi ia undundu uâ, ia a bhana kuala Jihova.)

¹³ Balumukenu-phe kiá, mu zaúke kahonga ka Zelede; kienhokio kiene ki tua zaúka o kahonga ka Zelede.

¹⁴ O izuua-phe i tuende, tunde bhu Kadexe-Baneia katé ki tua zaúka o kahonga ka Zelede, bhua bhiti makuinhi a tatu a mivu ni nake. Mu thembu ienhoio-phe o muiji uoso iuná ua mazonda ma ita ua jimi kiá, mu kilômbo anga a bhua-mu, kala kia a lokelele Jihova.

¹⁵ Mu kienhokio lukuaku lua Jihova lukuata kua sondemeka phala ku á jima o mbutu katé kia a buikisa muene kilômbo ngùndu.

O kubhita mu Ale ni kuzaúka o honga ia Anone

¹⁶ Mu kuila-phe kiá mazonda oso mu kaẋi ka kifuẋi a jimi-mu ni kúfua, kalunga ka ambata,

¹⁷ kiene kia ngi zuelesa Jihova, uixi:

¹⁸ Lelu ua-nda kubhita mu Ale, mu jimbambe ja Mouabhe;

¹⁹ anga ubhiẋila bhua di lulama ni anʼa Amone; kana-phe ku a tatesa; kana kuzoka-nâ mvunda; kuma ku ixi ia anʼa Amone, ki nga-nda ku ku lunduisa-ku kima, mbata nga i bhana kiá ku anʼa Lote mu ubhinganu uâ.

²⁰ (Oxi ienhiʼii ue ia kexi ixi ia mazonda, o Jinefalimi, a tungile-mu mu xahulu; akua Amone-phe a a lukile exi Jinzanzumine.

²¹ Kifuẋi kionéne, a kexi nzungule hé alebha o kitala, kala o mazonda anʼa Anake; Jihova phe ua a jikinisa bhu pholo ia akua Amone; ene-phe hé a a muanga anga a bhingana bhu kididi kiâ.

²² Anʼa Izaú ue kiene kia a bhange mu Seíle kuala Ngana, kuma muene ua jikinisa akua Hole, ene ia a a muange, anga anʼa Izaú abhingana mu kutunga bhu kididi kiâ, katé mu kizuua kia lelu.

²³ Akua-Kafitoli, a tundile mu Kafitoli, ajikinisa ue akua-Hevi a tungile mu jimbonge ja Hazedime katé mu Ngaza, anga a tunga bhu kididi kiâ.)

²⁴ Balumukenu-phe mu katuke ni kuenda, mu kuzaúka o honga ia Anone; talesa-phe Sihone, mukua-Mamodi, sobha ia Hezebone, nga mu bhakula bhu lukuaku lué, ni oxi iê ioso; bokona kiá mu kúvua undundu ué, muandekele muene mu kúlua-na phala mu bhange-nê mvunda.

²⁵ Tunde lelu dienhidi nga-nda kuandeka kuta kimbuua ni uoma ué ku thandu dia mundu uoso bhoxʼabha; oso kiá a ku ivua o fuma, enda ni kuteketa bhu pholo ié a bhondalala ni uoma, mukonda dié-eie.

Sihone sobha ia Hezebone a mu tolola

²⁶ Bhenhobho-phe nga tumikisine ilolo, kioso ki ngala mu kingalakata kia Kedimote, mu kubhinga Sihone, sobha ia Hezebone, ni maka ma paze, kuila:

²⁷ Ngʼehele ngi bhite moxi ié; ngenda muene kikokʼé o kikoka; ki nganda kuabhuka ku kadilu mba ku kiasu.

²⁸ Kúdia kuoso ku ngidia u ngi sumbisa-ku mu kitadi; o menha ue u ngi sumbisa-na-u mu kitadi, oso u nginua; hé kima ngi bhe ngó disesa dia kusombokʼami,

²⁹ kala kia ngʼenzela anʼa Izaú, a tungu mu Seíle, ni akua-Mouabhe a tungu mu Ale; katé ki nga-nda kuzaúka Njolodá, anga ngi bokona mu ixi ia-nda ku tu bhana kuala Jihova Nzambi ietu.

³⁰ Sihone-phe, sobha ia Hezebone, nguê ku tu ehela kubhita moxi iê, mukonda Jihova Nzambi ié ua kolesa o muxima uê, iú ua bhukumuka, phala o ku mu bhana bhu lukuaku lué, kala ki ua di muena lelu.

³¹ Jihova anga u ngʼambela, uixi: Talesa, Eme ngandekela kiá mu ku ku bhana Sihone ni oxi iê. Andeka kiá o kúlua-nê oxi iê u mu tambule-iu ikale kiá ienu.

³² Bhenhobho Sihone anga u tu tundila, uiza ni muene ni mundu uê uoso, ita anga ibhitila bhu Jahaze.

³³ O jihova Nzambi ietu bhenhobho hé u tu thelekala-nê, anga tu mu totola ni muene anʼê ni mundu uê uoso.

³⁴ Mu izuua ienhoio, anga tu mu bua o madiembu moso, mabhata mê moso tua ma buikisa, ni mala ni ahatu, ni tuana; ki tua xisa-bhu, né ngó muthu umoxi.

³⁵ Tuaxala ngó ni ibhaku, tuexi iii mbole ietu, ni ima ioso i tua bhûndu mu jimbonge ji tua tolola.

³⁶ Tunde kiá mu Alouele, ku ibumu ia honga ia Anone, ni diembu dia tungila ku honga ienhiʼii katé ku Ngiliiade, madiembu moso tua ma buba, sé-bhu diembu dia tu ẋangumuka bhu maku; iene ioso Jihova Nzambi ietu ua tu bhakuila na-iu bhu pholo ietu.

³⁷ Maji o ixi ia anʼa Amone iene ngó ki mua diota-mu; né ku mbambe ioso ia kibumu kia honga ia Jaboke, né mu madiembu mala ku thala ia mulundu, mba mu ididi ioso ia tu kidika Jihova Nzambi ietu.