Matendelelu 19 - O Mikanda Ikola

O jimbonge ja dilengelu ni jimbambe jʼokulu

¹ Kioso kia-nda kuzubha Jihova Nzambi ié o kujikinisa akuaʼxi ia-nda ku ku bhana eie kuala Jihova Nzambi ié, eie anga u a vua, anga utunga mu jimbonge jê ni mu jinzo jâ;

² ua kà sola jimbonge jitatu muʼaxaxi ka oxi ié ia-nda ku ku bhana Jihova Nzambi ié phala ku ivua.

³ Anga u di iudikila njila iia ku jimbonge jitatuʼiji, anga oxi ioso ia-nda ku ku lunduisa Jihova Nzambi ié u i uana mu jimbambe jitatu; mbé uoso u bhita ni kijibha kia kujibha muthu, a mone bhua kusuamena.

⁴ Kijibha-phe ni kuvula: o uoso ulengela momo kikale uabhiti ni kiluezu kia kujibha mukuá, sé ngó ku mu kanena, muenhó muene u lengela ku jimbonge jenhojo.

⁵ Ni uoso uia ni mukuá ku mukáu, mu kuẋanga jihuinhi, o kia kuata kukoka muẋi, mu kuhandamana kuê, o dikuua anga disutunuka mu mubhinhi, hé di kuama mukuá, anga ufua; o ió alengele ku jimbonge jenhojo a kole muenhu

⁶ Phala o muzokedi a manhinga, kia-nda ku mu thathamana o muẋima, ka mu kaie na mu kuatele mu njila, anga u mu jibha, mukonda dia kanga dia lebha; mbata muene kalé ni kikuma ki bhinga ku mu jibha, kuma kua tundu, mukuá ka diangele ku di zemba-nê.

⁷ Kala kiki-phe, nga ku bhana ngonge, ngixi: Tungula jimbonge jitatu.

⁸ O ki kala-phe Jihova Nzambi ié u ku vudisila dingi o jimbambe jê, kala kia lokela ku jitata jé, anga u ku bhana oxi ioso kiá ia tangele kubhana ku jitata jé

⁹ (kioso eie ki u kuata kualuka o ijiia iene ioso iii, i ngala ku ku tendelela lelu, phala kuenda ni ku i bhanga—o kuzola Jihova Nzambi ié, ni kuendela jinga mu jinjila jê, izuua ioso) bhenhobho-phe ua kà bandekeza-ku dingi jimbonge jitatu jamukuá, ku thandu dia jitatuʼiji.

¹⁰ Kulengesa ku bhubhisa manhinga ma muthu kala ni kikuma mʼoxi ia-nda ku ku bhana Jihova Nzambi ié mu ubhinganu, phala eie ku kale ni manhinga ku thandu dié.

O kijibhanganga a mu jibha ue

¹¹ Maji o muthu-phe se u kanena mukuá mukonda dia ku mu zemba, hé u mu bhanga kudimuka anga u mu kitukila ni a mu jibhe, anga u lengela mu mbonge imoxi ia kukondamena, ku jimbongʼiji.

¹² Adiakimi oso a tokala-nê bhu bhata diê, a tume o ku mu takana kua lengelʼoko, na mu bhakule bhu maku a muzokedi a manhinga phala a mu jibhe.

¹³ Kana ku mu kuatela henda; bhanga-kiu muene, kífua ua bhuisa o mulonga ua manhinga ma muthu kala ni kikuma muʼaxaxe ka Izalaiele, nda u tunge u some.

Kioso kienda o jimbambe; kioso kienda o jimbangi

¹⁴ Kana ku sondolola jiphiladi ja mbambe ia mukuenu, ioso ià xia o makulu ni makombe mu ubhingano ué, ioso i uvua mʼoxi ioso i ku bhana Jihova Nzambi ié phala ku i bhingana.

O ijiia bhu kaẋi ni umbangi

¹⁵ O ki bhu kala kituxi mba unzangi, mba mulonga uoso-uoso, kana kuívua mbangi imoxi i balumuka mu kutatela muthu; inda mu kanu dia mbangi jiiadi, mba mu kanu dia jitatu, muene mua xikikila o maka oso.

¹⁶ O ki bhu balumuka mbangi ia makutu, anga ulungulukila mukuá phala ku mu tatela mulonga,

¹⁷ o kiiadi kienhiki oso adikuata kiki, aie bhu pholo ia Jihova, ni bhu pholo ia jinganga ni afundixi oso ʼala-ku mu izuua ienhoio;

¹⁸ o afundixi-phe a kà tokuese muene kiambote; o kia sanga kuila mbangiʼoio ia zuela makutu, mukuá ua mu tuika ngó mulonga ua makutu,

¹⁹ kioso-phe kia solele muene kubhanga kua mukuá, kiene muene ue ki mu mu bhanga na-kiu muene; mu ku bhanga kiki, mua katula kituxi muʼaxaxi kenu.

²⁰ Phala oso ue a kʼivua a kale ni uoma, axiala-ku ka tone kubhanga usuéia kala iú muʼaxaxi kenu.

²¹ Kana ku mu kuatela henda; ki kala muene muenhu mu muenhu, diesu mu diesu, diju mu diju, lukuaku mu lukuaku, kinama mu kinama.