Matendelelu 18 - O Mikanda Ikola

O undundu, ni ioso iatokala o jinganga ni jilevita

¹ O jinganga ja jilevita, ni oso kiá atokala mu kibuka kia muiji ua, Levi, kà kala ni mbandu mba undundu mu Izalaiele kala amukuá oso. Hé kima, ene adia jinga ku jisata ja kuoha ni ku undundu uoso ua Jihova.

² Kienhiki-phe ene ka tambula undundu ua kima muʼaxaxi ka ʼphange jâ; Jihova muene ukala undundu uâ, kala ki a ambela kiá.

³ Jinganga-phe kima kia a tokala kienhiki: kia kutambula ku mundu, kua ió uoso ubhakula sata, kixi sata ia ngombe, mba ia tu-ibhaku tuofele: nganga u tambula kibhenza kia lukuaku, ni jinganzuánzua, ni dikutu.

⁴ Muenda ni ku a bhana jinga o ibundu ia mutômo ia masa, ni tiliku, ni maluvu, ni maji, ni lã i u diangela kubhuta ku jimbudi jé.

⁵ Mbata o Jihova Nzambi ié muene ua tungula o nganga mu miiji ié ioso, phala akale mu kikalakalu kia kubhikila o dijina dia Jihova, ni muene ni anʼê a mala, izuua ioso.

⁶ Se kueza levita ua tundu mu mbonge mua tungile mba ku mabhata mé mu Izalaieleʼumu, anga u di bhana ni vondadi ia muxima bhu dibhata diasolo Jihova,

⁷ hé ukuata kusedivila mu dijina dia Jihova Nzambi ié, kala kiala kusedivila o jiphange jê joso, o jilevita jene bhenhobho bhu pholo ia Jihova,

⁸ ene oso mu kúdia a sokela muene ngó kumoxi; o ki tunda mu mauenji mê ma a xila adiʼâ ki di kalela.

O maufusa ma akua-jixi ki ma tokala ku ma fikisa. O aloji ni akua kuzambula ni kubhanga iphata

⁹ Kioso ki u bhixila hé u bokona mʼoxi ia-nda ku ku bhana Jihova Nzambi ié, kana kua kà fikisa maufusa ma akua-jixi enhó!

¹⁰ Momué ki muà kale muthu usatela monʼê ua diiala mba ua muhatu, ni ku mu bhitisa mu túbhia; mba mu kala mukua kuzambula mizambu, mba mukua kusuma, mba mukua kulandula isuma, mba u kala muloji;

¹¹ mba mukua kubhuuíka, mba mukua kutaha ngombo ia jinzambi, mba mukua kubhanga iphata; ki mu kale ue mukua kuibhula phangu ku ma-difundu afua kiá.

¹² Mukonda uoso ubhanga ima kala iii, kua Jihova muenhó mukua-phulu; oko akua-jixi mukonda dia phulu iâ ienhiʼii, kiene Jihova Nzambi ié kia a kaiela kuengi nʼa mi bhue ku mesu.

¹³ Eie-phe kikale utenena kala kia tenena Jihova Nzambi ié.

¹⁴ Mbata akua-jixi iá u ua-nda kúvua, auabhela kuividila akua kuzambula, ni akua ijimbuete ia isuma; maji eie-phe ima ioio Jihova Nzambi ié ua ku kidika-iu.

Polomesa ia polofeta ionéne

¹⁵ Jihova Nzambi ié ua kà ku balumuina polofeta momué, muʼaxaxe kaʼphange jé, mukua nʼeme; muenhó muene kiá mua kà mu ivua.

¹⁶ Kuma kiene-ze ki uabhingile kua Jihova Nzambi ié, bhu mulundu ua Holebe, bhu kizuua kia kuongama, uixi: Ki nga mesena kuivua dingi o dízui dia Jihova Nzambi iami, né-mbe ku di muena dingi o túbhia tuê tu kala kiki, kuma ngavula kúfua.

¹⁷ Bhenhobho-phe Jihova u ngʼambela, uixi: O bhobho azuela muene kiambote, mu ioso ia tange.

¹⁸ Talesa-phe, Eme nga-nda kubalumuna kiá polofeta muʼaxaxi ka phange jé, mukua ni eie, anga ngi mu ta o maka mami mu kanu diê, muene anga u a jimbuila ioso i ngi mu tuma.

¹⁹ Anga kià kala-phe kiki: Uoso u dituna kuívua o maka mami, ma-nda kuzuela muene mu dijina diami eme, o ió ngi mu ibhula-kiu.

O polofeta ja makutu

²⁰ Maji uoso polofeta u di metena mu ukumbu uê kuzuela kima mu dijina diami, sé eme ku mu tuma-kiu, mba-phe u di metena ku ta maka mu dijina dia jinzambi ja kioso-kioso, polofetʼio ua kà fua muene.

²¹ O ki uzuela mu muxima ué, uixi: Tu kʼijiia kiebhi kuila o kizuelu kiki ki kia tundu kua Jihova?

²² Kabasa kiá ki mu mona kuila polofeta uazuela kizuelu mu dijina dia Jihova, maji ki kia di kumbidila, o kia zuela ki kiene kiabhiti, kizuelu kiókio-phe ki Jihova ua ki zuela; polofeta ió ua ki zuela ngó ni izala iê; kana ku mukala ni uoma ua ku mu bhanga kiaiibha.