Matendelelu 17 - O Mikanda Ikola

Kaxtiku mukonda dia mahamba. Mulonga ki bhinga ukala ni mbangi jiiadi mba jitatu

¹ Kana kusatela Jihova Nzambi ié ngombe mba kibhaku kioso kiofele, se kiala ni kisemu mba unema uoso-uoso; kienhókio Jihova Nzambi ié kia mu iibhila.

² Kioso mu mabhata menu moso ma-nda ku mi bhana Jihova Nzambi ié, se diiala mba muhatu u bhanga phulu ku mesu ma Jihova Nzambi iê, anga ubula o kikutu kiê;

³ anga uia mu kubhikila jinzambi jengi, ni ku ji fukamena, dikumbi, mba mbeje, mba ifuẋi ioso iala ku diulu; kima eme ki nga ki tumina;

⁴ anga eie a ku ivisa-kiu, hé a ku ambela kioso ki kia bhiti; eie-phe, tokuesa-kiu muene kiambote; se kia kidi, kia jimbuluka muene kuma mu Izalaiele a bhange-mu kisunji kala kiki, talesa,

⁵ o diialʼodio mba muhatuʼó muia-nê bhu muelu ua kimbaka kia dibhata, anga uoso uabhange o phekalu kala iii, mu mu bûba ni matadi katé kiafua.

⁶ Muthu-phe ku mu jibha kiki, ki kale mulonga uê ukala ni mbangi jiiadi mba jitatu; kana kujibha muthu mu kanu dia mbangi imoxi.

⁷ O lukuaku lua jimbangi luene lu mu andekela o ku mu bûba phala ku mu jibha; anga ku kaiela kiua o mundu uoso; mu kubhanga kiki mua katula o kituxi muʼaxaxi kenu.

Kioso kia ku bhonzo, ibhula jinganga

⁸ Mu kubatula milonga, se bhu kala diba dia ku bhonzo, hé mvunda ia athu a di jibha mbandu ni mbandu, mba dimânda ni dimânda, mba a di kuama enhoso, mba-phe a di kuata jiphata ia a di bhinjika, muʼaxaxi ka mabhata menu; balumuka-phe, u bande ku kibuta kioso kiasolo kuala Jihova Nzambi ié,

⁹ uie ku jinganga ja jilevita, ni kua mufundixi uoso uala-ku mu izuua ienhoio; eie-phe ibhula-u muene kiambote, ene-ze a kà ku jimbuile kizuelu kioso kiatetuluka ki u batula na-kiu o mulonga.

¹⁰ Athu-phe ene bhu kididi kioso kia solo Jihova, hé a ku ambela kima, kiene muene ki u kumbidila; kioso kia ku longo kiene muene ki u tetulula na-kiu o maka.

¹¹ Kioso kia xindi o kitumu, anga a ku lomboluela-kiu, anga ela: Kà batule kiki, eie kiene-phe muene ki u bhanga; kana kuila diba dia ku ambela u di abhuka mu kuila ku kadilu mba ku kiasu.

¹² Muthu uoso-phe usola kunanuka ni ukumbu, na kambe kubatekela kia mu ambela o nganga uene bhu pholo ia Jihova Nzambi ié, ne-mbé kuividila o kizuelu kia mufundixi, nguê na-kiu, kuabhu, muthu ió mu mu jibha afue muene. Sembele mu kubhanga kiki ituxi iende ni kubhua mu Izalaiele;

¹³ mundu uoso nda a kʼivue, a kale ni uoma mu muxima, mbé ka kale jinge ni izala.

O kutungula uoso ukala muenexi, ni kioso ki kala jidevele

¹⁴ Kioso ki u bhixila moxi i ku bhana Jihova Nzambi iê, anga u i-vua, hé u tunga muenhomo, o ki uanda kuila: Ngi di hingisila kiá muenexi, ngi kale kala kiala akua-jixi a ngi kala mu jimbandu;

¹⁵ inda u hingisa-ku uoso a mu sola kuala Jihova Nzambi ié; muenexi u mu nona mu jiphange jé. Kana ku hingisa-ku nzuángiza ua kambe kutanga undandu ni jiphange jé.

¹⁶ O muene-phe ka di vudixile jikabalu; kana kuvutukisa o mundu mu Ijitu, mu kuvudisa dingi jikabalu; mukonda Jihova ua mi ambela, kuila: Njila iii ki mungu dingi mu i vutukila.

¹⁷ Ka ki sese ue ku di vudixila ndumba ia ahatu, avula ku mu nhunganesa o muxima, anga ukuata ku di vudixila ue o phalata ni ulu.

¹⁸ O kia-ndu zubha ue kutulama kiá ku kiandu kia usobha mu utuminu uê, u kopiiala kitumu kiki mu divulu phala muene, u katula mu divulu dia kitumu kiala na-kiu o jinganga ja akua-Levi.

¹⁹ Anga ukala jinga na-kiu muene bhu mbandu iê, hé uenda ni kutanga-mu izuua ioso ia kala ni muenhu; nda a di longe kukala ni uoma ua Jihova Nzambi iê, phala alunde o izuelu ioso ia kitumu kiki, ni jingonge jiji, mbé o ku ji bhanga.

²⁰ Kulengesa o kuila muxima uê u kala ni izala, nʼa lungulukila o jiphange jê; phala ka batuke ue ku kijila, nʼa di tele ku kadilu mba ku kiasu; mbé o izuua iê-phe ia kukala ku utuminu iende ni kuvula muene, ni muene ni anʼê muʼaxaxi ka Izalaiele.