Matendelelu 16 - O Mikanda Ikola

O jifesa jitatu: Moxi ia Phasu; Kadi ia Pendekoxe; tatu ia Jifundu O Phasu

¹ Aluka mbeji ia Abibe, ubhange jinge o fesa ia Phasu kua Jihova Nzambi ié; mukonda bhu mbeje ia Abibe bhene bhua ku katula Jihova Nzambi ié ku Ijito, mʼusuku.

² Bhu Phasu u satela jinga-phe Jihova Nzambi ié o jimbudi ni jingombe bhu kididi kioso kia solo Jihova Nzambi ié, kukala dibhata dia Dijina diê.

³ Bhu fesa ii kana kúdia mbolo i kala ni felemendu, sambuadi dioso dia izuua muenda ni kúdia jimbolo ja hângala, jimbolo ja dilamba, (mukonda mua tunda ni lusolo mʼoxi ia Ijito) jene ji mi lembalesa kizuua ki mua tundu ku Ijito; kienhiki nuka ki mi jimba, izuua ioso ia muenhu uenu.

⁴ Mu sambuadi dioso dia izuua iii ki mu kale ni felemendu mʼoxi ienu ioso ni mu jimbambe jenu joso; o xitu i mu jibha mu ngoloxi, kizuua kia dianga, mu i zubha muene ni ku i-dia, ki ku subhuke kima katé mungu mu kimene-mene.

⁵ Fesa ia Phasu, kana ku i satela kuoso-kuoso, kikale bhu bhata dié éiʼmuene, dioso dianda ku ku bhana Jihova Nzambi iê.

⁶ Kikale ngó bhu kididi kia solo Jihova Nzambi ié ku kala dibhata dia Dijina diê, bhene bhu usatela o Phasu mu ngoloxi, ki tula dikumbi, bhu kithangana ki ua tundile ku Ijito.

⁷ Anga u i lamba, u i dila bhu kididi kia tungula Jihova Nzambi ié; o ki kúkia mu kimene, kiene ki uvutukila mu jibalaka jé.

⁸ Udia jimbolo ja hângala katé mu izuua isamanu, o kizuua kia kasambuadi-phe kizuua ki kôla phala Jihova Nzambi ié; kana kubhanga-mu kikalakalu kioso-kioso.

O Pendekoxe

⁹ Kienhókio u kondala-phe kiá sambuadi dia semana, u andekela bhu kizuua kia kuila omvo a i te kiá mu mábhia, phala kumateka kumuna, anga eie uandeka kukondala sambuadi dia semana.

¹⁰ O ki ji bhita kiene ki u bhanga fesa ia jisemana phala Jihova Nzambi ié; kioso kia ki u bhakula bhenhobho, kikale lubhaku lua vondadi ié lu u kuata; lusoke-phe kala kioso kia kubhandulula kuala Jihova Nzambi ié.

¹¹ Kienhokio-phe anga utana ni kusanguluka bhu pholo ia Jihova Nzambi ié, eie, ni monʼé ua diiala, ni ua muhatu, ni selevende ié ia diiala, ni ia muhatu, ni levita uoso uatungu-nê mu mbonge ienu, ni nzuángiza, ni monʼa difundu, ni mutudi; oso kia u uatungu-nâ, bhu kididi kioso bhua solo Jihova Nzambi ié kukala dibhata dia Dijina diê.

¹² Uenda jinga ni kulembalala kuila eie uakexe u mubhika ku Ijitu; kala kiki jingonge jiji u ji bhaka kiambote, uenda-phe ni ku ji bhanga.

O fesa ia jifundu

¹³ O fesa-phe ia jifundu mu i bhanga jinga mu sambuadi dia izuua, mu kuila eie uomona kiá o idima ié bhu dianekenu, ni ia mivide iabhu kiá mu ditangi dia kukamena.

¹⁴ O ki u bokuesa o fesa, utana, eie ni monʼé ua diiala, ni ua muhatu, ni selevende ié ia diiala, ni ia muhatu, ni levita, ni nzuángiza, ni monʼa difundu, ni mutudi, oso kiá u uatunga-nâ mu sanzala ienu.

¹⁵ Fesa iii u i bhangela Jihova Nzambi ié mu sambuadi dia izuua, bhu kididi kioso kia solo Jihova; mbata Jihova Nzambi ié ua-nda ku ku zediuisa mu ima ioso i u muna, ni mu ikalakalu ioso ia maku mé; kala kiki, eie u tumbujuka muene ni kutana.

Bhua tundu o kubhana kisakidilu mu jikultu ja Ngana

¹⁶ Mala oso mu kaẋi kenu a tokala kuiza lutatu ku muvu mu ku di bhakula bhu pholo ia Jihova Nzambi ié, bhu kididi bhuoso bhua solo muene; moxi, bhu fesa ia jimbolo ja hangâla; kadi, bhu fesa ia jisemana; tatu, bhu fesa ia jifundu; maji kana kuiza ni maku ahatu bhu pholo ia Jihova.

¹⁷ Kala muthu a bhane kioso kia tena kukuata o lukuaku luê, kala kioso kia soko o kubhanduluka kuê, ni kioso kiasoko mabesá ma mu bhana Jihova Nzambi ié.

Kioso kia fuama afundixi

¹⁸ Mu mabhata moso ma-nda ku ku bhana Jihova Nzambi ié, ku ibuka, ibuka, mu ta-mu afundixi ni jifixiiadi, ende ni kufundisa o mundu ni ubatuilu ua tetuluka.

¹⁹ Kana kudiodia dimanda; kana kubhanga katungu ka athu; kana kutambula kitadi kia diminhinu, mba kima kioso-kioso kia ku ku bhomba, kuma o kitadi kia diminhinu ki bheka ufofo ku akua mesu; kiselula uanji ua oso ejidile kutetulula mu kidi.

²⁰ O kubatula mu kidi, o kubatula milonga mu kidi, kuene ngó ku mu kaiela jinga; nda u kale u muthu ua muenhu, u vue oxi ia-nda ku ku bhana Jihova Nzambi ié mu ubhingano.

²¹ Bhuoso bhuala o kalatódio ka Jihova Nzambi ié, eie kana kuphapha-bhu muxitu ukôla ua miẋi ioso-ioso.

²² Kana ue kuimika-bhu kiteka, kuma kienhókio Jihova Nzambi ié ua di zembana-kiu.