Matendelelu 15 - O Mikanda Ikola

O muvu ua ufolo

¹ Thembu joso kuila bhua bhiti kiá sambuadi dia mivu, o ki i bhua-phe, kola-bhu ufolo.

² Ufuôlo iú-phe u kala kiki: se bhuala muthu ua bhana dikongo mba ua sobhesa kima kua mukuá, u ki ehela kiá bhoxi, kuabhu! Ka ki kobhalale dingi kua mukuá, mbá kua phangʼié, kuma ufuôlo ua Jihova uókole kiá.

³ Se muthu uatundu kuengi ua ku di dikongo u di kobhalala muene; maji o kiaii kua phangʼié, katula-ku lukuaku lué, u ki ehele bhoxi.

⁴ Nga ki ambela-phe phala momuenu ki mu kale ngadiama; kuma Jihova Nzambi ié ua-nda ku ku bhana kubhanduluka kuanzungule mʼoxi ia-nda ku ku lunduisa phala ku ivua.

⁵ Kabasa eie u kalé ngó u muthu ua tumaka kiambote o dízui dia Jihova Nzambi ié ni muanu uoso; anga uenda ni kualuka jinga o ijiia ioso i ngala ku ku tendelela lelu.

⁶ Kienhókio o Jihova Nzambi ié ua-nda ku ku bhandulula muene, kala kia ku ambela kiá; eie ua-nda kusobhesa athu avulu mu jixi-jixi, maji eie kua-nda kukala ni kubhindama ku ku bhekela kusobha kima; ua-nda kutumina ifuẋi iavulu, maji eie ka-nda ku ku tumina kuala kifuẋi kioso-kioso.

O kitumu kia kukuatekesa o jingadiama

⁷ Se muʼaxaxi ka mundu ué mu kala ngadiama, ku jiphange jé, mu ixi ia kubhana Jihova Nzambi ié, mu jisanzala jenu, eie-phe kana kukola muxima; kana kuila o phangʼié uala ngadiama eie u mu kotekela o lukuaku;

⁸ mu jikuile lusolo o lukuaku lué u mu sobhese kioso kia mu kambe, u mu bhandulule muene kiasoko, o kubhindama kuê.

⁹ Aluka-phe, kuehele Kadiaphemba ku ku fuetela mu muxima ué, kuamba: O muvu ua kasambuadi, ua ufuôlo, iú zukama; anga diesu dié di kitukila phangʼié uala ngadiama, uixi ki ngi mu bhana kima, kuma kiendelela; o muene-phe na di tende kua Jihova, eie-phe momué mua-nda kukala kituxi.

¹⁰ Eie-phe u mu bhana muene kiambote ni kieha kioso, muxima ué ki u dimbuluke kioso ki u mu bhana; kuma kienhiki kiene kia-nda ku ku zediuixila Jihova Nzambi ié mu ikalakalu ié ioso, ni mu ima ioso i u sota kubhanga ni lukuaku lué.

¹¹ Mukonda mungongo ki mu kambe o jingadiama; kiene kia ngi bhangesa ku ku tendelela kuila: Phangʼié u mu jikuila lukuaku lué ni kieha kioso kia tokala; kiene ue ki u bhanga ni hukunhu ua tate ni ngadiama uene mʼoxi ié.

O kitumu kia abhika

¹² Se a ku sumbisa phangʼié, ia diiala mba ia muhatu, mukua muiji ua Jihebeleu, a ku bhikile mivu isamanu, o ua kasambuadi-phe, u mu bhana ufuôlo, anga u mueha kiá nʼaié.

¹³ Kioso ki u muambula-phe ku mu ehe kuia ni maku ahatu.

¹⁴ Di-fikixile muene, phala u mu longelese kiasoko, uila o mu kibhanga kié ua mu nomuena-mu, o bhu diʼanekenu dié ua mu nomuena-bhu, o mu ditangi dié ua mu katuila-mu; bhuoso kiá bhua ku muesa kuala Jihova Nzambi ié, muene ue u mu nomuesa-bhu anga u mu bhana.

¹⁵ Uxinganeka jinga, ulembalale kuma eie ue ua kexi u mubhika mʼoxi ia Ijito, maji Jihova Nzambi ié muene ua ku kula. Eie ue nga ku tumu kubhanga jinga kienhiki.

¹⁶ Mubhika-phe kia kèla: Eme nguami kutunda, kuma ngana iami nga mu zola, ni dibhata diê; mukonda dia kukalʼê kiambote ni eie,

¹⁷ kuabhu-phe, u kuata kiá nzoma anga uiza-nê ku dibhitu, hé u mu kubula o dítui, u kala-phe kiá mubhika ué katé bhu ufuilu; ni mubhika ua muhatu ue kiene ki u mu bhanga.

¹⁸ Kioso-phe ki u mu bhana ufolo, ki ki ku nemese muxima; kuma muene kifua ua ku futu luiadi mu mivu isamanu iosʼiii ia ku bhikila se u mu sokesa ni nguzu mukua nganhu; kienhiki o Jihova Nzambi ié ua-nda ku ku zediuisa mu ima ioso i u bhanga.

O jiphande-kumbi ja ibhaku

¹⁹ Anʼoso a phande-kumbi a jingombe, ni jimbudi, o kia kala ndumbe mu i lumbila Jihova Nzambi ié; monʼa ndumbe ua jikula divumu dia ngombe kana ku mu ta ku kikalakalu kia kudima; o monʼa ndumbe ua jikula divumu dia mbudi, kana ku mu bhuta kindemba.

²⁰ Uiza-na bhu pholo ia Jihova Nzambi ié bhene bhu ua a dila, muvu ni muvu, bhu kididi kia tungula Jihova, nʼeie ni athu oso ala bhu jiku dié.

²¹ Maji-phe, se uanemana, uala huhi, mba kifuôfo mba unema uengi uoso-uoso kana ku mu lumbila Jihova Nzambi ié.

²² U mu dila ku bhata dié; ni muthu ua kasana ni iú ua zele ua bhiti ku dibônzo, ene-osoʼá adia-ku, mukua ni kiene mu kúdia o mbambi mba ngulungu.

²³ Di lange-phe ngó kioso ki u i dia, ku idie-phe ni manhinga mê kumoxi, maji u a ẋamuina bhoxi, kala menha.