Matendelelu 14 - O Mikanda Ikola

Ima ia kúdia ni ima iókidike

¹ Enu muala mu ana a Jihova Nzambi ienu, né-mbe mua fundu muthu kana ku di bhuta mabhaia mu mítue mba mu di ẋanga jiphoko ku mukutu.

² Mbata eie u kifuẋi kiangene kia Jihova Nzambi ienu; o Jihova phe ua mi tungula ku ifuẋi ioso ia dizale bhoxiʼabha, phala mu mu kale mu mundu uê ua mu tokala.

O iama ia kùdia ni iama ia misalanganda

³ Kana-phe kúdia jinga ima i ibhila Nzambi.

⁴ Jixitu ji mu dia jinga jenʼiji: o ngombe, o ibhaku ia jimbudi, ni ibhaku ia jihombo,

⁵ o ngulungu, o mbambi, o mvidi, o hoha, o songe, o phakasa, ni muhanda.

⁶ Iama ioso ia batuka kikoto, anga kiuanunuka mu ikoto iiadi, anga i ta-ku o ku di andununa mu kanu, muʼaxaxi ka iama ioso, jene-phe o jixitu ja mi fuama o kúdia.

⁷ O jamukuá jiji kana ku ji dia, joso kiá jitena ngó ku di andununa mu kanu, mba-phe ja batuka ngó kikoto, kuabhu: O kamelu, o dibhulu dia iangu, o dibhulu dia bhata, kuma iá a di andumuna mu kanu, maji ka batuka kikoto; iama iii kana ku idia.

⁸ O ngulu ue ki iafuama ku idia, kuma O ku batuka kikoto iú-naku, maji ki iene ku di andununa mu kanu; ió-phe iókidike, xitu iê kana ku idia, kimbi kiê kana ku ki kuata.

⁹ Ku iama ioso ienda mu menha-phe, mu dia-ku iii: Iene ioso iala ni ibhebhe, ni ibhialabhiábhia, iene i mu dia.

¹⁰ Maji ioso kiá i kamba o ibhébhe, ni ibhialabhiábhia kana ku idia; ioio kitenu-iu xitu ia xidi kuma iama ia misalanganda.

¹¹ Jinjila joso ja fuama, mu dia.

¹² Maji o jiji ki mu ji die; o holokoko, ni bula-ifuba, ni kingungu-a-njila,

¹³ ni kinhungu, kíhuhu ni kimbanze ni oso kiá akua kidifua kiê.

¹⁴ Kilombelombe kioso kiá, ni mbutu iê ioso kiá ku kidifua kiê,

¹⁵ ni kihendembumba, ni phiáphia, ni mukuku, ni kahumba, ni kaháula, ni oso kiá akua kidifua kiê.

¹⁶ Ni kinzunzu, ni kahombo, ni ngunduʼandala,

¹⁷ ni kambonja, ni kinzongolo ni kakulu-ka-kahumbi,

¹⁸ ni dibânda, ni nhange-nhange, u a muena ku; mbutu iâ, ni kaluuiui, ni dima.

¹⁹ Tubamba tuoso ue tuenda ni kutukatuka bhulu, tuòkidike; kana ku tu dia.

²⁰ Jinjila joso ja fuamaʼojo mu ji dia.

²¹ Xitu ia di fuila ki mu idié; sembele ua i bhana muthu uengi, o nzuángiza, uoso ua tungu-nê mu sanzala ienu muene u i dia, mba-phe sumbisa-iu ku akua mundu; kuma eie ki ualʼokio uala u kifuẋi kiótungule phala Jihova Nzambi ié. Monʼa hombo ue kana ku mu lambela mu lete ia mamʼâ.

Madijimu phala o kikalakalu kia Jihova

²² Ku idima ioso ima mʼóbhia dié muvu ni muvu, eie u katula jinga-ku o mba-ndu ia kakuinhi phala madijimu ma Jihova, kioso ki uzubha kumuna o díbhia.

²³ Anga mu i dila bhu kididi kioso Jihova Nzambi ié kia tungula ku kala diembu dia dijina diê, ni díjimu dia masa mé, ni dia maluvu mé, ni dia maji mé, ni dia jiphande-kumbi ja jingombe jé ni jimbudi jé; phala u di longe o kuxila jinga Jihova Nzambi ií izuua ioso.

²⁴ Maji-phe, o ki u kala kanga dia lebha, o ima iii ki i xikina ku i ambata, kuma kididi kia tungula Jihova Nzambi ié phala kuxikika-bhu o dijina diê, kiàla bhua lebha, eie-phe o Jihova Nzambi ié ua ku bhandulula kiavulu,

²⁵ sembele-phe o ku i sumbisa anga u kuata kitadi bhu lukuaku lué; hé ukatuka, uia katé bhu kididi kia tungula Jihova Nzambi ié;

²⁶ kitadiʼokio-phe kiene ki ua kà sumba na-kiu ioso ia solo o muxima ué, mba jingombe, mba jimbudi, mba vinhu, mba maluvu alulu, ni ioso kiá ia ku tumu o muxima; bhenhobho-phe bhene bhu i dila, bhu pholo ia Jihova Nzambi ié; u sanguluke-phe kiá, nʼeie ni athu oso a ku kala bhuʼjiku dié.

²⁷ O levita-phe ku mu landuke uoso kiá ua tungu-nê mu mbonge ienu; kuma muene ka tambula-ku dikânda ku undundu u ua tambuile eie.

²⁸ Kuila bhua bhiti kiá mivu itatu, u bhongolola o madijimu ma ima ié ioso iasokoloka mu muvu uenhó, anga mu i lunda mu sanzala ienu;

²⁹ mbé kia kà tukuluka o levita (kuma muene muthu ka moneka ngó dikânda ku undundu kala eie), ni nzuángiza ua tunda o dikanga, ni mona difundu, ni mutudi, u ua tungu-nâ bhuamoxi, mu sanzala ienu, a tene kúdia katé kiekuta; phala Jihova Nzambi ié a ku tele dingi dibesá ku ikalakalu ioso ia maku mé i uenda ni kubhanga.