Matendelelu 13 - O Mikanda Ikola

Jikaxtiku ja jipolofeta ia makutu ni abhezi a mahamba

¹ Kioso ki fundumuka jipolofeta mba ka-jinzoji muʼaxaxi kenu, anga u ku bhana kijimbuete mba kisuma,

² se kijimbuete kiókio mba kisuma kia bhiti muene, kioso kia ku ambela, kiene muene ki kia bhiti, o muenhó hé uila: Tuie tua kà bhandulule jinzambi jetu jengi tu ji bhikile, o jene eie kua jʼjijiia ngó,

³ polofeta ió mba ka jinzojiʼó eie ku mu ivue; kuma o Jihova Nzambi ienu, uene ku mi lola nda a mone se kidi kiene Jihova Nzambi ienu mua mu zola muene ni muxima uenu ua muvimba, ni muenhu uenu uoso.

⁴ Muenda jinga-phe ni kukaiela Jihova Nzambi ienu; mu mu kuatela jinga uoma; ijiia iê mu i aiuka; muenda ni ku ívua jinga o dízui diê; muene ngó mu mu sedivila, anga mu zukama ngó kua muene.

⁵ O Polofetʼoio-phe, mba ka-jinzojʼó mu mu jibha, mukonda ua tange ima ia kubhumina Jihova Nzambi ienu, ua mi katula mʼoxi ia Ijitu, iú ua mi kula mu dibhata dia ubhika mu mua kexi; muene iú ualu sota ku mi katula mu njila ia mi xindila Jihova Nzambi ienu. Mu kubhanga kiki, mua katula o ku-ibha muʼaxaxe kenu.

⁶ O ki ku funhisa phangʼié, monʼa mamenu, mba monʼé eʼmuène, ua diiala mba ua muhatu, mba-phe mukajiʼé ua kazola muene kiá ua tokala bhuʼhata jé, mba kamba dié ua di kata-nê kala o muenhu ué eʼmuène, anga u ku fuetela, uixi: Tuende, tu bhandulule jinzambi jengi, o jene eie kua jʼijiia, né eie né jitata jé,

⁷ muʼaxaxi ka jinzambi ja ifuẋi ia mi kondoloka, bhua butu mba bhua lebha, tunde kua tundu oxi katé ku iasuku;

⁸ ditune, kana ku di xikanesa-nê; Kana ku mu ivua; muenhó diesu dié ki di mu kuatele henda mba u mu kondejeka; Kana ue ku mu sueka.

⁹ Kale u mu jibha muene; eie-muène udianga ku mu ila lukuaku ẋaba, phala ku mu jibha; mundu uoso anga a mu lundama kiua.

¹⁰ Anga mu mu bûba ni matadi katé kiafua, kuma-phe ua sotele ku ku ẋanjula kua Jihova Nzambi ié, Ió ua ku katula kʼoxi ia Ijito, mu dibhata dia ubhika.

¹¹ Bhanga-kiu muene, nda Izalaiele ioso a kʼivue, a kale ni uoma, mbé kʼalukile kubhanga kisunji kala kiki mudienu.

¹² O ki uívua exi, muʼaxaxi ka jisanzala ja mi bhana Jihova Nzambi ienu phala kutunga-mu,

¹³ kuila o muenhomo muala iiala anʼa Kadiaphemba, a mi tokala enu-enu, o enhá hé a funhisa akuâ, exi: Tuienu, tu bheze jinzambi jengi, o jene ki mua jʼijidile;

¹⁴ kuabhu phe, enda kiá ni kuibhula kiambote, uendesa muene; anga u tongesa muene kiambote; o ki u mona kuila kidi, sai-ku athu afúnha kima kia kisunji kala kiki, muʼaxaxi kenu,

¹⁵ athu oso atungu bhu sanzala ioio mu a bhitisa ku maju a xibhata, ene oso muene mu a buikisa katé ni ibhaku iâ, ni ima ioso iala na-iu.

¹⁶ Anga mu bhongolola o umonhi uoso u mua sange-mu anga mu u tula mu kaẋi ka dikanga; anga mu ila ni sanzala iene ni umvuama uê uoso mu u ximika mu túbhia, ki ku subhuka kima. Sanzalʼoio ikala kiá ngoho dixita di nangenena, ki bhuà kala dingi, muthu utunga-mu.

¹⁷ Enu-phe lukuaku luenu kana dingi kukuata kima kia ufusa ku imbamba ia tokala mu sanzalʼoio mbé ki mu nomone-mu kama, phala njinda ia Jihova isosoloke, nda a ku lendukile nʼa tene ku ku kuatela henda, phala a ku sokolole kala kia lokela o jitata jenu,

¹⁸ kioso eie ki u tumaka kiambote o dízui dia Jihova Nzambi ié, anga ukuata o kualuka ijla iê i ngala ku ku tendelela leluʼiii, ni uende ni kubhanga kioso kiaiukila ku mesu ma Jihova Nzambi ié.