Matendelelu 12 - O Mikanda Ikola

Kididi kia kulto, kididi kia solo kuala Jihova muene

¹ O jiji jene o jingonge ni mabatuilu u mua tokala ku kumbidila ni muanu uoso, kioso ki mua kà kala mʼoxi ia mi bhana Jihova Nzambi ia jitata jenu, phala mu xalele-na-iu mu izuua ioso ia muenhu uenu kulu dia mundu.

² Ididi ioso akua jixi u mua-nda kutolola enu, mua bhezela jinga o mahamba mâ, enu mua kà i sengulula muene,

³ misônga iâ mu i lundumuna bhoxi, iteka iâ ia kusonga mu i bula-bula, o mixitu iâ (iene mu bhezela) mu i ta mu túbhia, nzambi jâ joso mu ji sengulula muene, o dijina diâ mu di jima muene anga moxiʼomo dibhua-mu.

⁴ Ki kiene-phe ki mu bhanga ni Jihova Nzambi ienu.

⁵ Bhuoso kiá bhu kididi kia solo kuala Jihova Nzambi ienu muʼaxaxi ka miji ienu ioso, phala kuxikika-bhu o Dijina diê, bhene bhu muia jinga, kuma bhene bhu bhata diê.

⁶ Bhene bhu muenda ni kubheka o jisata jenu ja kuoha, ni ibhaku ienu ioso ia kusatela Jihova, ni madijimu menu ni maujitu menu ma ku di fikixila bhu lukuaku luenu, ni jihasa jenu, ni mibhaku ienu ia vondadi, ni jiphande-kumbi ja jingombe jenu ni ja jimbudi jenu.

⁷ Ima ienu ikôla bhene bhu mu i dila, bhu pholo ia Jihova Nzambi ienu, anga mu sanguluka mu ima ioso i mu tula o lukuaku luenu, nʼenu ni mabhata menu, mu ima ioso iejila mu dibesá dia Jihova Nzambi ienu.

⁸ O ki tuala kubhanga bhabha bhu tualʼabha, o ku pholo ku muia ki kiene ki mu bhanga jinga. Mukonda tuala kuila kala muthu u bhanga kioso kia mu iukila mu mesu mê.

⁹ Kuma kindalʼiki hanji-phe, kiluua mu bokona mu dinhohenu ni mu undundu ua-nda ku mi bhana Jihova Nzambi ienu.

¹⁰ Maji kioso ki mua-nda kuzaúka Njolodá, mua-nda kutunga mʼoxi ia-nda ku mi lunduisa Jihova Nzambi ienu, anga u mi bhana kunhoha ku jinguma jenu joso, mua-nda kutululuka anga mu tunga mu soma.

¹¹ Kiene kiua Jihova Nzambi ienu kia kà sola kididi bhua kà tunga ue kiá o Dijina diê; o bhenhobho bhene bhu mua kà bheka jinga ioso-lolo i nga mi xindi: jisata jenu ja kuoha, mibhaku ienu ia kusatela, ni madijimu menu, ni ma-ujitu menu ma ku di fikixila bhu lukuaku luenu, ni ioso kiá i mu sola kubhakula ni hasa ioso i uate kua Jihova.

¹² Anga mu kuata kutana ni kusanguluka bhu bhata dia Jihova Nzambi ienu, nʼenu ni anʼenu a mala ni anʼenu a ahatu, ni jiselevende jenu ja mala ni ja ahatu; ni levita uoso uala mu malumbu menu; oko muene ka moneka kânda dia undundu muʼaxaxi kenu.

¹³ Di lange-phe, kana kubhakula jisata ja kuoha bhuoso-bhuoso bhu uamono;

¹⁴ maji jisata ja kuoha ni ima ioso kiá i nga ku xindi kale u ji bhakuila bhu kididi kioso ki sola Jihova, phala kukala kididi kiê, muʼaxaxe ka kibuka kimoxi kia tungula mu ibuka ienu.

Kijila kia kúdia xitu, o manhinga ni maujitu

¹⁵ Maji o xitu ia kudiʼoio, kioso ki u mona uilu ua ku kuata, u i jibhilʼé muene bhu bhata dié bhuoso bhu ualungu, anga udia muene o xitu kioso kia ku tumu o muxima ué ni kioso kia ku zediuisa Jihova Nzambi ié; kixi muthu ua xidi, kixi muthu ua zele, ene oso a tena kudia, mukua ni kiene mu kúdia o mbambi ni ngulungu.

¹⁶ Inda o manhinga kana ku a dia; mu a zunzila bhoxi mukua ni menha.

¹⁷ O madijimu kana ku ma dila kubhata dienu: ni díjimu dia idima ienu, ni dia maluvu menu, ni dia maji menu, ni jiphande-kumbi ja jingombe jenu ni ja jimbudi jenu; katé ni ima i mua plometela ku hasa ioso i mua te, ni mibhaku ioso ia vondadi, ni maujitu ma ku di fikixila bhu lukuaku luenu;

¹⁸ o ima iii ki muiza mu ku i dia, mu i dila bhu Bhata dia Jihova Nzambi ienu, bhu kididi kia tungula Jihova Nzambi ienu bhene bhu mu ongama, nʼenu ni anʼenu a mala ni ahatu, ni jiselevende jenu ja mala ni ja ahatu, ni jilevita joso ji mua tungu na-ju mu mbonge ienu; o bhu Bhata dia Jihova Nzambi ienu bhene bhu mu sangulukila jinga ni ima ioso i mu suualela jinga,

¹⁹ O levita-phe ki muthu ua ku mu ta dikunda, anga mu fula ku mu dikila mu thembu joso ja kukala kulu dia mundu,

²⁰ Kuila kiá oxi ié Jihova Nzambi ié ua ku bandekezela-iu kiá katé ku makanga kala kia ku polometela muene, eie anga uila kuenhoko, uixi: Ngandala kúdia xitu, mukonda uilu ua xitu ua ku kuata, sembele, diá-iu muene kioso kia ku tu-mu o muxima.

²¹ O kididi kia tungula Jihova Nzambi ienu phala kuxikika-bhu o dijina diê, se kia ku kala bhua lebha, kiene kimoxi, jingombe ni jimbudi ja ku bhana Jihova Nzambi ienu muenda ni kúdia, kala ki nga mi ambela kiá; mu ji dila ku mabhata menu, kioso kia mi tumu o muẋima.

²² Kifua-phe kiene ki muene mu kúdia o mbambi ni ngulunguʼokio kiene ki mu idia; o muthu uakasanʼó udiê bhuamoxi ni uoso uabhiti ku dibônzo.

²³ Inda-phe ta-ku muxima phala o manhinga kana ku a dia; kuma o manhinga uene o muenhu; eie u muthu umoxi kuile udia o muenhu, anga udia ue o xitu.

²⁴ Kala kiki, o manhinga kana ku a dia; ẋamuina-u bhoxi mukua ni menha.

²⁵ Ku a dié-ze; bhanga muene kioso kiaiuka ku mesu ma Jihova, nda ubonge ujitu, ukale ni kuzediua nʼeie ni anʼé oso a-nda ku ku bhingana kioso eie ki u bhanga kiaiuka bhu pholo ia Jihova.

²⁶ Maji ioso ima i ua lumbila Nzambi, ni ioso kiá i mua tela hasa ienu, muiza na-iu muene bhu kididi kioso kia tungula Jihova,

²⁷ anga mu bhakula jisata jenu ja kuoha, ni xitu ni manhinga mu i ta ku kalatódio ka Jihova Nzambi ienu; o manhinga oso a jisata jenu, mu a ẋamuina ku thanduʼa kalatódio ka Jihova Nzambi ienu; maji o xituʼoio mu idiê.

²⁸ O ki ngala kuzuelʼiki ivenu-kiu muene kiambote, mu ki lunde ku muxima, phala mu bonge ujitu, mu kale ni kuzediua nʼenu ni anʼenu oso ʼa-nda ku mi bhingana katé ku hádia ni hádia, kioso ki mu kuata kubhanga ima iaiuka ku mesu ma Jihova Nzambi ienu.

Kudimuna abhezi a mahamba

²⁹ Kuila-phe Jihova Nzambi ienu ua sengulula ifuẋi ia akua-jixi mu ku mi toluela-nâ ku mu di telʼuku, anga enu mu a vua, anga mu tunga oxi iâ,

³⁰ dilangienu-phe, kioso kia mi toluela-nâ kiá, kana ku a hombokela ni ku di ta-nâ mu kisangela; o mahamba mâ ki mu bhindamene kua tongolola, anga mu ila, muixi: Etu uetu tu bheza mahamba mʼakua jixi, kala kia bhanga jinga ene.

³¹ Jihova Nzambi ienu ki mu mu bhange kiókio, kana; xinganekenu kuma ima ioso ia ufusa ia ibhila Jihova, ia di zemba na-iu muene, iene ia bhanga jinga ene kioso kia bheza jinga o jinzambi jâ. Katé ni tuana tuâ tua mala, ni tuana tuâ tua ahatu akexe ku tuoha mu túbhia, mu kusatela jinzambi jâ.

³² Endenu ni ku di tongesa kiambote mu kualuka ima ioso i nga mi tendelela eme; ku imaʼiii ki mu te-ku, ki mu katule-ku.