Matendelelu 11 - O Mikanda Ikola

Kutendelela oso alungu mu kubokona m oxi ia polomesa

¹ Zola-phe Jihova Nzambi ié, ukuate kualuka ni muanu o ima ioso ia ku tendelela, ni ijiia iê, ni mabatuilu mê, ni jingonge, ni itumu iê, izuua ioso.

² Leluʼidi-phe tumenu ku kʼijiia, kuma ngala ku mi zuelesa enu, ki ngala kuzuelesa anʼenu, akambe ku kʼijiia, nuka amuene o ulongelu ua Jihova! Nzambi ienu ni kijingu kiê, ni lukuaku luê lua suina.

³ Nuka amuene o ijimbuete iê ionéne ni ikalakalu ia madiuanu ia bhange muʼaxaxi ka Ijito, kua Falaó, sobha ia Ijito, ni oxi iê ioso;

⁴ nuka amuene ue kioso kia bhange Jihova o kilômbo kia masoladi a ita a akua Ijito ni jikabalu jâ, ni makalu mâ, kia a lundumuka o menha ku thandu, mu Musanza-ua-Kalunga-ka-Kusuka kioso kia mi landamekene, Jihova anga u a jima mbutu, katé kiki aia muene nzaká;

⁵ anʼenu ka mono ue kioso kia mi bhange mu kikangalakata, katé bhu muezʼabha;

⁶ ni kioso kia bhange kua Datane ni Abilame, anʼa Eliiaba, monʼa Lubene, kioso kia bhanene oxi mu kanu, anga i a minha, ni ene ni mabhata mâ, ni jibalaka jâ, ni ioso i akexe na-iu ia a tokalele ene muʼaxaxe ka Izalaiele ioso;

⁷ enu-phe o mesu menu mene muene ma di muena o ima ioso ia makota iii ia kalakala Jihova.

O mbote ijiia mu kutumaka

⁸ Ijiia-phe kuatenu-iu kiambote, ngala ku mi bhana leluʼidi, nda mu kale ni nguzu, phala mu bokone mu vue oxi i mua lungu mu kúvua;

⁹ phala mu kole muenhu mu ixi ia lokela Jihova ku i bhana jitata jenu, ni mbutu iâ; oxi izunzumuka lete ni uiki.

¹⁰ Kuma oxi i mua-nda kubokona ku i vua, ki iala kala oxi ia Ijito, ku mua tundu, ia bhingile kuila, o ki ukuna mbutu ié, eʼmuene dingi ukuata ku i tekela, ubanda ukulumuka, mukua ni jindombe mu honga.

¹¹ Maji Oxi i mua-nda kuvuʼiii ixi ia milundu ni makôlo; menha ê u mu nua, mvula iê i tunda ku diulu kuene,

¹² Oxi iii Jihova Nzambi ienu muene ua i tambula konda; mesu ma Jihova Nzambi ienu mene ku i kengelela mu thembu joso; tundé bhuandekela o muvu katé bhu ubhuila.

¹³ Kia kà kala kiki-phe kuila, se mu kuata muanu ua kutumaka ijiia iami i ngala ku mi bhana lelu iii, ia kuzola Jihova Nzambi ienu, ni ku mu sedivila ni muxima uenu uoso ni muenhu uenu uoso,

¹⁴ Eme-phe oxi ienu ngenda ni ku i bhana o mvula ioso iatokala bhu thembu iê; ngi bhana o mvula ia dianga ia isanga bhu kudinji, hé ngi kaielesa ue ia sukidila-ku ia kungulula musoke, phala mu mune idima, ni masa, ni vinhu ia uisu, ni maji-mê.

¹⁵ Ibhaku ienu ngi i bhana ue o iangu ia sabhelela mu mukáu; eie-phe udia anga uikuta.

¹⁶ Dimukenu-phe, muxima uenu ki u mi diangule, ni muxie njila, anga mu di kuzula mu kubheza mahamba, ni ku a fukamena;

¹⁷ anga njinda ia Jihova i mi uamena, ku diulu hé uta-ku sabhi anga mu lémbua mvula; oxi i seluka i lémbua kuima, anga selu muene mu jima o mbutu; oxi ia iukʼoio ia mi bhele Jihova, anga mu i xa.

¹⁸ Inda lundenu maka mamiʼama ku miẋima ienu, ni mu mienhu ienu, maka iá kutilenu-nâ ku lukuaku luenu phala a mi kale kijimbuete, endenu-nâ bhu dibhomo phala ka mi bhue ku mesu.

¹⁹ Endenu ni ku a longa anʼenu; mu uzuelelu uenu ki mu xikama mʼonzo, kuatenu maka enhá; o ki mu kala mu kuenda njila, kuatenu maka enhá; o ki u zeka ku kilu, zeka ni maka enhá; o ki u balumuka ku kilu, balumuka ni maka enhá.

²⁰ Mu a soneka ku thanduʼa mielu ienu ni ku mabhitu menu.

²¹ Phala mu mone ki mua-nda kuvula izuua ia kulaia nʼenu ni anʼenu, mʼoxi ia lokela Jihova ku i bhana ku jitata jenu; anga izuua ienu isoka ni ia diulu ki dia di leka ku thandu diaʼxi.

²² Xi! Mbata se mua kuata muene muanu ua kubhaka kiambote o jingonge josuʼiji ji nga mi tendelela ku ji langa, anga mu zola Jihova Nzambi ienu, ni kuenda jinga mu njila iê ni kitongola kioso,

²³ ifuẋi ioso ia miji iii, Jihova ua-nda ku i kaia anga i mi bhua ku mesu, anga múvua ifuẋi ia miji ia mi tundu mu kukula ni mu ku suína.

²⁴ Kididi kioso kiá ki diata o kànda dienu dia kinama, kikala kiá kienu; tunde kiá ku kikangalakataʼoko ni ku Libano, tunde ku honga ia Eufalate, katé ku musanza ua luiji ku mbandu ia mufuila-kumbi iene kiá ikala o mbambe ienu.

²⁵ Ki bhua-nda kukala muthu utena kubhânga nʼenu; kuoso kiá ku mu ditela Jihova Nzambi ienu ua-nda kuta-ku kimbuua kia uoma ni kiteketela, kala kiene ku mi ambela kiá.

Mulundu ua mabesá ni mulundu ua mázui

²⁶ Talesenu, kuma leluʼidi ngala ku mi tudila kuzediua ni kuxixima.

²⁷ Kuzediua se mu tumaka o ijiia ia Jihova Nzambi ienu, i ngala ku mi tendelela lelu;

²⁸ kuxixima se mu dituna kusuua o ijiia ia Jihova Nzambi ienu, anga muila muengi, njila i nga mi xindi anga mu i lueza, anga mu landukila kukaiela jinzambi jengi, ji mua kambe kuijiia.

²⁹ Kioso-phe Jihova Nzambi ié kia kà ku bokuesa mʼoxi i ua-nda kúvua, ua kà tanga dibesá didi ku mulundu ua Ngedizine, anga ua kà jimbula ue Mázui iá ku mulundu ua Ebale.

³⁰ Abha, milundu iiadʼiii ki ialʼé ku sámbua kuná dia Njolodá, ku mbanduʼa kikoka kiia ku mufuila-kumbi, mʼoxi ia Makanana, a tungu mu kiphenza bhua lulama ni Jidingale, bhu mbanduʼa milemba ia Mole?

³¹ Mbata Njolodá mua-nda ku mu zaúka muene, anga mu bokona mu kúvua oxi ioso i mi bhana Jihova Nzambi ienu; enu mua-nda ku iʼvua muene, muene mu mu tunga.

³² Tenu-ku-phe muxima mu kumbidile o jingonge ni mabatuilu u ngala ku mi xindila leluʼâ.