Matendelelu 10 - O Mikanda Ikola

Mozé utanga bhuejila mabaia ma kaiadi ma kitumu

¹ Mu thembu ienhoio Jihova ungʼambela, uixi: Songa mabaia maiadi ma ditadi, kala ma diangediʼomo, nda u bande kokuami ku mulundu iú, iudika ue álaka ia muẋi.

² Ku mabaia enhó kuene ku nga-nda kusoneka o maka moso ma kexe ku mabaia ma dianga mu ua budile, anga u ma bhaka mu álaka.

³ Kienhókio anga ngi iúdika o álaka ia muẋi ua xitime anga ngi songa ue o mabhaia maiadi ma matadi, kala ma diangela; eme nga bandele ku mulundu ni mabaia maiadi bhu maku.

⁴ Anga muene usoneka ku mabaia, kala kia diangele kiá kusoneka, o Kuinhi dia Ijila, ia mi ambelele Jihova bhu kumbi di mua bhongolokele ku mulundu, o muene anga uzuelela mu kaẋi ka túbhia; anga Jihova u ngi bhana-u eme.

⁵ Bhenhobho-phe ngi biluka, hé ngi tuluka mulundu, o mabaia anga ngi ma lunda mu álaka i nga iudikile; enʼiê-phe muenhomo kala kia ngi tumu Jihova.

⁶ Anʼa Izalaiele ia a katukile bhu Beelote-Bene-Jakane anga eza bhu Musela; kutula bhenhobho Alá bhene bhua fuila, anga a mu funda bhenhobho. Eliiezale dia monʼê anga u mu bhingana ku unganga bhu kididi kiê.

⁷ Anga a katuka eza bhu Ngudingodi, o kia tundu bhu Ngudingodi eza bhu Jotabate, oxi ia tuhonga tua menha.

Kibuka kia Levi a ki tungula

⁸ Mu thembu muenhomo Jihova anga utungula kibuka kia Levi, phale kuambata o álaka ia kikutu kia Jihova, ni kukala bhu pholo ia Jihova, mu ku mu sedivila, nʼende ni kubhana kizediuise ku athu mu dijina diê, katé mu kizuua kia lelu.

⁹ Kiene kia bhekesa kuila o Levi kala ni undundu ua kima muʼaxaxi ka jiphange jê, mukonda undundu ua-muene, Jihova muene, kala kia ku ambela Jihova Nzambi ié.

¹⁰ Kienhokio-phe nga kexile dingi ku mulundu mu makuinhi auana a makumbi ni makuinhi auana a usuku, kala ki nga bhangele mu izuua ia dianga; o Jihova luenholo anga u ngʼivua dingi; iu ua fulu ku mi jima o mbutu.

¹¹ Maji-phe Jihova ua ngʼambela, uixi: Balumuka, u te makanda mu njila, u tuamenene o povo iii, nda abokone, avue oxi i nga lokela kubhana ku jitata jâ.

Mundu a a tendelela o kutumaka

¹² Kiki-phe, eie u Izalaiele, ihi ia ku xindi Jihova Nzambi ié, oko ua ku edi ngó, uixi: Xila Jihova Nzambi ié, enda mu ikoka iê-muène, mu zole, enda jinga ni kusedivila Jihova Nzambi ié ni muxima ué uoso, ni muenhu ué uoso,

¹³ nda u bhake ijiia ia Jihova, ni jingonge jê, ji ngala ku ku tendelela lelu, phala kubhanduluka kué eʼmuène?

¹⁴ Talesa-ze kuma ni maúlu iâ, ni maúlu mala ku thanduʼa maúlu, ima ia ngene ia Jihova Nzambi ié, ni oxi ue ni ima ioso iala-mu.

¹⁵ Hé kima Jihova kia mu tundu ku muxima uê, o ku zola jitata jenu, o kia fu ene iú ua mi tungula ue enu ku kala kota muʼaxaxe ka ifuẋi iamukuá, ki kia di monekena lelu.

¹⁶ Saienu-phe o mabôlo ma miẋima ienu, phala ki mu kale dingi muʼathu mua bhukumuka ilunji.

¹⁷ Kuma o Jihova Nzambi ienu, muene o Nzambi ia jinzambi, muene Ngana ia jingana, muene Nzambi ngó Suke-ku, o uzonda uê uvula, ukuata uoma, ka moneka kathômbo kʼathu, ka xikina ku mu futila.

¹⁸ Muene u batula mu kidi o milonga ia monʼa difundu, ni mutudi ua fundu muadi uê; nzuangiza u mu zola, u mu dikila ni kia kúdia ni kia kuzuata.

¹⁹ Kala kiki enu ue endenu ni kuzola o jinzuángiza, mukonda enu uenu muakexile mu jinzuángiza mʼoxi ia Ijito.

²⁰ Endenu-phe ni kuxila Jihova Nzambi ienu, muenda jinga ni ku mu bhikila muene ngó, mu jijidienu muene ngó; o ki muila mu loka, lokelenu mu dijina diê-muène ngó.

²¹ Muene o kijingo kienu, muene Nzambi ienu! iu ua mi bhange ima ionéne ia isunji ioso iii i mua di muena ni mesu menu.

²² Jitata jenu kia kulumukine mu Ijito akexi ngó makuinhi sambuadi a muthu; o kiki-phe Jihova Nzambi ienu ua mi sokolola, kala mu jithéthembua ja diulu, mu kuvula.