Marku 9 - O Mikanda Ikola

¹ Anga ua ambela, uixi: Ngi mi ambela kidi, bhenhabha sai-bhu athu emana-bhu, ka ka lola kalunga kate kia ka mona o Utuminu ua Nzambi iu uiza ni kusina.

Jezú u kituluka ku Mulundu

² Kia bhiti izuua isamanu, Jezú u katula Phatele ni Tiiaku ni Nzuá, anga uia-nâ ku mulundu ua di leka, ubheka ua. Muene anga u kituluka bhu pholo ia.

³ O izuatu iê i benha ni kuzela kuavulu, kana musukudi mu ngongo u tena kuzelesa kiokio.

⁴ Maxibulu kitatuʼ iki a mono kua a tukulukila ni Elija ni Mozé, he a kala mu zuela ni Jezú.

⁵ Phetele anga u kumbulula, u ambela Jezú, uixi: Mesene kia uabha muene etu kukala kunu! Tu tunge-bhu fundu jitatu: Imoxi o iê, imoxi ia Mozé, imoxi ia Elija.

⁶ Kuma Phetele kʼejiia dingi kia zuela, mbata maxibulu ene oso a bhuuama ni uoma.

⁷ Anga kuiza dituta, dia a vungina ene oso; mu dituta anga mu tunda dízui, dʼixi: Muenhu Monʼami nga mu zola! Muene mu mu ívua.

⁸ Muʼanzanzʼomo, kia talesa, kana-bhu dingi muthu, Jezú ngo axala-nê.

⁹ O kia kala mu tuluka ku mulundu, muene ua a tendelela kuma ima ioso ia mono, ka i tangele muthu, kate muene kia ka fukunuka ku ʼalunga.

¹⁰ Ene, kizuelu kienhiki anga a ki lunda, ni kudibhudisa mudia mba kufukunuka ku ʼalunga kua lombolola kiebhi?

¹¹ Anga a mu ibhula, exi: O asoneki, ala kuila kiebhi kuma ki bhinga Elija u dianga kuiza?

¹² Kuala muene: Kidi kiene, Elija u dianga kuiza, he u bheka ima ioso mu uiukilu ue. Maji a ki soneka-phe kiebhi mu Mikanda ia Nzambi kuma Monʼa Muthu u tokala u bhita mu jiphaxi javulu, ni ku mu tobhesa?

¹³ Nga mi ambela-phe kuma Elija uejile kia; maji ene a mu bhange ioso ia mesena, kala kia mu soneka mu Mikanda ia Nzambi.

Monʼ a diiala ua kate kikonha

¹⁴ O kieza bhua xedi o jixibulu, a sange kifuẋi kia dikota kia a bhongolokela, ni jimesene ja kulonga o Kitumu, a kuata-nâ jiphata.

¹⁵ Kithanganʼ okio kifuẋi kioso, kia mono Jezú, a sasumuka, anga a lenga ku mu menekena.

¹⁶ Muene ua ebhula, uixi: Mua kuata-nâ jiphata jahi?

¹⁷ Kuala muthu mu kifuẋi, uixi: Mesene, nga ku bhekela monʼami, u mu tale. Uala ni nzumbi ia dibubu, ka tena kuzuela.

¹⁸ Bhuoso-phe bhu i mu kuatela i mu vunda bhoxi, u thuthuma kifulu, u kokota ku mazu; muthu iu bhele ngohʼú! Jixibulu je nga zuela-nâ kuila a i tundise, ene-phe ka tena.

¹⁹ Muene u a kumbulula, uixi: Enu tata! Muiji ua kambe o kuxikana, tu kalaʼdi kate bhebhi? Kate bhebhi, ki ngi mi lendukila? Ngi bhekele-nê kunu.

²⁰ Anga eza-nê. O nzumbi iaiibha ki ia zubha kumona Jezú, kithanganʼokio i mu sakesa kiaiibha, u di vunda bhoxi, he u mbolomoka ni kuthuthuma kifulu.

²¹ Anga u ibhula tata, uixi: Hanji monʼe ki kia mu mu bhita kiki, thembu ia vulu kia? Uixi: Tunde undenge.

²² Sai luavulu i mu vubula mu tubhia, mba mu menha, phala ku mu jibha. Eie-phe, Ngana, se u tena kubhanga kima, tu kuatele henda, u tu kudile.

²³ Kuala Jezú: Eie se u tena kuxikana! Kuma ima ioso i xikina kua io ua xikana.

²⁴ Kithanganʼokio, o tata uavu monʼe u di kola, uixi: Nga xikana, Ngana! Ngi kuatekese mu kukamba kuxikana kuami!

²⁵ Jezú kia mono bhuala ku di bhongolola mundu, u kidika o nzumbi iabolo, uixi: Eie u nzumbi ia dibubu, ni uxilu, nga ku tumu: Tunda mu mukutu ua mona iu, nuka dingi u mu bokona!

²⁶ O ki ia zubha ku di kola, ni ku mu sanhesa kiavulu, ia tundu. O monʼa diiala anga uila kala uafu; kate athu avulu ambele, exi: Uafu.

²⁷ Jezú-phe u mu kuata mu lukuaku, u mu balumuna; o mona anga uimana.

²⁸ O kia zubha kubokona mʼonzo, jixibulu ji mu ibhula bhu mbandu, exi: Etu-phe tua lembuela-hi ku i tundisa?

²⁹ Kuala muene: Mbutu iíi ia nzumbi, kana dingi ki i tundisa, kikale ngo mu kusamba ni kujila.

Jezú u tanga dingi o kufua ni kufukunuka kue

³⁰ Kutunda bhenhobho Jezú ni maxibulu mê a bhita mu Ngalileia. Muene ka mesenene bhu kala muthu u kʼijiia kuila muene ueza.

³¹ Kuma u kala mu longa jixibulu je, uixi: Monʼa Muthu a-nda ku mu bhakula bhu maku ma athu, o ene a-nda ku mu jibha; o kia zubha ku mu jibha, kizuua kia katatu u fukunuka.

³² Ene-phe, hundu iíi ia a jinganena, o ku mu ibhula-iu ala ni uoma.

Uoso kola mu Utuminu ua diulu

³³ Jezú ni maxibulu mê anga a bhixila ku Kafanau. O kia zubha kubokona mʼonzo, muene uebhula o kuinhi dia xibulu ni kiiadi, uixi: Phata iahi i mua kuatele mu njila?

³⁴ Ene-phe a dixibha. Kuma ene mu njila a kuatele phata ia uoso u kala o dikota.

³⁵ Jezú anga u xikama, u ixana o kuinhi ni kiiadi, uixi: Se muthu uandala u kala ku pholo, ki bhinga u sukidila ku dima, u kala ngamba ia akua.

³⁶ Anga u katula kamona, u ka bheka bhu ʼaxaxe ka, anga u mu kuata mu maku, uixi:

³⁷ Uoso u tambulula kamona mukua ni kaka mu dijina diami, eme-muene ua ngi tambulula. O uoso-phe u ngi tambulula eme, ki eme ngo a ngi tambulula, maji ni Io ua ngi tumu.

Uoso ka tu zembe, ua tu bande

³⁸ Nzuá anga u mu ambela, uixi: Mesene, etu tua sangele muthu uala mu tundisa madimonho mu dijina die, etu anga tu mu kidika, mukonda ka tokala mu dianda dietu.

³⁹ Kuala Jezú-phe: Kana ku mu kidika! Mukonda kana muthu u tena kubhanga kisuma mu dijina diami, kindala nʼa ngi lungulukila.

⁴⁰ Kuma uoso ka tu zembe, ua tu bande.

⁴¹ Kuma uoso u mi bhana kunua kopho ia menha mukonda mua tokala Kristu, ngi mi ambela kidi, muenho ka kamba kisakidilu kiê.

O ku di bhalesa mukuenu

⁴² Uoso ue ku tuana tutu tua ngi xikana, u bhangesa kamona kamoxi ku di bhala, ni ku ngi xisa eme, muthu io kia mu tokala o ku mu nhenga kiditadi kia kuhuhila mu xingu, ni ku mu bobesa mu ʼalunga.

⁴³ Ni lukuaku lue, se lu ku bhangesa ku di bhala, batula-lu! Mbata kota o kubokona ku muenhu ki uábua u kinema, kana o kukala ni maku maiadi anga uia-nâ mu ifernu, mu tubhia ki tuene dingi kujima. [

⁴⁴ Mua bhingi dibhuka die ki di fu, o tubhia tuê ki tu xikina kujima.]

⁴⁵ Ni kinama kiê se kia ku bhangesa ku di bhala, batula-kiu! Kuma ujitu ue kota o kubokona ku muenhu ki uábhua u kinema, kana o kukala ni inama iiadi anga uia-na-iu mu ifernu; [

⁴⁶ Mua bhingi o dibhuka die ki di fu, o tubhia tuê ki tu xikina kujima.]

⁴⁷ Ni diesu die se di ku bhangesa ku di bhala, lokola-diu! Mukonda ujitu ue kota o kubokona mu Utminu ua Nzambi u mukua diesu dimoxi, kana o kukala ni mesu maiadi, kuia-nâ mu ifernu.

⁴⁸ Mua bhingi dibhuka die ki di fu, o tubhia tuê ki tu xikina kujima.

⁴⁹ Mukonda muthu uoso a ka mu tôua ni tubhia.

⁵⁰ Môngua ua di uabhela kiua! Môngua-phe se uabhu o kutouala kue, uene a u toua-hi? Kalenu ni môngua moxi dienu, mu kale ku paze ni ku di tuma mudienu.