Marku 8 - O Mikanda Ikola

Jimbolo a ji sokolola dingi luamukuâ

¹ Mu izuua muenhomo, kukala dingi kifuẋi kia dikota, anga a kamba kudia. Muene anga u ixana jixibulu je ua ambela, uixi:

² O mundu nga a kuatela henda, mukonda nga bhange-nê kia izuua itatu, kala dingi ni kudia.

³ Se nga a muanganesa ni nzala, kuia ku mabhata ma, a-nda kusendukila mu njila, mukonda amoxi-mu a tundu dikanga.

⁴ Kuala jixibulu: Kúdia-phe tu ku sanga kuebhi mu iangʼumu, kua kuila athu osoʼá ekuta?

⁵ Uixi: Muala ni mbolo jikuẋi? Exi sambuadi.

⁶ Muene anga u tuma o kifuẋi kuxikama bhoxi. U katula sambuadi dia mbolo, o kia zubha kusakidila Nzambi u ji bhasujula, u ji bhana ku jixibulu je ku a tudila; ene anga a tudila o mundu.

⁷ A kala ue ni tumbiji. Muene anga u tu benzela, u tuma ku a tudila ue tumbiji.

⁸ Anga enhoso a dia, ekuta. Ku ibhasu ia subhujuka anga a nona-ku sambuadi dia kinda.

⁹ Ene oso a di kua kambele ngo mu tenesa midi jiuana. Muene anga u a muanganesa.

¹⁰ Kithanganʼokio Jezú u di longa mu bote ni jixibulu je, anga u bhixila ku ixi ia Ndalamanuta.

O Jifalizeu a bhinga kisunji

¹¹ Jifalizeu anga eza a kuata-nê jiphata. A bhindamena kuila u idikiza kisuma phala kulondekesa kuila o kutena kue kua tundu muene ku diulu, kua Nzambi.

¹² Muene anga u di tula muenhu ni mukondo ua muẋima, uixi; Phala-hi o muiji uenhú ua bhindamena kisuma? Ngi tanga o kidi, kana-ku kisuma kia bhana ku muiji uenhú.

¹³ Anga u a xa, u di longa dingi mu bote, u zauka ku sambua.

O kithûthume kia Jifa lizeu ni kia Helode

¹⁴ Jixibulu a jimbi-ku o kuambata jimbolo; mu bote anga mu kala ngo imoxi.

¹⁵ Muene anga u kala mu ku a tendelela, uixi: Alukenu, mu dimukine o kithûthume kia jifalizeu ni kithûthume kia Helode.

¹⁶ Ene anga a kuata ku di fetela, exi: Muene ua mu zuela kiki, mukonda o jimbolo ki tuala na-ju.

¹⁷ Jezú kia kʼivu, uixi: Muala ku di fetela-hi, mukonda mua kambe jimbolo? Kífua kiluua muíʼvua? Kiluua muʼijiia? Hanji mua xiti mu thulu? Imʼiíi ki ia mi tetulukila luua?

¹⁸ Mesu sai, ki mu mono? Matui sai, ki muʼivu? Ki mu lembalala?

¹⁹ Ki nga uanena o mbolo jitanu, ku midi jitanu, ibhasu mua i nona ngalu jikuẋi? Exi: Kuinhi dia ngalu ni kiiadi.

²⁰ O ki nga uanena sambuadi dia mbolo, ku midi jiuana, ibhasu mua i nona inda ikuẋi? Exi: Sambuadi.

²¹ Kuala Muene: Kífua mua tokoka ku kʼijiia?

O kifofo kia Betesaida

²² Muene anga u bhixila ku Betesáida. Anga a mu bhekela kifuôfo, he a mu dionda ku mu kuata.

²³ Muene u mu kuata mu lukuaku u mu endesa kate kia tundu mu sanzala. O kia mu ṗhamena tumathe mu mesu, u mu tula maku ku thandu, uixi: Ua mono kima?

²⁴ Muene ua kengelela, uixi: Nga mono athu, maji edi kala mixi iala mu kuenda.

²⁵ Jezú anga u mu tula dingi o maku luamukuá ku thanduʼa mesu. O kifuôfo kia tonginina dingi, ueluka! Ima ioso ua mu i mona kia kiambote.

²⁶ Anga u mu tuma kuia ku bhata dia, uixi: Kana kubokona dingi mu sanzala.

Phetele u fisala Ngana

²⁷ Kienhokio Jezú anga uenda ni jixibulu je kate ku jizanzala ja Sezaleia ia Filipe. Mu njila anga u ibhula jixibulu, uixi: Athu ala ku ngʼila kuma: Eme nanhi?

²⁸ Maxibulu a mu tangela, exi: Amoxi-mu a mu kuila exi Eie Nzuá dia Batizu; amoxi, Elija; amoxi exi, Muthu ku jipolofeta.

²⁹ Muene ua ebhula: Enu-phe muixi, eme nanhi? Phetele uetaia, uixi: Eie Ngana, eie u Kristu!

³⁰ Muene anga u a tendelela kuma ka ki tange ku athu.

Jezú u tanga o kufua kue ni kufukunuka

³¹ Anga u kuata ku a longa kuma o Monʼa Muthu u bhinga u bhita ku jiphaxi javulu; ni ku mu di tuna kuala adiakime a Jijudé, ni makota ma jinganga ni jimesene jene mu longa o Kitumu kia Nzambi. A-nda ku mu jibha, nʼa fukunuke mu kizuua kia katatu.

³² Jezú mu kuzuela, o hundu iíi, ua i lombolola muene kiambote. Phetele anga a mu ambata bhu mbandu, he u kuata ku mu bazela.

³³ Muene-phe kia sakuka, u tala ku jixibulu, he u bazela Phatele, uixi: Ndé kunha, Satana! Mukonda eie kua suu ima ia Nzambi, ua suu ngo ima ia athu.

³⁴ Bhenhobho Jezú anga u ixana o mundu, u a ambela kumoxi ni jixibulu je, uixi: Se muthu uambe kuiza ku dima diami, kikale u jimba ku di xinganeka muene, a zangule dikulusu die, nʼa ngi kaiele.

³⁵ Kuma uoso uambe kubhulula o muenhu ue, ua-nda ku u texi. Maji uoso u texi o muenhu ue, mukonda diami eme ni dia Njimbu Iambote, uanda ku u bhulula.

³⁶ O muthu u bhanduluka-hi, se ua nganhala oxi ioso, nʼa i texila o muenhu ue?

³⁷ Mba muthu u bhana muenhu ue mu kima kiahi?

³⁸ Uoso u kala ni jisonhi jami eme ni ja maka mami ku muiji iu ua jiphanda ni ituxi, o Monʼa Muthu ue ua ka kala ni jisonhi ja muene kia keza ni ungana ua Tatʼâ ni ji-anju je jangene.