Marku 7 - O Mikanda Ikola

O jindôngo ja Akulu-a-Ndamba

¹ Kua mu bhongolokela jifalizeu ni amoxi-moxi ku jimesene ja Kitumu a tundile ku Jeluzaleme.

² Ene a mono jixibulu je jimoxi-mu jí jidia mbolo ni maku maxidi, kuma ki mòsukule, kala kiene mu tuma o jifalizeu mundu kubhanga.

³ Mbata jifalizeu ni Jijudé joso kene kudia se kusukujula kiavulu o maku, mukonda a kuata kijila kia akulu-a-ndamba.

⁴ Kia tunda ue bhu kitanda, kikale a dianga kusukula o ima ioso ia tundu na-iu bhu kitanda ni ku dʼiẋika, nʼa die kiua. Sai ue dingi ni ijila iamukua iavulu ia kuata, kala kusukujula jixikala, ni jímbia, ni malongʼa ngondo.

⁵ Jifalizeu ni jimesene ene mu longa o Kitumu, anga eza kua Jezú, a mu ibhula, exi: Phala-hi jixibulu je ji kamba kukuata kijila kia akulu-a-ndamba, adia ni maku maxidi?

⁶ Muene ua ambela, uixi: Mu akua mangonha! Izaia kidi kiê kia mi soneka enu, uixi: Nzambi uambe kuma: Athu ia a ngi xila ngo ni mizumbu ia, maji o miẋima ia-phe ia ngi kala kua lebha.

⁷ A ngi bheza-phe ngo makutu ni kulonga ijila ia tumu ngo athu, kala Nzambi muene ua i tumu.

⁸ Enu mu-xa kitumu kia Nzambi, mu kuata kijila kia athu, kala mu kusukula jímbia ni jikopho. Sai ue ima iamukua dingi iavulu i mu bhanga.

⁹ Uixi dingi: Kidi kiene, kuma enu izuua ioso muene mu mona ndunge ia kuxa bhu mbandu o Kitumu kia Nzambi, phala mu kuate ngo o kífua kienu.

¹⁰ Kuma Mozé, uixi: Tatʼenu ni mamʼenu a bhane ujitu. Uixi dingi: Uoso u xinga tatʼâ mba mamʼa, muthu ua ku mu jibha.

¹¹ Enu-phe mu longa, muixi: Se muthu u tena kubhandulula tatʼâ mba mamʼa, maji u ambela tatʼâ mba mamʼa kuila: Kioso ki mueji kudia ko kuami, nga ki lumbila Nzambi:

¹² Muthu io ka bhingi dingi kuila tatʼâ ni mamʼa ua a bhanga ujitu.

¹³ Kienhiki, o Maka ma Nzambi mua ma selula ni kífua kienu ki mua tambula ku jitata jenu, ni ku ki sambukisa ku alulu ni ku alaula. Sai ue dingi ima iavulu i mu bhanga, ia difu kiki.

O kima ki xidisa o muthu

¹⁴ Jezú anga u ixana dingi o kifuẋi, he ua ambela, uixi: Ivenu enu oso kioso ki nga-nda kuzuela nda mu ijiie:

¹⁵ Kana kima ku kanga dia muthu ki tena ku mu bokona ni ki mu kasanesa; maji o ima-phe i tunda moxi dia muthu, iene i kasanesa o muthu. [

¹⁶ Uoso uala ni matui ma kuívua, evue.]

¹⁷ O kia zubha kubokona mʼonzo, kifuẋi ua ki xi, jixibulu je ji mu ibhula o kixanga.

¹⁸ Muene, uixi: Enu mua soko ni akuenu! Kífua ki mualʼiki, enu uenu, mua kambe kuijiia? Ki mu kʼivu, kuma kioso ku kanga ki bokona mu muthu ki ki tena ku mu kasanesa?

¹⁹ mukonda ki ki bokona mu muẋima, maji ki bokona mu mala, anga ki tundila bhoxi? Mu kuzuela kiki, Jezú uambe kuila makudia oso muthu u tenʼê ku a dia.

²⁰ Uixi: Kioso ki tunda moxiʼ a muthu, kiene ki kasanesa o muthu.

²¹ Kuma moxi, ku miẋima ia athu, kuene ku tunda ilunji iaiibha: Maundu-mbu, mauíii, ijibha, jiphanda, unjènje, makutu,

²² Maluimbi, úsueia, ufumbe, ufusa, dixinga, jindaka, kutatela, ukumbu, uoua.

²³ Ima ioso iíi iaiibha i tunda moxi, iene i kasanesa o muthu.

Muhatu ua mukua Silofenixa a mu sakela monʼê

²⁴ Jezú anga u balumuka, uia ku jimbandu ja Tilu ni Sidonia. Kuenhoko hé u bokona mʼonzo, mukonda ka mesenene kuila athu a kʼijiia kuma Muene iu bhobho. Maji o kusuama-phe ki kua xikina.

²⁵ Kithanganʼokio-phe muhatu uavu kamona-kê ka muhatu, kala ni nzumbi ia xidi, uevu athu ala kuzuela Jezú. Muene anga uiza u di bhala bhu inama iê.

²⁶ Muhatu iú-phe ngelèku, mukua muiji ua Silofenixa. Anga u mu dionda kuila a tundise o dimonho mu mukutu ua monʼe.

²⁷ Muene-phe, uixi: Ehela phala o tuana a diange kuikuta. Mukonda ki ki tokala kukatula o kudia kua tuana, nʼa ku tela o jímbua.

²⁸ Muhatu ua mu vutuila, uixi: Kidi, Ngana! Maji o jímbua-phe, moxiʼ a meza, jídia ku jisesekenha ja lalumuna o tuana.

²⁹ Kuala muene: Mukonda dia kuvutula kue kua mbote, kiene ki ua ki zuelʼokio, ki di bhange; ndeie kia ku bhata. O dimonho dia tundu kia mu mukutu ua monʼe.

³⁰ O muhatu anga uia kuʼonzo iê, u sanga o mona ua zeka bhu hama, o dimonho dia tundu kiá mómuʼê.

Jezú u saka muxilu-ua-dibubu mu Dekapolo

³¹ Kutunda dingi mu jimbandu ja Tilu, Jezú u bhita mu Sidonha, he uiza ku kizanga kia Ngalileia, bhu jimbandu ja Dekapolo.

³² Anga bhu kala athu a mu bhekela muxilu, mukua kukukuma mu kuzuela, he a mu dionda phala a mu tule maku mê.

³³ Muene anga u mu katula mu kifuẋi, u sondoloka-nê, u mu ta milembu mu matui, u ta mathe, anga ni mathe enhó u mu babata bhu dimi.

³⁴ Bhenhobho anga u talesa ku diulu, u di tula muenhu, uixi: Efata, kífua uambe, uixi: Xitunuka!

³⁵ Mátui-mê anga ma xitunuka, o dimi die di zoza mu kithangana kienhókio, anga u zuela, u batula kiambote.

³⁶ Muene anga u a tendelela kuma ka ki tangele muthu; ene-phe a suina ni ku ki fumanesa.

³⁷ Anga a diuana dingi kiavulu, exi: Muene o ima ioso u i bhanga kiambote! U bhangesa kuila o mixilu evua, o mabubu a zuela!