Marku 6 - O Mikanda Ikola

Jezú uia ku Nazalé

¹ Muene anga u tunda bhenhobho, u vutuka kʼoxi ie, mu sanzala ia Nazalé, mua tungile, muene ni jixibulu je jeza-nê kumoxi.

² Kutula kia sabhalu, u kuata kulonga mu dilombe. Anga athu ki a mu ivu, a diuana, exi: Muenhu ima ioso iíi, ua di longela na-iu kuebhi? Kuebhi kua mu bhana o kuijiia kuosʼuku? Ni isuma ioso iíi, ia mu di bhanga kiebhi bhu maku mê?

³ Manhi ki muene musongi a mabaiʼu, monʼa Madiia, phange ia Tiiaku ni Zuze ni Juda, ni Ximá? Ni jiphange je ja ahatu, ki etu-nâ mu ʼaxaxe kʼetu? Anga a mu lebhula.

⁴ Jezú-phe uixi: O polofeta kana bhama bhu mu kamba ujitu, kikale ngo kʼoxi ie, ni ku jindandu je, ni ku bhata diê.

⁵ Muene mueneʼomo mu Nazalé ka tenene dingi kubhanga-mu kisumua; kima ngo kia bhange, ua tula maku mê ku thanduʼa jihaxi jimoxi-moxi-mu, iu ua ji sake.

⁶ Anga u diuana mukonda dia kuxibhaka kua. Jezú anga u nhunga kia ngo mu jisanzala ni kulonga.

Jezú u tuma o kuinhi ni kiiadi ku ukunji

⁷ Anga u ixana o kuinhi dia xibulu ni kiiadi, u kuata ku a tuma ku ukunji mu kiiadi-kiiadi, ni ku a bhana o kutena kua ku kaia ni kutumina jinzumbi jaxidi.

⁸ Anga u a tendelela kuma: Ki mu ambate huta ia njila, kabasa mbangala; kana mbolo, kana muxila, kana kitadi mu phonda;

⁹ maji mu zuata jihaii, uixi-phe o madivunga ki mu zuate maiadi.

¹⁰ Uixi dingi: Dioso dibhata di mua tula, inzo ioso i mu bokona, muene mu mu kala, kate ki mu katuka.

¹¹ Bhuoso-phe bhua kamba ku mi tambulula, ni ku mʼívua, ki mu tunda-bhu mu a kukumuina fufuta ia mi naminina ku inama, mu ku a bhana umbangi ua kuela kua. Kidi kiene ngi mi ambela, kuma akua Sodoma ni Ngomola a ka beta ku a lendukila mu kizuua kia kufundisa, akua kididi kiokio kana.

¹² O maxibulu anga a muangana, he a longa maka kuma athu a tokala kudiela ni kueha o ituxi ia.

¹³ A tundisa madimonho, o jihaxi, a ji uaia maji, he a ji saka.

Nzuá dia Batizu a mu jibha

¹⁴ Sobha Helode anga u kʼivua, kuma o dijina dia Jezú dia fumana kuene kuoso. Amoxi exi: Nzuá dia Batizu ua fukunuka ku ʼalunga! Kiene kia vudila o kutena kua kubhanga isuma kiki.

¹⁵ Amukuá-phe exi: Elija. Amukuá exi: Polofeta, mukua ni jipolofeta jòkulu.

¹⁶ Helode-phe kia kʼivu, uixi: Nzuá dia Batizu nga mu batuile o mutue, muene ua fukununa!

¹⁷ Kuma Helode muene ua tumine kukuata Nzuá, anga u mu kuikila mu ʼaleia, mukonda dia Helodiia mukaji a phangʼiê Felipe, kuma ua mu sakana.

¹⁸ Mukonda Nzuá uambelele Helode, uixi: Ki kola, eie kukala ni mukaji a phangʼié!

¹⁹ Helodiia anga u mu kuatela luma, u mesena ku mu jibha, maji ka tenene ku ki bhanga.

²⁰ Mukonda Helode muene ua kexile ni uoma ua Nzuá, mbata ua mu ijiia kuma muthu ua iuka, muthu ua ngene ukola, iu ua mu bhake bhua kondama. O ki a mu ivua jinga kuzuela, u tandanganha, ni kia kubhanga ka ki mono. Suke kiene, maji u kala ni vondadi ia ku mu ivua.

²¹ Ku bhiẋila-phe bhu kizuua kia tokala kia Helode kutenesa mivu, u bhangesa kizokola kia jitata je, ni jikabhitangu, ni adiakimi a Ngalileia.

²² O kieza monʼa Helodiia muene, anga u kina, Helode kia mu uabhela, ni io oso a xikama-nê ku meza. O sobha anga uambela monʼa kilumba, uixi: Bhinga kioso ki ua mesena, ngi ku bhane-kiu.

²³ Anga u mu lokela, uixi: Kioso ki u bhinga, ngi ku bhane-kiu! Kate ni usobha uami, se eie u u bhinga mbandu, tu u uane mu kaxi!

²⁴ Muene anga u tunda, uia kua mamʼa, uixi: Ngi bhinga-hi? Uixi: Bhinga o mutue ua Nzuá dia Batizu.

²⁵ Kithangana kienhókio monʼa kilumba u bokona muala sobha ni lusolo, he u bhinga, uixi: Nga solo kuila u ngi bhana kindalʼiki, bhu dilonga, o mutue ua Nzuá dia Batizu.

²⁶ Sobha anga Ukenana kiavulu, lamba dia mu kuata. Maji mukonda-phe dia kuloka kue, ni dia ia a xikama-nê ku meza, nguaiê ku mu di tuna.

²⁷ Kithanganʼokio sobha u katula disoladi ku alangidiʼê, u tuma mutue ua Nzuá dia Batizu. Muene anga uia mu ʼaleia, u batula mutue ua Nzuá.

²⁸ Anga u bheka mutue bhu dilonga, u u bhana monʼa kilumba; o monʼa kilumba anga u u bhana mamʼa.

²⁹ Jixibulu ja Nzuá ki a zubha ku kʼivua, eza, a zangula kimbi kie, anga a mu funda.

Jezú udisa o midi jitanu ja muthu

³⁰ Jipoxolo anga ji bhongoloka kua Jezú, a mu jimbuila ima ioso ia bhange ene, ni ioso ia longo.

³¹ Muene iu ua ambela, uixi: Zenu: Tuienu kʼubheka uetu ku mukau, tu nhohe-ku bhuofele. Kuma athu avulu a kexi mu kuia ni kuiza, kate Jezú ni maxibulu mê ni kithangana ngo kia kudia ka ki mono.

³² Anga aia mu bote ku kididi kia ubheka ku mukau.

³³ Mundu uavulu-phe a a mono kuia, ndumba a ejiia kuila ene. Anga a lengela bhoxi kate bhenhobho, a tundu mu jimbonge joso, anga a dianga kubhiẋila.

³⁴ Muene kia zubha kutomboka, u sanga kifuẋi kia dikota, anga u a kuatela henda, kuma edi kala jimbudi ja kambe mubidi. Anga u kuata ku a longa ima iavulu.

³⁵ O kia lembe o dikumbi, jixibulu je jiza kua Muene, exi: Kunu mu iangu mu tuala, o kumbi dia lembe kia.

³⁶ A muanganese, mbe a bhite ku jisanzala, a sumbe kudia.

³⁷ Muene-phe ua a vutuila, uixi: Enuenu a bhanienu kudia. Kuala ene: Kífua tuia ku a sumbila jimbolo ji ta hama jiiadi ja madenádia, anga tu a bhana-ju?!

³⁸ Kuala muene: Muala ni mbolo jikuẋi? Ka talesienu. O kia zubha ku talesa exi: Jitanu, ni mbiji jiiadi.

³⁹ Jezú bhenhobho iu ua a tumu kuxikama ku iangu ia uisu, mu ibuka-ibuka.

⁴⁰ Ene he a xikama ku misambu, kala kibuka hama, kala kibuka makuinhi atanu.

⁴¹ Muene anga u tambula o mbolo jitanu ni mbiji jiiadi, u bhetula mesu ku diulu, he u sakidila Nzambi. U bhasujula o jimbolo, anga u ji bhana jixibulu phala ku a uanena. Ni jimbiji ua a uanena-ju ene oso.

⁴² Ene oso anga a dia, he ekuta.

⁴³ O ku ibhasu ia jimbolo ni ia jimbiji ia subhuka-ku, a i nona kuinhi dia ngalu ni jiiadi jezala.

⁴⁴ Ene-phe adi ku jimbolo, a tena midi jitanu ja muthu.

Jezú uenda ku thanduʼ a menha

⁴⁵ Kithanganʼokio Jezú u tuma jixibulu je ku di lônga mu bote, ni ku mu tuamenena ku sambua ku Betesáida, kioso kia xala muene ni kumuanganesa o kifuẋi.

⁴⁶ O kia zubha ku di lekela-nê, iu ua bande ku mulundu mu kusamba.

⁴⁷ Kutula mu ngoloxi, o kuma ki kua vundu, o bote ia kala kia mu kaxi ka musanza, o muene ua xala hanji ku kanga ubheka ue.

⁴⁸ O kia mono a tate ni kuzaula, ala kubhanga ni kitembu, mu kilangidilu kia kauana kia usuku, kuila kuma ku kuandeka kia kukia, muene uiza ni kuendela ku thanduʼa menha, kate bhuala ene, he uila kala ua-nda ku a somboka.

⁴⁹ Ene-phe kia mono Jezú uala kuendela ku thanduʼa menha, a fika exi kilulu, anga a di kola.

⁵⁰ Kuma ene oso a mu mono, a tukumuka. Muene-phe kithanganʼokio u a zuelesa, uixi: Tululukenu, eme-muene! Ki mu kale ni uoma!

⁵¹ Anga u bhixila ku bote, u di longa momo. Kitembu anga ki batuka! Ene ku miẋima ia anga a diuana kiavulu, a kala mu teketa.

⁵² Kuma ni kisúmua kia jimbolo ki kia a tetulukila luua, inda o miẋima ia-phe hanji ia kolo.

Jezú u saka mu Jenezalé

⁵³ O kia zubha kuzauka, Jezú ni maxibulu mê a kuaka kʼoxi ia Jenezalé, o bote a i kuikila ku ngonguenha.

⁵⁴ O kia zubha kutomboka, athu kindala Jezú a mu ijiia.

⁵⁵ A lengela ku mbandu joso, a kuata ku mu tutila o jihaxi joso ja zeka bhu mianza ia, bhuoso Jezú bhua mu ivu bhuala.

⁵⁶ Muene bhuoso bhua tula jinga, mu jimbonge ni mu jisanzala, ni ku matutu, jihaxi a ji bheka mu jinzunga, anga a mu dionda kuila a mu kuate ngo ku muxiku ua kizuatu kiê. O oso a mu kuata, anga eluka.