Marku 5 - O Mikanda Ikola

O dilaji dia Ngandala

¹ Jezú ni maxibulu mê anga a kuáka ku sambua dia kizanga kia Ngalileia, kʼoxi ia akua Ngelengesa.

² O kia zubha kutomboka mu bote, kithanganʼokio u takana ni muthu ua tundu mu jimbila, uala ni nzumbi iaxidi.

³ O mu jimbila, muene kia mua tungu. Muenhu kana muthu ua tena ku mu kuta, ne ku malubhambu.

⁴ Kuma a mu kuta jinga kia luavulu, o inama ni maku ni jingidinhá ni malubhambu; maji o malubhambu-phe u ma bula, o jingidinhá u ji bukujula! Kana muthu uala ni nguzu ia ku mu lenda ni ku mu tolola.

⁵ Ni mu muanha ni mu usuku, u nanga jinga ku jimbila ni ku milundu, mu kudikola-kola ni ku di kuama ni matadi.

⁶ O kia mono Jezú mu ikanga, ueza ni kulenga, he u fukama, u mu bheza;

⁷ anga u di kola ni dízui dia suina, uixi: Eme nga kuata-hi ni eie, u Jezú, u Monʼa Nzambi, ua suka ku ukota? Nga ku bhingi mu dijina dia Nzambi, kana ku ngi talesa hadi.

⁸ Muene ua zuela kiki, mukonda o Jezú ua dianga ku mu ambela, uixi: Tunda mu mukutu ua muthu, eie u nzumbi iaxidi.

⁹ Jezú ua mu ibhula, uixi: Dijina diê, eie nanhi? Kuala muene: Dijina diami Kifuẋi, mukonda tua vulu.

¹⁰ Anga u kala mu diondolola Jezú kuila o nzumbi jaxidi, kana ku ji kaia mʼoxi ienhoio.

¹¹ Bhenhobho-phe mu mulundu mu kala kilunga kia dikota kia jingulu jala mu mudia bhua butu.

¹² Anga o jinzumbi jene a mu dionda, exi: Tu tume koko, nda tu bokone mu jingulu!

¹³ Jezú anga ua ehela. O jinzumbi jaxidi anga ji tunda, ji bokona mu jingulu. Kilunga kioso anga ki kulumuka o muzeii ni lusolo, kate mu kizanga, midi jiiadi ja jingulu anga ji fundala mu menha.

¹⁴ Oso a kexile ku jʼinga-phe, a lenga, a ki tanga ku mbonge ni ku tutu. Anga athu avulu eza ku sanga kioso kia bhiti.

¹⁵ A bhixila kua Jezú, he a talesa o muthu ua salukile ni madimonho, ma kexile kifuẋi, ua zuata, ua tambula kilunji. Anga a kala ni uoma!

¹⁶ Io oso a ki mono, anga a a jimbuila kioso kia bhiti na-kiu iu ua salukile ni madimonho, ni kia bhange o jingulu.

¹⁷ Anga a kuata ku mu dionda kutunda mu mikau ia.

¹⁸ O kia kala mu ku di longa mu bote, iu ua salukile ni madimonho u mu dionda, phala ku mu ehela ku kala-nê.

¹⁹ Jezú-phe ka mu ehela, uixi: Ndeie ku bhata, ku jindandu je, ua ka a tangele ima ia ku bhange Ngana Nzambi, ni kia ku kuatela henda.

²⁰ Muene anga u katuka, u kuata ku ki fumanenesa mu Dekapolo ima ioso ia mu bhange Jezú. Athu oso anga a diuana.

Monʼ a Jailu ua muhatu. O muhatu ua kate o kibhubhe kia manhinga

²¹ Kia zubha Jezú kuzauka dingi ku sambua, o mundu ua mu bhongolokela, anga u kala bhu mbandu ia kizanga.

²² Anga ku mu sanga muthu ua tokala ku makota ma dilombe dijina diê Jailu, o kia mu mono, iu ua di bhale bhu inama ie.

²³ Anga u mu dionda kiavulu, uixi: Kamona kami, ka muhatu, ua kumbama! Ize, u Ngana, u mu tule maku mê ku thandu, mbe u mu sake, a bhuluke!

²⁴ Anga u katuka-nê, o mundu uavulu ua mu kaiela, edi muene bhiki-bhiki.

²⁵ Anga bhu kala muhatu ua kate kibhubhe kia manhinga, ua bhange nakiu kia kuinhi dia muvu ní iadi,

²⁶ Jimbongo je joso ja kexile na-ju, ua ji texile ku imbanda. Maji o imbanda, bhu kididi kia ku mu kuatekesa, a mu tatesa dingi kiavulu, ne ngo kuiluka; maji o uhaxi ue uavulu dingi.

²⁷ Kuma uevu o fuma ia Jezú, ua mu zukama ku dima mu kaxi ka mundu, iu ua mu babata ku kizuatu kie.

²⁸ Mukonda uixi: Se nga mu babata ngo ku kizuatu kie, ngi di sanza.

²⁹ Kithanganʼokio o kibhubhe kie kia manhinga kia batuka, anga u ívua mu mukutu ue kuma uhaxi ue ueluka.

³⁰ Jezú-phe kithanganʼokio kuma uevu kuila mu mukutu ue mua tundu umbanda, ua sakukila o mundu, uixi: Mukuahi ua ngi babata o kizuatu?

³¹ Kuala jixibulu je: O mundu ua u mono a ku xina, uixi: Mukua-hi ua ngi babata?

³² Muene-phe u kuata kukengelela mu mundu, ua bhindamena kumona-bhu uoso ua bhange kienhiki.

³³ O muhatu-phe ni kuteketa ni uoma, kuma uejiia kioso kia mu bhiti, ueza, ua di bhale bhu pholo ie, iu ua mu tangela o kidi kioso.

³⁴ Muene iu ua mu ambela, uixi: Mona, o kuxikana kue, kua ku bhulula. Ndeie ni kutululuka, u di sanze ku uhaxi ue.

Ngana Jezú ni monʼ a Jailu

³⁵ Kioso-phe Jezú kia kexile hanji mu zuela, ku dibhata dia dikota dia dilombe ku tunda athu, exi: Na Jailu, monʼê uafu kia. O mesene u mu talesela-hi ngo hadi?

³⁶ Jezú-phe ka a suu kia zuela, u ambela dikota dia dilombe, uixi: Ku kale ni hele! Xikana ngo.

³⁷ Muene kʼehela dingi muthu ku mu kaiela, kikale ngo Phetele, ni Tiiaku, ni Nzuá phange ia Tiiaku.

³⁸ Anga a bhixila kʼonzo ia dikota dia dilombe, u sanga o mundu edi ngo bulukutu ni kudila ni kubhana jingololo.

³⁹ O Muene kia zubha kubokona, uixi: Muedila-hi bulukutu, ni kudila? Mona kʼafu, uaii ngo ku kilu.

⁴⁰ Anga a mu olela uoua. Muene-phe u a tubhula bhu kanga ene oso, u katula ngo tata ni mama avu kamona ka, ni io oso ueza-nâ, anga u bokona muala o mona.

⁴¹ Anga u kuata o mona mu lukuaku, u mu ambela, uixi: Talita, kumi! Uambe, mu ku ki jimbulula: Kilumba, nga ku tumu kubalumuka!

⁴² Kithanganʼokio o kilumba u balumuka, he u enda, kuma uala kia mu kuinhi dia muvu niʼiadi. Enhoso kithanganʼokio anga a diuana kisuma kia dikota.

⁴³ Bhenhobho Jezú muene u a kidika kiavulu, uixi: Kana ku ki tanga anga u tuma ku mu bhana kudia.