Marku 16 - O Mikanda Ikola

Jezú u fukunuka

¹ Kia bhiti o sabhalu, Madiia dia Manda, ni Madiia mamʼa Tiiaku, ni Salomé, a sumba ima iauabha dizumba phala kuia mu ku uaia o mukutu ua Jezú.

² O mu Lumingu, kizuua kia dianga kia semana, a di meneka; kia bhixila bhu mbila, dikumbi dí banda.

³ Bhenhobho, anga a kala mu zuela mudia, exi: Nanhi u tu kundumuina ditadi, bhu muelu ua mbila?

⁴ O kia talesa, a mona ditadi dia kundumuka kia mu kanga. (Mbata o ditadi dia kexile dia dikota.)

⁵ O bhenhobho ene kia bokona mu mbila, a sanga munzangala ua diiala ua xikama bhu mbandu ia kadilu, ua zuata kizuatu kiazele, kialebha. Anga a sasumuka kinene!

⁶ Muene he ua ambela, uixi: Ki mu sasumuke! Mukonda ngejiia kuila mualu sota Jezú dia Nazalé a mu tele ku dikulusu. Muene ua fukunuka kia; bhabha kala-bhu dingi. Talesenu o kididi bhua mu tudile!

⁷ Ndenu-phe, mua ka tangele jixibulu je, ni Phetele, kuila: Muene ua mi tuamenena kia ku Ngalileia, kuene ku mua ka di mona-nê, kala muene kia mi tangelele.

⁸ Anga a tunda, a lenga makidi-kidi bhu mbila, kuma kua a kuata kuteketa ni kudiuana. Ka zuelesa-phe muthu, kuma ala ni uoma. [

Jezú u tukulukila Madiia dia Manda

⁹ Kiki Jezú kia zubha o kufukunuka, mu Lumingu, o kizuua kia dianga kia semana, u dianga kutukulukila Madiia dia Manda, ua mu tundisile mu mukutu ue sambuadi dia dimonho.

¹⁰ Muene anga uia ku ki tudila io oso a kexile-nê, mukonda ene ala mu malamba ni kudila.

¹¹ O kia kʼivu kuila muene ua fukunuka, o Madiia ua di mono-nê, a ki kuata phata.

Jezú u tukulukila dingi Maxibulu aiiadi

¹² Kia bhiti imʼiíi, Jezú muene u tukulukila kiengi kiiadi mudia, kia kala mu njila ia kuia ku matutu.

¹³ Enhá anga a vutuka, aia, a ki jimbuila akua. Hanji-phe nguauâ ku a xikana ioso ia zuela.

Jezú u tukulukila o kuinhi dia xibulu ni umoxi

¹⁴ Jezú anga u tukulukila kiua ene oso, o kuinhi ni umoxi, kia xikama mu kudia, he u a bazela mukonda dia kuxibhaka ni kukola o muẋima, mukonda nguauâ kuxikana kia zuela io oso a mu mono ua fukunuka.

¹⁵ Jezú anga u ambela, uixi: Ndenu mu ngongo ioso, mua ka boke o Njimbu Iambote, kate kua suku Nzambi ni kubhanga athu.

¹⁶ Uoso u xikana, anga a mu batizala, u bhuluka; uoso-phe ka xikana, a ka mu elesa.

¹⁷ Ijimbuete iíi kaiela io oso a xikana: Mu dijina diami, a ka tundisa madimonho, a ka zuela ni madimi mengi;

¹⁸ a ka kuata-kuata jinhoka; se a ka nua ikola-kola, ki ia a bhange ngo kiaiibha; a ka tula maku ma ku thanduʼ a jihaxi, anga ji di sanza.

Jezú u banda ku Diulu

¹⁹ Kiki Ngana Jezú kia zubha kuzuela-nâ, a mu tambula ku diulu, iú ua xikama ku madilu ma Nzambi.

²⁰ O maxibulu anga a muangana, he a boka o Njimbu Iambote mu ididi ioso. Ngana muene anga u kalakala-nê, he u kuatesa o Maka-mê ni ijimbuete ia madiuanu ia kaiela-ku.]