Marku 15 - O Mikanda Ikola

Jezú bhu pholo ia Pilatu

¹ Kithangana, ki kuakie mu kimene, jinganga ja makota, ni adiakimi a Jijudé, ni jimesene ja kulonga o Kitumu, ni Kionge kioso kia Jitata, ki bhongoloka ku maka, anga a kutisa Jezú, aia-nê mu ku mu thelekala kua Pilatu.

² Pilatu anga u mu ibhula, uixi: Kífua, eie u sobha ia Jijudé? Muene uetaia, uixi: Eie-muene ua ki tange.

³ Jinganga ja makota anga a mu tatela ima iavulu.

⁴ Pilatu anga u mu ibhula dingi, uixi: Eie, ku fundu? Talesa o ima ioso iala ku ku tatela!

⁵ Jezú-phe nguê dingi kukumbulula kima, Pilatu anga u diuana.

Jezú a mu elesa

⁶ Mu Fesa-phe ia Phasu, Pilatu uene mu ku a jituina pelezo imoxi uoso a mu bhinga kuala o mundu.

⁷ Kienhokio anga kukala pelezo, dijina die Balaba, a mu kuika kumoxi ni akua a balukile-nâ, o mu kubaluka kua, a te kijibha.

⁸ O mundu anga a bhixila kua Pilatu a kuata ku mu bhinga kubhanga kioso kiene ku a bhanga jinga kia.

⁹ Pilatu ua kumbulula, uixi: Mua mesena ngi mi jituina sobha ia Jijudé?

¹⁰ Kuma muene ua mono kuila, o jinganga ja makota, Jezú a mu thelekala kokue mukonda ngo dia ku mu kuatela luma.

¹¹ Jinganga ja makota-phe ji kala mu funhisa o mundu, phala a bhinge ku a jituina Balaba.

¹² Pilatu anga u kumuna dingi, uixi: O iú-phe mua mu ixana sobha ia Jijudé, ngi mu bhanga kiebhi?

¹³ Ene a di kola dingi, exi: Mu te ku dikulusu!

¹⁴ Kuala Pilatu: Phala-hi? O kituxi kie kia te, kiahi? Ene-phe a suina dingi ni ku di kola, exi: Mu te ku dikulusu! Mu te ku dikulusu!

¹⁵ Anga, Pilatu, kuma ua mesena kubhomba o mundu, u jituisa Balaba. O Jezú kia zubha ku mu bhesa jixikote, u mu thelekala phala ku mu jiibha ku dikulusu.

Jezú a mu bhakula ku masoladi. Ene a mu bhanga kasekelu

¹⁶ O masoladi anga aia-nê ku lumbu lua palasu,—o Palasu ia Nguvulu,—hé a bhongolola o kompaniia ioso.

¹⁷ Anga a mu zuika kapote kakusuka, enda kitundu kia minha, a mu ta-kiu ku mutue.

¹⁸ Anga a kuata ku mu menekena exi: Tana-ku! Eie u sobha ia Jijudé!

¹⁹ Anga a mu beta ni muxi mu mutue, a mu ṗhamena mathe, anga a fukama, he ela kala a mu mu bheza.

²⁰ O kia zubha ku mu sebulula, a mu zula o kapote kakusuka, a mu zuika o izuatu iê-muène. Anga a tubhuka mu lumbu, aia-nê ku kanga phala ku mu ta ku dikulusu.

Jezú a mu phaphela ku dikulusu

²¹ Anga a kuata muthu uala mu bhita njila ie, ua tundu ku matutu. Muthu muenhu Ximá mukua Silene, muene uavu anʼê Xandele ni Lufu. Masoladi anga a mu bhinjika kuambata dikulusu die.

²² Anga Jezú eza-nê bhu Ngolongota, kífua dijina dia lombolola kuila: Kididi kia Kiholongonho.

²³ Anga a mesena ku mu bhana vinhu iolunge ni milongo i sosolola o misusu, i exana mirra. Maji muene-phe, ngua-iê ku i tambula.

²⁴ Anga a mu batela ku dikulusu, a uana izuatu ie ni ku i tela jisorte, kala muthu nʼa mone kioso kia tambula-bhu.

²⁵ Mu ola ia katatu, kia mu te ku dikulusu.

²⁶ Anga a soneka ku thandu o xitasá ie: Sobha ia Jijudé.

²⁷ Anga a mu-ta kumoxi ku makulusu ni ifumbe iiadi. O iú ku madilu, o iu ku kiasu. [

²⁸ Anga ki bhita kala kiosoneke mu Madivulu a Nzambi, exi: Muene a mu bundu kumoxi ni ingumba.]

²⁹ Athu oso ala kubhita bhobho anga a mu nanzesa, ni kuteketesa o mítue, exi: Eiʼó, tata! U bula o tembulu he u i tinga mu izuua itatu!

³⁰ Di kudile-phe eʼ muene, u tuluke ku dikulusu!

³¹ Ni jinganga ja makota kiòmuene ni alongi a Kitumu, a mu ondolola mudia, exi: Ua kudidile athu engi, o ku di kudila muene ua lembua!

³² Kristu, Sobha ia Izalaiele, a tuluke kia ku dikulusu, tu ki mone, tu xikane! Ni enhó, o miíi a a batela-nê kumoxi ku makulusu, a muʼondolola ue.

O ufuilu ua Jezú

³³ Ku bhixila mu ola ia mediia, kua bhiti usuku ku thandu dia oxi ioso kate mu ola ia kavua.

³⁴ Mu ola ia kavua. Jezú anga u di kola ni dízui dia suina: Eloi, Eloi, lama sabachthani! Uambe, mu ku ki lombolola: Nzambi iami, Nambi iami, ua ngʼehelela-hi-á?

³⁵ Amoxi emana-bhu, kia kʼivu, exi: Ivenu! Ua hendekela Elija!

³⁶ Anga bhu kala muthu, u lenga he u bonda jiponja mu mvindangele, u ji sukika ku kamuẋi, u mu bhana o kuxibha, uixi: Ambulenu! Tu mone mba Elija uiza ku mu tulula ku dikulusu!

³⁷ O Jezú-phe anga u di kola, u ta mutendu uonène, he u zubha o muenhu ue.

³⁸ O kibatulu kia Tembulu, anga ki tanduka mu ʼaxaxi, anga ki di bula mu mbandu jiiadi, tunde ku thandu kate bhoxi.

³⁹ Kienhokio, o kabhitangu uemana bhua zukama ni bhuala muene, kia mu mono kioso Jezú kia di kola iú ua zubhidisa, uixi: Muthu iu ua kexi monʼa Nzambi kidi!

⁴⁰ Sai ni ahatu emana mu kanga mu kutalesa. Mudia mu kala ni Madiia dia Manda, ni Madiia dia mamʼa Zuze ni Tiiaku dia ndenge, ni Salomé.

⁴¹ Ahatu enhá, kia kexile muene ku Ngalileia, a mu kaiela jinga he a kala mu ku mu dikila. Bhu kala ue ni ahatu amukuá avulu, a bande-nê ku Jeluzaleme.

Jezú a mu ta mu mbila

⁴² Kubhiẋila mu ngoloxi, kuila kuma kua fulamana kia, mukonda kizuua kia ku di iudika, o mungu kia sabhalu,

⁴³ kuiza Zuze mukua Limateia. Muenhu muadiakime ua tokala ku Kionge kia Jitata. Muene ue muthu ua kexi mu kinga o Utuminu ua Nzambi. Anga u-bhua uoma, u bokona kua Pilatu, u bhinga o kimbi kia Jezú.

⁴⁴ Pilatu anga u kala ni phata, ki evu kuila Jezú ua zubhidisa kia. U tuma kuixana kabhitangu, u mu ibhula se ua zubhidisa kia kithangana.

⁴⁵ O kia zubha ku kʼijiia kua kabhitangu, u tuma kubhana o kimbi kia Jezú kua Zuze.

⁴⁶ Muene anga uiza ni thanga ia dilasola dia linhu ia fina, dia sumbu, o kia mu tulula ku dikulusu u mu aka mu thanga ia linhu, he u mu tula mu mbila ia jikuisile mu ndanji, anga u kundumuisa ditadi dionene, u di xita bhu muelu ua mbila.

⁴⁷ Ni Madiia dia Manda, ni Madiia mamʼa Zuze, a talesa bhuoso bhua mu tula o mukutu ue.