Marku 14 - O Mikanda Ikola

Jinganga ji kanena Jezú

¹ Kiki kuila kua kambe izuua iiadi mu fesa ia Phasu, o Fesa ia Jimbolo ji Kamba Kithûthume, jinganga ja makota ni asoneki anga a mu kanena kioso kia mu kuata ni ndunge phala ku mu jibha.

² Exi-phe, mu Fesa kana, sumba ki bhangesa mvunda, mundu he a tu lungulukila.

O seialu mu Betanha

³ O kia kala mu Betanha mʼonzo ia Ximá mukua dibhute, ua xikama mu kudia, kuiza muhatu uala ni thenda ia alabasa, ia maji ma dizumba, ma nardo ia kidi, ma te kitadi kiavulu. Anga u zukula o thenda, o maji u ma lunduluila ku mutue ua Jezú.

⁴ Bhu kala athu bhenhobho, a kuata kulongolola mudia, exi: Phala-hi o maji a ma texi ngo kienhiki?

⁵ Hinu maji a ma sumbisa mu hama jitatu ja madenádia, anga o kitadi a ki uanena jingadiama. Anga a kuata kuzukutisa o muhatu.

⁶ Jezú-phe, uixi: Mu ehienu! Muhatu mu mu tatesela-hi? Ua ngi bhange kima kiambote.

⁷ Mbata jingadiama mua xalela-na-ju; kithangana kioso ki mua mesena ku a bhanga jimbote, mu ki bhanga. Eme-phe ki ngi xalela ni enu ithangana ioso.

⁸ Muhatu iú ua bhange kioso kia tena. Mukonda muene, kiosuʼiki kiluua ngi fua, ua kalanga ku ngi uaia ku mukutu maji ma ku ngi funda.

⁹ Kidi kiene-phe, ngi mi ambela: Kuoso-kuoso kua ka tula o Njimbu Iambote, mu ngongo ioso, ni kiki ue kia ngi bhange o muhatu iú, a ka ki tanga phala dilembalelu die.

Jezú a mu ta uenji

¹⁰ Juda mukua Kadiota, muthu ua tokala ku kuinhi ni kiiadi, anga uia ku jinganga ja makota phala kuta-nâ o kikutu kia ku a thelekala Jezú.

¹¹ Ene kia zubha ku kʼívua, a kala ni ngalasa iavulu, he a dia nguidi ia ku mu bhana kitadi. Juda muene anga u kala mu langa o thembu ioso iauabha ia ku mu bhakula.

Ngana Jezú ni Jixibulu je, emunana o Phasu

¹² Kutula mu kizuua kia dianga kia Fesa ia Jimbolo ji Kamba kithûthume, thembu o Jijudé iene kujibha o jimbudi phala kusata o Phasu, jixibulu je, exi: Kuebhi, Ngana, ku ua mesena ku tuia mu ku zalela, ku u dila o Phasu?

¹³ Muene anga u tuma jixibulu jiiadi, uixi: Ndenu mu mbonge. O muenhomo mua ka takana ni muthu uambata disanga dia menha. Mu kaiedienu muene,

¹⁴ o mʼonzo muoso mua bokona, mua kʼambela mukua dibhata, muixi: Eme Mesene, uixi kiki: Sala iami iebhi, mu ngi dila o Phasu ni jixibulu jami?

¹⁵ Muene-phe, ua ka mʼidikiza inzo ia thandu, iòzale kia. Enu mu tu iudikila ima ioso muenhomo.

¹⁶ O jixibulu jiiadiʼojo anga jiia, a bhixila mu mbonge, he a sanga ioso ia ambela muene. Ene anga a iudika o Phasu.

¹⁷ Kutula mu ngoloxi, Jezú muene ueza ni kuinhi ni kiiadi.

¹⁸ O kia xikama ku meza, a kala mu kudia, Jezú uixi: Kidi kiene ngi mi ambela, sai muthu mudienu, ngala kudia-nê, ua-nda ku ngi thelekala.

¹⁹ Anga a kala ni mukondo, a kuata kuila, mu umoxi-umoxi: O kuila eme, Ngana?

²⁰ Jezú muene-phe ua vutula, uixi: Muene muthu ku kuinhi ni kiiadi, ngala kumata-nê bhu dilonga.

²¹ Kuma Monʼa Muthu ua-nda kufua kala kia muambe o Mikanda Ikola. Maji o muthu ió-phe, lamba die uoso u mu thelekala! Muthu muenho kimuua se ka mu vualele!

O Seialu ia Ngana

²² O kia kala mu kudia, Jezú u katula mbolo, o kia zubha kusakidila Nzambi, u i bhasujula, anga u a uanena, uixi: Dienu! Iú uene mukutu uami.

²³ Anga u katula o kopho, ki a zubha kusakidila Nzambi, u a bhana, ene oso ia anu-ku.

²⁴ Uixi: Ia, ene o manhinga mami, a lunduluka mu mulonga ua athu avulu. Ene o manhinga a kuatesa o Kikutu Kiòbhe bhu kaẋi ka Nzambi ni athu.

²⁵ Ngi mi ambela kidi, kuma eme, ku sumu ia muvide, ki ngi nu-ku dingi, kate kizuua ki nga ka i nua ia ubhe, mu Utuminu ua Nzambi.

²⁶ O ki a zubha kuimba o muimbu, a tunda, aia ku Mulundu ua Midiva.

Phetele a mu dimuna

²⁷ Jezú anga u ambela maxibulu mê, uixi: Enuʼenu oso mua-nda kulenga he mu ngi xa; kuma a ki soneka mu Mikanda Ikola, exi: O mubidi ngi mu jibha, o jimbudi ji muangana.

²⁸ Hinu-phe ki ngi fukunuka, nga ka mi tuamenena ku Ngalileia.

²⁹ Kuala Phetele-phe: Né-mbé ene oso a lenga nʼa ku xisa, eme kana!

³⁰ Jezú u vutuila Phetele, uixi: Kidi kiene ngi ku ambela kuila, eie-muene lelu, mu usuku uenhú, dikolombolo bhu di kokuela luiadi, eie ua ngi di tunu kia lutatu, ni kuila kuma eie ku ngʼ ijiia.

³¹ Phetele-phe u ki suinina kiavulu ni ku ki zuela, uixi: Ne kia ngi bhingi ngi fua kumoxi ni eie, Ngana, ki ngi ku ditunu kuila ki nga kuijiia. Maxibulu oso anga a tanga ua kienhiki.

Jezú mu Ngetesemane

³² Jezú ni maxibulu-mê anga a bhixila kididi kiòxite kikonzo, a kʼixana Ngetesemane. Jezú anga u ambela jixibulu je, uixi: Xikamenu bhenhabha, ngiie mu sambe.

³³ Anga u katula Phetele, ni Tiiaku, ni Nzuá, phala a kale-nê bhenhobho. Kithangana kienhokio Jezú anga u kala ni mukondo, u tata kiavulu.

³⁴ Anga ua ambela ene, uixi: Muẋima ua ngi kenanana kinene, bhulu-bhulu dia kufua! Xalenu bhenhabha, mu lange.

³⁵ Anga muene u sondoloka-ku kofele u di bhala bhoxi, he u samba kuila se ki xikina, kithangana kiokio ki mu bhite.

³⁶ Anga u kala mu samba, uixi: Abha Tata! Eie ima ioso ua i tena. Dikáu didi dia phaxi, ngi katule-diu. Maji-phe ki ngʼinda eme kana, inda ki uinda eie.

³⁷ Anga uiza, u sanga o maxibulu kitatu kia aiʼâ ku kilu, anga u ambela Phetele, uixi: Ximá, kífua uie ku kilu? O kulangidila ola ngo imoxi, ua ki tokoka?

³⁸ Langenu, mu sambe, phala ki mu di bhale mu mubhetu. O nzumbi ietaia kidi kulua ni tendasá, o xitu-phe iabhuila.

³⁹ Anga uia dingi u samba, mambu ene amoxi.

⁴⁰ Anga uiza luamukuá, u a sanga aii ku kilu, kuma mu mesu mua a neme kiavulu; kioso kia mu vutuila ka kʼijiia.

⁴¹ Anga uiza lua katatu, u a mbela, uixi: Hanji mua zeka, muia kilu kienu? Kuabhu kia! Ola ieza-bhu! Talesenu, Monʼa Muthu a mu thelekala bhu maku ma akua ituxi.

⁴² Fundumukenu, tuienutu. Talesenu, io ua ngi thelekala ua tula.

Jezú a mu kuika

⁴³ Kithanganʼokio Jezú kioso kia kexile hanji mu zuela, Juda ua tokala ku kuinhi ni kiiadi, u tula! Ni mundu eza-nê, ambata ni jixibhata, ni jimbangala, a tundu ku jinganga ja makota, ni ku jimesene jene mu longa o Kitumu kia Nzambi, ni ku adiakime a Jijudé.

⁴⁴ O Juda, io ua mu thelekala, ua a bhele kijimbuete, uixi: Uoso ngi mu bhana beju, muenho; mu kuatienu, muie-nê, ka mi xe.

⁴⁵ O kia zubha kutula bhuala Jezú kithanganʼokio Juda u mu bhixila, uixi: Mesene! Anga u mu bhana jibeju.

⁴⁶ Kienhokio anga Jezú a mu tula maku, a mu kuata.

⁴⁷ Kua ia emana-bhu-phe, ku kala muthu, u fomona xibhata ie, he u kuama o mubhika ua nganga ia dikota, u mu batula o dítui.

⁴⁸ Jezú anga u a kumbulula, uixi: Kífua mueza ku ngi kuata ni jixibhata, ni jimbangala, kala ngi kifumbe?

⁴⁹ Nga nange izuua ioso ni enu mu tembulu ni kulonga, maji ki mua ngi kuata, lembua! O kiki-phe kia bhiti, mu kukumbidila o Madivulu Makota mòsoneke.

⁵⁰ Anga maxibulu a mu xa, ene oso, a lengʼâ.

⁵¹ Bhu kala-phe munzangala ua diiala, ua kexi mu kaiela Jezú, ka zuata kima, ua di futu ngo dilasola dia linhu. Anga a mu kuata;

⁵² Muene-phe ua a xangumuka, he u a xila o dilasola bhu maku, u lenga ni thuẋiʼa thakala.

Jezú bhu pholo ia Kionge kia Dikota

⁵³ Jezú anga aia-nâ, he a mu bheka kua nganga ia dikota. Kuenhoko anga a bhongoloka-nê jinganga ja makota joso, ni adiakimeʼa Jijudé ni asoneki.

⁵⁴ Phetele-phe ua mu kaiela Jezú dikanga ku dima, kate mu lumbu lua nganga ia dikota. Anga u bokona, he u xikama ni jifixiiadi mu kuota tubhia.

⁵⁵ Bhenhobho, jinganga ja makota ni Kionge kioso kia Jitata, a sota umbangi ua kuêlesa Jezú ni ku mu jibha, anga a u lembua.

⁵⁶ Sumbala jimbangi javulu ja makutu ja mu tatela, iú u zuela kiengi, o iú u zuela kiengi.

⁵⁷ Bhu kala ni ia emana, he a bhana umbangi ua makutu, exi:

⁵⁸ Etu tua mu ivu kuzuela, uixi: Ngi bula o tembulu iíi, iòtunge ni maku, anga ngi tunga iengi ki iòtunge ni maku.

⁵⁹ Kate ni enhá a tokoka kuzuela kima kimoxi.

⁶⁰ Nganga ia dikota anga u imana bhu ʼaxaxi, u ibhula Jezú, uixi: Eie kífua, ku fundu? Kia ku tatela enhá kiedi kiebhi?

⁶¹ Muene-phe ua di xibhe, nguê kukumbulula. Nganga ia dikota anga u mu kumuna dingi, uixi: Kífua eiemuene u Kristu, Monʼa Ngana Nzambi ukola?

⁶² Jezú uixi: Eme-muene. Enuʼenu oso hadia mua ka mona Monʼa Muthu ua xikama ku madilu ma Nzambi Uatena Ioso, ni kia kejiia ni kutuluka ku matuta ma diulu!

⁶³ Nganga ia dikota, bhenhobho u tandujula izuatu ie, uixi: Jimbangi jahi dingi ngo ji tua bhindamena?

⁶⁴ Enuʼenu muevu o diẋongo dia ẋonguena Nzambi bhenhabha! O kiki mua fika kiebhi? Ene oso kuma a mu kitukila, anga a batula, exi: Muthu ua ku mu jibha.

⁶⁵ Amoxi-mu anga a kuata ku mu ṗhamena mathe. A mu futa o pholo, anga a mu bhana jihome, exi: Zambulaze uoso ua ku beta! Jifixiiadi anga ji mu tambulula ni jihuxi.

Phetele u di tuna Jezú

⁶⁶ Phetele kia xikama ku lumbu bhoxi, kueza monʼa kilumba ua tokala kua nganga ia dikota.

⁶⁷ O kia mono Phetele, uala mu kuota, ua mu ixi sui, uixi: Eie ue ua kexi ni Jezú dia Nazilé.

⁶⁸ Muene-phe ua di tunu uixi: Muenho eme ki ngi mu ijiia. Ki nga kʼijiia ue ngo kioso eie ki uala kuzuela. Anga u tubhuka ku mbalanda; kienhokio dikolombolo anga di kokola.

⁶⁹ Monʼa kilumba anga u mu mona, u kuata kuambela athu ala-bhu, uixi: Muenhu ue ua tokala-nâ.

⁷⁰ Muene iú ua ditunu luamukuá. Kubhanga kathangana ene ue emana-bhu, ambela Phetele, exi: Kidi kiene-ze, eie ue ua tokala-nâ, mukonda u mukua Ngalileia.

⁷¹ Phetele muene-phe u kuata kuxinga ni kuloka, uixi: Xinge phaietu muene! Muthu mua mu tangeʼó, ki nga muʼijiia! Se nga tange makutu, Nzambi a ngi bhane kaxtiku.

⁷² Kithanganʼokio dikolombolo di kokola lua kaiiadi. Phetele anga u tukumuka o maka a mu ambela Jezú kuila: Dikolombolo bhu dia ka kokuela luiadi, eie ua ngi di tuna lutatu. O kia zubha ku ki banza, kia mu kuata ku muẋima anga u dila.