Marku 13 - O Mikanda Ikola

Jezú ku mulundu ua Midiva u tanga ima ia kèza-ku

¹ Jezú kia kala mu kutunda mu Tembulu, xibulu iê imoxi i mu ambela, uixi: Mesene, talesa o matadi kia ma kalakala, ni jinzu ki jala! Kutunga kuahi ngo!

² Jezú ua mu ambela, uixi: Jinzo ua ji mono ja makota, kuambe? Bhenhabha-phe kana ditadi hinu dia ka xala-bhu, dia di lundama hanji kua mukua, ni di a kamba ku di lundumuna!

O dimatekenu dia malamba

³ O kia xikama ku Mulundu ua Midiva bhua lulama ni bhu Tembulu, Jezú u kala mu kengelela o Tembulu. Phetele ni Tiiaku ni Nzuá ni Mandele, a mu ibhula bhu mbandu, exi:

⁴ Tu tangele o thembu kia ka bhita imʼiíi. O Kijimbuete kiê kiahi, kuila ima ioso iíi a-nda ku i kumbidila kia?

⁵ Jezú anga u kuata ku a zuelela, uixi: Alukenu, kana muthu a mi jimbidise.

⁶ Sai athu avulu, a keza mu dijina diami, exi: Emʼiú ngi Kristu! A ka bhomba athu avulu.

⁷ O ki mu ívua ita ni minumango ia ita, ki mu ki tukumuke, mukonda imʼiíi i bhinga i dianga kubhita, o dizubhilu-phe kiluua.

⁸ Kuma kifuẋʼiki, kia ka lua ni kifuẋi kia mukua; kilômboʼiki kia ka lua ni kilombo kia mukua. Ku kala kinuminu kia bhoxi ki tungutisa mikau iavulu; kukala ue jinzala mu jixi. Imʼiíi-phe diandekelu ngo dia misusu, kala ia iu uala ku isènda.

⁹ Enu-phe di langienu! Kuma a ka mi kuta ni ku mi thelekala bhu kionge phala ku mi fundisa, a ka mi beta mu malombe. Mukonda diami a ka mi bheka bhu pholo ia jinguvulu ni enexi, enu he mua ka a tudila o Njimbu Iambote, mu ku a bhana umbangi.

¹⁰ Mukonda ki bhinga o Njimbu Iambote a dianga ku i boka ni ku i sanhalesa ku akua jixi joso.

¹¹ O kia mi kuta he a kala ku mi bheka mu ku mi bhakula, ki mu kale ni hele kioso ki mua-nda kuzuela; kioso Nzambi kia ka mi bhana kithangana kienhókio, kiene ki mu zuela; kuma ki enu dingi mu zuela, maji o Nzumbi Ikola.

¹² Muthu ua ka bhakula phangʼiê, phala ku mu jibha; o tata u bhakula mona; o ana a ka kitukila adiʼâ nʼa jibhisa.

¹³ A ka mi zemba kuala athu oso, mukonda dia dijina diami. Maji uoso-phe u kolokota kate bhu dizubhilu, muene u bhuluka.

O divuua dia dikota

¹⁴ Jezú anga u zuela dingi, uixi: Ki mu mona-phe o kisunji ki buikisa mundu kiemana bhuma ki kia tokala kukala-bhu, (uoso mutangi u tanga, a tongolole). Kienhókio, oso a kala mu Judeia, a ka lengele ku milundu.

¹⁵ O uoso uala ku thandu dia ʼnzo iê, a lenge lusolo, ka tulukile dingi o kubokona mʼonzo nʼa katule-mu kimbamba.

¹⁶ O uala kia ku mukau, kʼalukile dingi ku bhata mu kutakana o izuatu iê.

¹⁷ Lamba dia ahatu ió-phe oso a ka kala ni mavumu, mba a kala mu kuamuisa mu izuuʼomo!

¹⁸ Sambenu kua Nzambi, phala ki ki bhite bhu thembu ia mbambi.

¹⁹ Kuma izuuʼoio kua kala divuua dia dikota, kiluua ngo di kala-ku tunde ku dimatekenu dia Nzambi kukalakala ima ioso kate lelu; ne ku hadia ki di moneka luiadi!

²⁰ Ngana se ua kambele kufikisa izuuʼ oio, kana xitu ieji kubhuluka. Maji mukonda-phe dia athuʼê angene a Nzambi, a solo muene phala ku a bhulula, izuua ienhoio a i fikisa kia.

²¹ Kienhókio se ku kala muthu u ku ambela, uixi: Talesa, Kristu iú kunu! Mba: Tala, Kristu iú koko! Ku ki xikane.

²² Mukonda kua ka tukuluka ji-Kristu ja makutu, ni jipolofeta ja makutu, a kèdikiza isuma ni madiuanu, phala a tàmbe kate ni anʼ angene a solo Nzambi, se ki xikina ku ki bhanga.

²³ Enu-phe di langienu! Talesenu, Eme nga kalanga ku mi tangela ima ioso, kiosuʼiki kiluua i bhita.

Kià kèza o monʼ a muthu

²⁴ Mu izuuʼomo-phe, kutunda ku divuuʼodio, dikumbi dia ka fulamana, o mbeji ia ka kamba kumuika.

²⁵ O jithéthembua ja ka lauka ku diulu, o jinguzu jala ku maúlu a ka ji tungutisa.

²⁶ Kienhókio kiene kia ka mona o Monʼa Muthu iu uiza ku matuta ni kutena kuavulu ni ungana.

²⁷ Muene ua ka tuma ji-anju je ni ji bhongolole athuʼê angene ku mbandu jiuana ku tunda o kitembu, tunde kua suku oʼxi kate kua suku o diulu.

O disa dia mufiku

²⁸ Ku mufiku-phe di longienu-ku kifika kiê: Luthangu lue ki lu di bhanga kia kindemvuna he lu buingita isasa, mua kʼijiia kuma mvula ia zukama.

²⁹ Kiene ue enu, ki mua ka mona imʼiíi íi bhita, ijiienu-kiu kuma muene ua zukama, uala kia bhu muelu.

³⁰ Kidi kiene ngi mi ambela: Muiji iú ki u buila, kate kia ka bhita ima ioso iíi.

³¹ O diulu ni oxi hinu i buila; o maka mami-phe ki ma ka buila.

O kulangidila

³² Jezú anga u lombolola dingi, uixi: Kizuuʼokio-phe ni kithangana kiê, kana muthu ua kʼijiia, ne ji-anju mu diulu, ne o Mona, ki kale Tata muene ngo.

³³ Alukenu-phe, mu langidile, mu sambe; kuma o thembu ki mua ijiia.

³⁴ Kia kela mukua ni muthu uaii mu uenji, kʼoxi iengi, u xa dibhata die, u lekela akua mbele, he u a uanena kala muthu ni kikalakalu kiê, o mukua muelu he u mu tuma o kulangidila.

³⁵ Langidilenu-phe! Kuma kithangana kioso hinu kʼiza ngana ia dibhata, ki mua kijiia, mba ku kièmba mba mukaẋi ka usuku, mba mu makolombolo, mba mu kimene;

³⁶ phala ki ki bhite kuila sumba uiza ku mbulu nʼa mi sange muaienu ku kilu!

³⁷ Kioso ki nga mi tangela enu, ene oso nga a tangelakiu: Di langienu!