Marku 12 - O Mikanda Ikola

Kifika kia jingunza ji kala iísueia

¹ Anga Jezú u kuata ku a tela ifika, uixi: Kukala muthu u dimisa mulenga ue ua mivide, u u xita kikonzo, u kanda ditangi dia ku kamena vinhu, he u tunga kithungu kia di leka phala dikengelelu dia ku talesa ioso mu dibhia, anga u u lukalesa ku jingunza, muene uia kuengi mu uenji.

² Ku tula bhu thembu ia tokala kubhongolola idima, u tuma mubhika ku jingunza, phala kutambula-ku ibundu ia mulenga.

³ Jingunza anga ji mu kuata, ji mu beta, he ji mu kaia maku ma hatu.

⁴ Anga u tuma-ku mubhika uamukuá. Muene ue anga a mu kuama mu mutue, a mu bhanga ufusa, a mu lebhula.

⁵ Anga u tuma dingi mukua. Maji o muenhu idimakaji ia mu jibha. Ni akua dingi avulu: Iá, a a beta, ia a a jibha.

⁶ O mukua mulenga-phe kua mu xala kia ngoho monʼe a mu zola. Ne kienhókio, ku pholo kunu, anga u mu tuma muene, uixi: Nga ki xikana, kuila Monʼami a mu xila.

⁷ Maji o jingunza jenhiji-phe ji di longesa, exi: Iú muène kabhingano! Ndokuenu, tu mu jibhe, undundu ue tu mu buê-u!

⁸ Anga a mu kuata, a mu jibha, a mu tubhula mu kikonzo, a mu texi.

⁹ Ngana, uavu o mulenga ue, ua-nda kubhanga kiebhi? Hinu uiza, u jibha o jingunzʼojo, o mulenga he u u lukalesa athu engi.

¹⁰ Enu kiluua mu tanga makʼama, mòsoneke mu Mikanda Ikola, kuila: O ditadi dia di tunu jimesene, diene dia kuatesa bhu thungi;

¹¹ dienhidi dia tundu kua Ngana, ku mesu metu-phe dia di bhange kisuma!

¹² Ene anga a sota ku mu kuata, maji a kala ni uoma ua mundu; kuma a mono o kifikʼiki ua a tela-kiu ene; anga a mu xa, a tunda-bhu.

Phata ia ku bhakuila Sézalu

¹³ Ene anga a katula athu ku jifalizeu ni ku akua Helode, phala ku mu kuata ku maka.

¹⁴ O kia zubha kutula, exi: Mesene, etu tua kuijiia kuila u mukua kidi, ku lenge muthu uoso-uoso. Mukonda eie ku suu jipholo ja athu, u longa kidi o njila ia Nzambi. O kiki tu tangele hanji: Tua tokala kubhana lubhaku lua Sézalu, inga kana? Tu lu bhana, inga ki tu lu bhana?

¹⁵ Muène-phe kuma uejiia o makutuʼa, uixi: Mu ngi bhombela-hi, phala ku ngi kuata mu kizuelu kiami eme-muène? Ngi tambuisienu denádia, ngi di mone.

¹⁶ Anga a mu tambuisa-diu. Ua ambela, uixi: O kídifua kiki, ni kidimbu kiê, kia nanhi? Exi: Kia Sézalu.

¹⁷ Bhenhobho Jezú ua ambela: Bhanenu-phe Sézalu, kia tokala Sézalu; Nzambi, kia tokala Nzambi. Anga a diuana kiavulu uvutuilu ue.

O phata ia difukunukinu

¹⁸ Kua mu kane dingi o jisaduseu, akua kuila ki kuene kufukunuka; a mu ibhula, exi:

¹⁹ Mesene, Mozé ua tu sonekena kijila kuma, diiala se di kala ni phangʼiê uafu, iu uaxi muhatuʼê, maji kaxi mona, phangʼiê ia diiala a sakane muhatuʼê, mbe a sokolole o mbutu ia kota die.

²⁰ Kua kexile-phe sambuadi dia mala, anʼa kamama. O dikota anga u sakana muhatuʼê, o ki a fu, ka xi mona.

²¹ Kiubha kiê anga u mu lundula, ufua, ka xi mona; o kiubhata ue kiòmuene.

²² Sambuadi dioso dia sakana-nê, maji kana muthu ua-xê mona. Ene oso kia zubha kufua, o muhatu ue uafu.

²³ Ku difukunukinu-phe muenhu ua kala mukajiʼa nanhi? Kuma sambuadi dioso dia mu sakana!

²⁴ Jezú ua ambela, uixi: Mua tondala kiavulu! Kia mi tondalesa ki kienhiki? Muedi o Madivulu Akôla òsoneke ki mua ejiia, ni kutena kua Nzambi ki mua kuijiia.

²⁵ Mukonda kioso kia ka fukunuka o madifundu, ki kua kala dingi kusakana, mba kusakanesa. Athu a kala-phe mukua ni ji-anju mu diulu.

²⁶ O kia madifundu-phe mba a fukunuka, enu kiluua mu tanga mu divulu dia Mozé? Sai bhuala o maka ma Kisasa, kia mu ambela Nzambi, uixi: Eme ngi Nzambi ia Mbalahamu, Nzambi ia Izake, Nzambi ia Jakobo.

²⁷ Mu kuzuela kiki-phe, muene uambe kuila ki Nzambi ia madifundu, maji ia athu a muenhu. Enu mua tondala muene kiavulu!

Kioso o kijila kia dikota

²⁸ Mesene imoxi ia Kitumu ua zuka-mene-bhu, kia zubha kuívua jiphata ja kuatele, ni kia mono kuma muene ua a vutuila kiambote, ua mu ibhula, uixi: Ku ijila ioso, kiebhi o kijila kia dianga?

²⁹ Jezú ua vutula, uixi: Kijila kia dianga kiki: Ivua, u Izalaiele! Ngana Nzambi ietu, muene Ngana imoxi ngo.

³⁰ Ngana-phe, Nzambi iê, u mu zola ni muẋima ue uoso, ni muenhu ue uoso, ni kilunji kiê kioso, ni nguzu iê ioso.

³¹ Okia kaiadi kiki: Mukuenu u mu zola, kala ki ua di zola eie-muene. Kana-ku dingi kijila kia tundu iiadíʼ ii.

³² Kuala o mesene ia Kitumu, kidi kiene, Mesene! Eie ua tange kiambote kuila Nzambi iala ngo imoxi, ki kuene dingi mukua.

³³ O ku mu zola ni muẋima uoso, ni kilunji kioso, ni nguzu ioso, ni kuzola mukuetu kala ki tua di zolo etuʼene, kotʼelele, o jisata joso ja ibhaku ia kuoha ni maujitu engi a kubhakuila Nzambi, ndenge.

³⁴ Jezú kia mono kuma o mesene ia Kitumu ua kumbulula ni kilunji, uixi: Eie o Utuminu ua Diulu ki ua ku kala dikanga. Tunde kienhiki, kana dingi muthu ua bhumine kukuata-nê phata.

Kristu monʼ a Davidi?

³⁵ Jezú anga u kumbulula kia kala mu longa mu Tembulu, uixi: O jimesene ja Kitumu ene mu longa kiebhi kuma Kristu monʼa Davidi?

³⁶ Se o Davidi muene, kia mu funhisa o Nzumbi Ikola, ua soneka uixi: Ngana u ambela Ngana iami; Xikama ku madilu mami, kate ki ngi ku bhanga o jinguma ji kala bangu iê ia inama.

³⁷ Davidi muene se ua mu edi Ngana, u kala-phe kiebhi monʼe? O mundu ua dikota anga a mu ivua ni ngalasa, o ima ioso ia kexi mu longa.

Jezú u longolola o Asoneki

³⁸ Mu kulonga kue, uixi: Dimukinenu o jimesene ja kulonga Kitumu, endi o kukembela mu izuatu ia lebha ni kutambula maumenekenu bhu itanda mu nzunga,

³⁹ Ni kusola o ibhuna ia jingana mu malombe, ni ididi ia ukota ku jifesa.

⁴⁰ Ene a dia mabhata ma ngene ma atudi, anga a sueka o mangonha ma mu kusamba kuavulu. Enhá, o kaxtiku ka ka kala ka dikota.

O tu-milambongo tua Mutudi

⁴¹ Jezú anga u xikama bha lulama ni bhu dizaku. He u kala mu talesa o mundu ki ala kuta kitadi mu dizaku. Anga kukala ni jimvuama javulu, atamu ndumba dia kitadi.

⁴² Anga kuiza mutudi uala ngadiama, u ta-mu tumila-mbongo tuiadi tu bhanga ngo kíphaka.

⁴³ Muene anga uixana jixibulu je, uixi: Kidi kiene ngi mi ambela: Kota kia te-mu o muhatu iu, mutudi ua ngadiama, ene oso ndenge, a te kitadi mu dizaku.

⁴⁴ Kuma ene oso a katula ngo ku kiki kia subhuka ku nzungule; muene-phe, mu uadiama ue, ka mono dingi bhua nomona, iu ua te-mu o huta iê ioso.