Marku 11 - O Mikanda Ikola

Jezú u bokona mu Jeluzaleme ni ku mu tanesa kuala o mundu

¹ Jezú ni maxibuluʼê kia zukama ku Jeluzaleme, a bhixila ku Mulundu ua Midiva, bha lulama ni jisanzala ja Betefaje ni Betanha. Bhenhobho muene u tuma jixibulu jiiadi, uixi:

² Ndenu ku sanzala ia mi lulama bhabha. Kithangana ki mua tula, mua ka sanga monʼa bulu, iòkuike, kiluua muthu u i mondala; mu i jituna, mu ize na-iu bhabha.

³ He bhu kala muthu u mʼila kuila: Mua-lu bhanga-hi? Mua kela: Ngana ua i bhindamena. Muene kindala u i tumikisé.

⁴ Anga aia, a sanga o kabulu a ka kuikila bhu mbanduʼ a muelu bhu kanga; anga a ka jituna.

⁵ Ku athu emana-bhu, amoxi, exi: Muala kubhanga-hi? Mu jituina-hi o kabulu?

⁶ Anga a kumbulula kala kia a longesa Jezú, ene anga a ehela.

⁷ O kabulu anga eza na-ku kua Jezú, a ka zuika izuatu ia, muene anga u ka mondala.

⁸ Bhu kala athu avulu a mu zalela izuatu ia mu njila; amukuá a zala isasa ia su mu mukau.

⁹ Ni ia a mu tuamenena, ni ia a mu kaiela, a di kola, exi: Hozana kua Nzambi! Tana-ku, ueza mu dijina dia Ngana!

¹⁰ Tanesenu o usobha ueza-ku, usobha ua tatʼ etu Davidi! Hozana kua Nzambi ku maúlu!

¹¹ Jezú anga u bokona mu Jeluzaleme, kate mu Tembulu; o kia zubha ku talesa-mu ima ioso, kuma ngoloxi kia, u tunda ni kuinhi ni kiiadi, uia ku Betanha.

O mufiku ua lela

¹² Kukia ni kimene, mu kutunda ku Betanha, nzala i mu kuata.

¹³ O kia mono mufiku mu kanga, uala ni ifuakasa, u bhixila, sumba u bonga-ku tufiku. Kia u bhiẋila-phe, u sanga ifuakasa ngo iala-ku, kuma ki iene o thembu ia jifiku.

¹⁴ Muene anga uambela o muxi, uixi: Ki bhuà kale dingi muthu udia kubundu ko kue. Jixibulu anga a kʼívua.

Jingenji a ji kaia mu Tembulu

¹⁵ Kioso Jezú ni maxibuluʼê kia bhixila mu Jeluzaleme, muene u bokona mu Tembulu, he u kuata kukaiese-mu oso a sumba mba a sumbisa mu Tembulu, anga u lundula o meza ma akua kutolokala kitadi, ni ibhuna ia abadi a tadika membe.

¹⁶ Kehela muthu kubhita mu Tembulu ni kitutu kiosokioso.

¹⁷ Muene anga u kala mu kulonga enhoso, uixi: Ka ki soneka mu Mikanda Ikola kia tange Nzambi kuma: Inzo, iami, a ixana inzo ia kusambela, ia akua jixi joso? Enu-phe mua i kitula ngenda ia kusuamena míii!

¹⁸ O makota ma jinganga ni jimesene ja kulonga o Kitumu a kʼívua, anga a kala mu ku mu kanena kioso kia mu jibha, mukonda a mu kuatela uoma, mbata o mundu uoso a mu diuana ulongelu ue.

¹⁹ Kutula mu ngoloxi, Jezú ni maxibuluʼê a tunda mu mbonge.

O dijimbuluilu dia mufiku ua lela

²⁰ O ki kuakie kia kala mu kubhita mu kimene, a mona mufiku ua lela kate ku jindanji.

²¹ Phetele kia ki tukumuka, uixi: Mesene, talesa o mufiku u ua te mázui, ua lela.

²² Jezú ua a kumbulula, uixi: Xikanenu Nzambi.

²³ Kidi kiene ngi mi ambela: Uoso ua kela mulundu iu: Zangumuka bhabha, ua ka di vike mu ʼalunga, o ku muẋima ka te-ku phata, maji u xikana kuma kioso kia tange ki bhata, ki mu bhita muene.

²⁴ Uila kiki ngi mi ambela: Ioso ima i mu bhinga mu kusamba, xikanenu kuma mu i tambula, anga mu i tambula muene.

²⁵ O ki mu kala mu kuimana ni kusamba, se kuala muthu mua mu kala ni phonzo, mu lolokiene, phala o Tatʼenu uala mu diulu a mi loloke ue ikuma ienu. [

²⁶ Kuma se mu kamba kuloloka akuenu, Tatʼenu uala mu diulu u kamba ue ku mi loloka o ikuma ienu.]

O phata ia batizu ia Nzuá

²⁷ Anga a bhixila dingi mu Jeluza leme. O muene kia kala mu jeta mu Tembulu, makota ma jinganga ni asoneki ni adiakime ku Jijude eza kua Jezú;

²⁸ anga a mu ambela, exi: Ungana uahi u uala na-u, phala kubhanga ima iíi? Ungana iú nanhi ua ku bhana-u ua kubhanga imʼii?

²⁹ Kuala Jezú: Eme uami ngi mʼibhula ue kima kimoxi, mu ngi vutuile, anga ngi mi tangela kiua uoso ungana u ngala na-u phala kubhanga imʼiíi.

³⁰ O batizu ia Nzuá ia tundile ku diulu kua Nzambi, inga ku athu? Ngi vutuidienu.

³¹ Ene a banza ni muẋima, exi: O ki tuila: Ku diulu kua Nzambi; muene ua-nda kuila: ene-phe Nzuá mua kambela-hi ku mu xikana?

³² O ki tuila: Ku athu, (o mundu a-nda ku tu lungulukila kuma ene oso a xikana kidi kuila o Nzuá polofeta, o batizu iê ki i tena kutunda ku athu).

³³ Anga a vutuila Jezú, exi: Manhí kiá! Ki tua kʼijiia. Kuala Jezú: Eme uami, ki ngi mi tangela uoso ungana u ngala na-u, phala kubhanga imʼiíi.