Marku 10 - O Mikanda Ikola

O ku di senga

¹ Kubalumuka bhenhobho, Jezú uiza bhu mbambe ia Judeia, ku sambua dia Njoloda; ifuẋi anga i mu bhongolokela dingi; muene anga u kala mu longa kala ki ene o kífua kiê.

² Anga kuiza Jifalizeu, ji mu ibhula phala ku mu londa, exi: Diiala se u senga muhatuʼê, kala kiala mu Kitumu kietu, u lunga?

³ Muene ua a kumbulula uixi: Mozé ua mi tumu kiebhi?

⁴ Exi: Mozé uehela o ku mu bhangela mukanda ua lubongo, ni ku mu senga.

⁵ Kuala Jezú-phe: Mukonda dia kukola kua miẋima ienu, kiene Mozé kia mi sonekena o kijilʼiki.

⁶ Tunde-phe ku dimatekenu dia kubhanga ima ioso, a ki zuela kuila: Nzambi ua a bhange ndumbe ni mukaji.

⁷ Kienhiki ki bhangesa diiala di xa tatʼâ ni mamʼa, he u di kuatenena kua mukajiʼê,

⁸ ene kiiadi kia anga a kala xitu imoxi ngo. Uila kiki, kala dingi kiiadi, maji xitu imoxi kia.

⁹ Kioso-phe kia bandeka Nzambi, ki bhu kale muthu u ki uanununa.

¹⁰ Kutula mʼonzo jixibubulu ji mu kumuna dingi o makʼama.

¹¹ Muene iu ua ambela, uixi: Diiala uoso u senga mukajiʼê nʼa sakana uengi, ua te phanda.

¹² O muhatu ue, se u senga munumiʼê, nʼa sakana uengi, ua te phanda.

Jezú u benzela o tuana

¹³ Anga amoxi-mu a kala ku mu bhekela tuana tua ndenge, phala a tu tule maku mê ku thandu; maji jixibulu je anga a bazela oso eza na-tu, a a fudisa.

¹⁴ Jezú-phe kia ki mono, kia mu iibhila kiavulu, uixi: Ehelenu o tuana ku ngi bhixila! Kana ku tu kaia, kuma o Utuminu ua Nzambi ua tokala oso a soko ni tuana enhá.

¹⁵ Kidi kiene ngi mi ambela: Uoso u kamba kutambulula o Utuminu ua Nzambi kala kamona ka ndenge, uene ka ka u bokona.

¹⁶ Anga u tu tambula bhu jihata je, u ta maku mê ku thandu dia, he u tu benzela.

O munzangala ua mukua itadi

¹⁷ Mu kutunda bhenhobho, kutula mu njila, kuiza muthu ni kulenga u mu fukamena, he u mu ibhula, uixi: Mesene ia mbote, eme ngi bhanga kiebhi, phala ngi lundule o muenhu ki uàbhua?

¹⁸ Jezú ua mu ambela, uixi: Eie u ngʼila kiebhi iambote? Sai ngo umoxi uala mbote, muene Nzambi.

¹⁹ O ijila ua ijiia? Kana kujibha, Kana ku ta phànda; Kana kunhana, Kana kubhana umbangi ua makutu. Kana kufumba, Tatʼenu ni mamʼenu a bhane ujitu.

²⁰ Kuala munzangala: Mesene, ima ioso iíi, nga i kumbidila tunde undenge.

²¹ Jezú ua muʼixi sui, ua mu zolo. Anga u mu ambela, uixi: Eie kima kimoxi ngo kia ku kambe-ku: Ndé, ka sumbise ioso i uavu, o kitadi u ki uanene jingadiama, mbe u kale ni jimbongo ku diulu; nda uize kiua, u ngi kaiele.

²² O munzangala anga u sonoka pholo ki evu o hundu iíi, anga u tunda-bhu ni mukondo, kuma mukua jimbongo javulu.

²³ Jezú-phe, sui dingi ku jixibulu je ja mu kondoloka, uixi: Kubhonza kuahi, akua itadi o kubokona mu Utuminu na Nzambi!

²⁴ Jixibulu anga a diuana o maka mê. Jezú-phe ua kumuna dingi, uixi: Ana, kubhonza kuahi, oso a di fiiala jimbongo, o kubokona mu Utuminu ua Nzambi!

²⁵ Inda o kamelu kubhita bhu dizungu dia nguia, ki ki bhonzo kala kia mukua itadi kubokona mu Utuminu ua Nzambi.

²⁶ Ene anga a sasumuka kiavulu, a kala mu dʼibhudisa mudia, exi: Uebhi-phe u bhuluka?

²⁷ Sui kuala Jezú, uixi: Ku athu ki kamba ku xikina, kua Nzambi phe kana. Kuma kua Nzambi iene ioso i xikina.

²⁸ Phetele anga u kuata kuzuela, uixi: Talesa! Etu tua xisa ioso etu tua ku kaiela.

²⁹ Kuala Jezú: Kidi kiene ngi mi ambela: Kana muthu u xa dibhata, mba jiphange, ja mala ni ja ahatu, mba mama, mba tata, mba ana, mba jixi, mukonda diami eme ni dia Njimbu Iambote,

³⁰ he u kamba kutambula luhama ku muenhu iu, mabhata, jiphange, ja mala ni ja ahatu, jimama, ana, jixi, kumoxi ni jiphaxi ja ku mu zuididika. Maji o ku mundu ua keza-ku, muenhu ki uábhua.

³¹ Sai-phe kindala a dianga, a ka sukidila; sai a sukidila kindala, a ka dianga.

Jezú u tanga dingi o kufua kue

³² Anga a kala mu njila mu kubanda ku Jeluzaleme. Jezú anga u tuamenena, o maxibulu ia a kaiela ku dima. Maxibulu anga a diuana, o ene oso a mu nhenganana a kala ni uoma. Muene anga u di bunda dingi ni kuinhi ni kiiadi, u kuata ku a tangela ima ia-nda ku mu bhita, uixi:

³³ Talesenu, etu tu bandʼú ku Jeluzaleme, o kuenhoko, Monʼa Muthu a-nda ku mu bhakula ku makota ma jinganga ni ku jimesene ja Kitumu. Ene a-nda ku mu elesa phala ku mu jibha, anda ku mu bhakuila akua matumbu.

³⁴ Ene a mu bhanga kasekelu, a mu ta mathe, a mu beta ni jixikote, he a mu jibha. Maji ki bhita izuua itatu-phe, ua ka fukunuka.

Anʼ a Zebedeu a bhinga o ukota

³⁵ Kienhokio Tiiaku ni Nzuá, anʼa Zebedeu, anga a mu zukama, exi: Mesene, tua mesena u tu bhanga kioso ki tu ku bhinga.

³⁶ Kuala Jezú: Mua mesena ngi mi bhanga kiebhi?

³⁷ Exi: U tu bhesa kuma iú u xikama ku mbandu iê ia kadilu, o iu ku kiasu, kioso hinu ki u xikama ku Kiandu kia Ungana ue.

³⁸ Kuala Jezú: Enu ki mua kʼijiia ngo kioso ki mua bhingi. Kífua mu tena kunua dikáu di ngi nua eme? Ni kutambula o batizu ia ngi batizala na-iu Eme?

³⁹ Exi: Tua soko-bho. Kuala Jezú: Kidi! Dikáu di ngi nua eme, mu di nua muene; a mi bhitisa ue o batizu ia ngi batizala eme.

⁴⁰ Maji o kuxikama ku madilu mami-phe, ni ku kiasu, ki kiami eme o ku ki bhana, maji kiangene kia Nzambi, kua io oso a a lekelelà-kiu.

⁴¹ O dikuinhi kia zubha ku kʼívua, a sota kufutulukila Tiiaku ni Nzuá.

⁴² Jezú anga ua exana ene oso, uixi: Enu mua kʼijiia kuma a di fika ungana mu akuajixi a bhikisa o mundu; o makota ma a tumina.

⁴³ Mudienu-phe, ki ki kale kiki. Uoso-phe mudienu uendi ukota, a kale ngamba ienu;

⁴⁴ O uoso uendi o ku kala ku pholo, a kale mubhika ua ene oso.

⁴⁵ Kuma ni Monʼa Muthu ue, keza kukala ni athu a mu bhikila, maji muene-ku kubhikila ni kubhana o muenhu ue mu ku kula mundu.

O Kifôfo kia Jelikó

⁴⁶ Jezú ni maxibulu mê he a bhixila mu sanzala ia Jelikó. O mu kutunda mu Jelikó, ni muene, ni jixibulu je, ni kifuẋi kia dikota, bhu kala kifofo Bartimeu, monʼa Timeu ua xikama bhu mbanduʼa ikoka mu bhinga jimola.

⁴⁷ O ki evu kuila muene Jezú dia Nzalé ua-lu bhita, u kuata ku di kola, uixi: Jezú, u Monʼa Davidi, ngi kuatele henda!

⁴⁸ Mundu anga a mu bazela, phala a di xibhe. Muene-phe u suína dingi kiavulu ni ku di kola, uixi: U Monʼa Davidi, ngi kuatele henda!

⁴⁹ Jezú anga uimana, uixi: Mu ixanienu. Anga exana o kifofo, exi: Ua lungu-é! Balumuka, iu ku ixana!

⁵⁰ Muene kia takula o kizuatu kiê ku dima, uixi: Petéka! Uiza kua Jezú.

⁵¹ Jezú iu ua mu kumbulula, uixi: Ua mesena ngi ku bhanga kiebhi? Kuala o kifofo: Mesene, ngi bhane dingi o kumona.

⁵² Jezú anga u mu ambela, uixi: Nda-ié! O kuxikana kue kua ku bhana kuiluka. Kithanganʼokio Bartimeu anga u iluka o mesu, he mona dingi, anga u kaiela Jezú mu njila.